ថ្លែងក្នុងពិធីគំនិតផ្តួចផ្តើមជាសកលហៅថា Clinton Global Innitive របស់លោកអតីតប្រធានាធិបតីសហរដ្ឋអាមេរិក Bill Clinton នៅទីក្រុងញូវយ៉កកាលពីថ្ងៃអង្គារ លោកប្រធានាធិបតីស.រ.អា.បារ៉ាក់ អូបាម៉ាបានកោតសរសើរដល់សកម្មជនក្នុងពិភពលោកដែលហ៊ាននិយាយការពារសិទ្ធិមនុស្ស ហើយត្រូវរងការយារយីនិងការវាយប្រហារ ដែលមានពេលខ្លះរហូតដល់សម្លាប់ថែមទៀត។
ក្នុងចំណោមអ្នកដែលលោកប្រធានាធិបតីស.រ.អា.កោតសរសើរនោះមានសកម្មជនកម្ពុជាពីរនាក់ផងដែរគឺអ្នកស្រី ចក់ សុខភាព និងសពលោក ឈុត វុទ្ធីសកម្មជនការពារព្រៃឈើដែលត្រូវគេបាញ់សម្លាប់កាលពីឆ្នាំ២០១២។ ការថ្លែងដូច្នេះបង្ហាញឲ្យឃើញថា បញ្ហាសិទ្ធិមនុស្សនៅកម្ពុជាកំពុងជួបបញ្ហាយ៉ាងច្រើន។
តែទោះជាយ៉ាងណាក្តី ប្រមុខការទូតកំពូលនៃប្រទេសកម្ពុជាគឺលោកឧបនាយករដ្ឋមន្ត្រីឋ ហោ ណាំហុង បានការពារការប្រវត្តិសិទ្ធិមនុស្សនៅកម្ពុជា ដោយអះអាងថា រដ្ឋាភិបាលបានធ្វើកិច្ចការកែទម្រង់សិទ្ធិមនុស្សនិងធ្វើឲ្យរីកចម្រើនច្រើនផងដែរ។
«បញ្ហាអ្នកដែលការពារព្រៃឈើនេះយើងកំពុងតែអង្កេតតទៅទៀត ដោយកន្លងមកការស៊ើបអង្កេតបានឃើញហើយថា ប៉េអ៊ឹមម្នាក់នោះគាត់ជាអ្នកប្រព្រឹត្តឃាតកម្មនេះ។ យើងយកវិធានការ ទោះជាយ៉ាងណាក្តី ក៏យើងនៅតែបន្តស្រាវជ្រាវជាក់ស្តែងទៀត។ ខ្ញុំយល់ឃើញថា មិនមែននៅតែក្នុងប្រទេសកម្ពុជាទេដែលឧក្រិដ្ឋកម្មបានកើត ហើយរកមិនឃើញ។ នៅស.រ.អា.ក៏អញ្ចឹង នៅប្រទេសក្នុងសកលលោកក៏អញ្ចឹង។ ច្រើនណាស់ដែលមានការប្រព្រឹត្តអំពើឧក្រិដ្ឋកម្មហើយ យើងរកមិនទាន់ឃើញ មិនមែនតែនៅកម្ពុជាទេ»។
លោកថ្លែងយ៉ាងដូច្នេះក្នុងកិច្ចសម្ភាសន៍ជាមួយវីអូអេខ្មែរនៅឯបូរីញូវយ៉កកាលពីថ្ងៃសៅរ៍មុនពេលលោកអញ្ជើញចូលរួមថ្លែងការណ៍ទៅកាន់ប្រទេសជិត២០០ក្នុងកិច្ចប្រជុំមហាសន្និបាតអ.ស.ប.នៅថ្ងៃច័ន្ទទី២៩ខែកញ្ញា។ លោកថ្លែងថា នៅកម្ពុជាមានការផ្តល់សេរីភាពពេញលេញដល់សារព័ត៌មានបរទេសក្នុងស្រុក ផ្តល់ការអនុញាតឲ្យការិយាល័យសិទ្ធិមនុស្ស អ្នករាយការណ៍សិទ្ធិមនុស្ស និងអង្គការក្រៅរដ្ឋាភិបាលជាច្រើនពាន់ដើម្បីប្រតិបត្តិការដោយសេរី និងឯករាជ្យ។
«តើប្រទេសណាក្នុងពិភពលោកមានដល់ប៉ុណ្ណឹងទេ។ ដូច្នេះគេចេះតែនិយាយ។ ដរាបណាយើងមានអ្នកធ្វើអំពីសិទ្ធិមនុស្សច្រើន ដរាបនោះយើងនៅតែមាន បញ្ហា។ បើសិនជាយើងអស់បញ្ហា (អត់មានបញ្ហាហ្នឹង) អង្គការទាំងនោះ ច្បាស់ជាអត់ការងារធ្វើហើយ។ ដូច្នេះតោងមានការងារធ្វើ តោងមានអីនិយាយ ត្រូវតែ រកឲ្យឃើញនូវបញ្ហាសិទ្ធិមនុស្សនេះឯង»។
ថ្លែងក្នុងពិធីគំនិតផ្តួចផ្តើមជាសកលរបស់លោកអតីតប្រធានាធិបតីសហរដ្ឋអាមេរិក Bill Clinton នៅទីក្រុងញូវយ៉កកាលពីថ្ងៃអង្គារនោះ លោកប្រធានាធិបតីបារ៉ាក់ អូបាម៉ាបានកោតសរសើរដល់សកម្មជនដែលក្លាហានក្នុងពិភពលោកដែលហ៊ានឡើងនិយាយ ហើយត្រូវរងការយារយី និងការវាយប្រហារ ដែលមានពេលខ្លះរហូតដល់សម្លាប់ថែមទៀត។ លោកអូបាម៉ាបានបញ្ជាក់ឈ្មោះចំៗរបស់សកម្មជនតស៊ូទាំងនោះនិងឈ្មោះប្រទេសដែលមានការរំលោភបំពានសិទ្ធិមនុស្សផងដែរ។
«ថ្ងៃនេះយើងសូមគោរពដល់អ្នកដែលបានពលីជីវិត។ នៅក្នុងចំណោមនោះរួមមានលោក Eric Lembembe ក្នុងប្រទេសកាមេរូន (Cameroon) លោក Salwa Bugaighis ក្នុងប្រទេសលីប៊ី និងលោកឈុត វុទ្ធីក្នុងប្រទេសកម្ពុជា»។
លោក បារ៉ាក់ អូបាម៉ាមានប្រសាសន៍ថា៖ «យើងគាំទ្រសកម្មជនដូចជាលោកស្រីចក់ សុភាពក្នុងប្រទេសកម្ពុជា។ លោកស្រីចក់ សុភាពបានឃើញអ្នកធ្វើការគាំទ្រសិទ្ធិមនុស្សដូចគ្នាត្រូវបាននគរបាលចាប់យកទៅ។ ពេលនោះលោកស្រីអាចគេចខ្លួនបាន តែលោកស្រីនិយាយថា លោកស្រីនឹងមិនចាកចេញពីប្រទេសកម្ពុជាមួយនាទីណាឡើយ។ ដូច្នេះអ្នកស្រីបានដើរកៀងគរអ្នកតវ៉ា និងបំផុសយុវជនឲ្យទាមទារយុត្តិធម៌។ កាលណោះលោកស្រីមានប្រសាសន៍ថា៖ «ខ្ញុំមានការស្រម៉ៃចង់បានថា ពលរដ្ឋខ្មែរមានសេរីភាពដែលគេត្រូវមាន»។
លោកអូបាម៉ាមានប្រសាសន៍ថា៖ «យើងមានមោទនភាពចំពោះលោកស្រីហើយយើងគាំទ្រលោកស្រី ចក់ សុភាព»។
លោកអូបាម៉ាបានបញ្ជាក់ពីគោលនយោបាយជាបន្ទាន់មួយគឺស.រ.អា.នឹងធ្វើកិច្ចការជាមួយអង្គការសង្គមស៊ីវិលក្នុងបណ្តាប្រទេសនានាដែលមានការរំលោភសិទ្ធិមនុស្ស រួមទាំងការផ្តល់ជំនួយផង។
នៅក្នុងកិច្ចពិភាក្សាជាមួយពលរដ្ឋខ្មែរអាមេរិកាំងដែលពិភាក្សាអំពីប្រជាធិបតេយ្យ និងសិទ្ធិមនុស្សប្រទេសកម្ពុជានៅរដ្ឋវីជីនៀគឺមុនអ្នកស្រីចូលរួមស្តាប់លោកអូបាម៉ាថ្លែងការណ៍នេះ អ្នកស្រីចក់ សុភាពបានថ្លែងអំពីបញ្ហារំលោភ បំពានសិទ្ធិមនុស្សក្នុងប្រទេសកម្ពុជា និងបញ្ហានិទណ្ឌភាពផងដែរ។
«លទ្ធិប្រជាធិបតេយ្យនេះផ្សារភ្ជាប់នឹងនិទណ្ឌភាព ហើយនិទណ្ឌភាពគឺផ្សារភ្ជាប់នឹងមរណភាពរបស់លោកម៉ៅ សុខចាន់ហ្នឹងឯង ដែលយើងស្នើឲ្យមានការស៊ើបអង្កេតហើយរកយុត្តិធម៌ដល់លោកម៉ៅ សុខចាន់នេះឯង ហើយនឹងបាតុករផ្សេងៗទៀតដែលបានបាត់បង់ជីវិតនឹងរងរបួសក្នុងនោះដែរចា៎»។
លោកគុជ ច័ន្ទលី អ្នកវិភាគឯករាជ្យម្នាក់ដែលចូលរួមក្នុងកិច្ចពិភាក្សាគ្នា មុនពេលប្រារព្ធទិវាប្រជាធិបតេយ្យអន្តរជាតិនោះដែរ បានបញ្ជាក់ពីសារៈសំខាន់នៃសិទ្ធិមនុស្សថា៖
«សិទ្ធិបឋមនេះវាមានទឹកដី ស្រែចម្ការ ផ្ទះ ជម្រក ក្រុមគ្រួសារ ការរស់នៅសុខដុមរមនាផ្សេងៗ។ អាហ្នឹងហើយជាសេចក្តីត្រូវការចាំបាច់។ ប្រជាពលរដ្ឋ បើអត់មានអាធាតុបឋមហ្នឹងទេ ត្រូវតែនាំគ្នាបះបោរក្រោកឈររើបម្រះហើយរស់នៅសិទ្ធិទទួលបានសេរីភាព»។
ប្រទេសកម្ពុជាត្រូវគេចាត់ទុកថា មានការរំលោភសិទ្ធិមនុស្សដ៏ធ្ងន់ធ្ងរនៅឡើយ ដែលអ្នករាយការណ៍ពិសេសរបស់អ.ស.ប.គឺលោកសុរិយា ស៊ូប៊េឌី កាលពី សប្តាហ៍មុន បានទទូចឲ្យមានការកែទម្រង់លើបញ្ហារចនាសម្ព័ន្ធសិទ្ធិមនុស្សនានាក្នុងពេលដែលគណបក្សនយោបាយកម្ពុជាទាំងពីរបានបញ្ចប់ភាពទល់ច្រក ខាងនយោបាយហើយនោះ៕