នាយករដ្ឋមន្ត្រីខ្មែរលោក ហ៊ុន សែន នៅថ្ងៃព្រហស្បតិ៍នេះ បានលើកឡើងនៅក្នុងពិធីចែកសញ្ញាប័ត្រមួយរៀបចំឡើងនៅរាជធានីភ្នំពេញថា ផលិតកម្មស្រូវរបស់កម្ពុជា នៅឆ្នាំ ២០១៨ នេះ អាចកើនលើសប្រាំលានតោន ខណៈដែលកសិករបានធ្វើការដាំដុះស្រូវវស្សាលើផ្ទៃជាង២លាន៦សែនហិកតា និងស្រូវប្រាំងជាងកន្លះលានហិកតា។
ថ្លែងទៅកាន់ក្រុមនិសិ្សត និងក្រុមមន្ត្រីរដ្ឋាភិបាលកម្ពុជានៅឯវិទ្យាស្ថានបច្ចេកវិទ្យាកម្ពុជា លោក ហ៊ុន សែនបានអះអាងយ៉ាងដូច្នេះ៖
«យើងធ្វើចំនួន២លាន៦សែនហិកតាជាង សម្រាប់ស្រូវវស្សា អាហ្នឹងជាស្រូវ ឯសម្រាប់ស្រូវប្រាំងមានរហូតជាងកន្លះលានហិកតា ជាងកន្លះលានហិកតា ជាមួយទិន្នផលជាងបួនតោន ជាងបួនតោន។ ឆ្នាំនេះ តាមការប៉ាន់ស្មានជាបឋម អតិរេកស្រូវដែលយើងអាចសល់ពីការហូបចុកហើយ មិនជាង៥លាន៥សែនតោនទេ។ នេះជាការប៉ាន់ស្មាន ដែលខ្ញុំធ្លាប់ប៉ាន់ស្មាន ឆ្លងកាត់រដ្ឋមន្ត្រីក្រសួងកសិកម្មប៉ុន្មានហើយ»។
ទាក់ទិនបញ្ហាកសិកម្មនេះ លោកនាយករដ្ឋមន្ត្រី ហ៊ុន សែន ទើបតែបានស្នើឲ្យប្រទេសឥណ្ឌាជួយពង្រឹងវិស័យកសិកម្មកម្ពុជា តាមរយៈប្រព័ន្ធព័ត៌មានវិទ្យារបស់ឥណ្ឌា ក្នុងការពិនិត្យមើលគុណភាពដី និងបែងចែកតំបន់ដាំដុះ។ ការស្នើនេះ បានធ្វើឡើង ក្នុងអំឡុងពេលនៃដំណើរទស្សនកិច្ចផ្លូវការរបស់លោក ទៅកាន់ប្រទេសឥណ្ឌា ដែលមានរយៈពេលបីថ្ងៃ គឺគិតចាប់តាំងពីថ្ងៃទី ២៤ ដល់ថ្ងៃទី២៧មករា ឆ្នាំ ២០១៨ នេះ។
យោងតាមការប៉ាន់ប្រមាណរបស់មជ្ឈមណ្ឌលឧត្ដមភាពប្រពលវប្បកម្មកសិកម្មនិរន្តរភាព និងអាហារូបត្ថម្ភ ដែលទទួលបានការឧបត្ថម្ភពីភ្នាក់ងារសហរដ្ឋអាមេរិកសម្រាប់អភិវឌ្ឍន៍អន្តរជាតិប្រចាំនៅកម្ពុជា ហៅកាត់ថា (USAID) បានឲ្យដឹងថា ៨០ភាគរយនៃប្រជាជនសរុបនៅក្នុងប្រទេសកម្ពុជា បានធ្វើការដោយផ្ទាល់ និងដោយប្រយោលជាមួយកសិកម្ម។ ៦៥ភាគរយ នៃមុខរបររបស់ប្រជាជន គឺពាក់ព័ន្ធនឹងវិស័យកសិកម្ម ហើយវិស័យនេះបានចូលរួមចំណែក៣២ភាគរយនៃផលិតផលក្នុងស្រុកសរុប (GDP) នៅក្នុងឆ្នាំ២០១៣។ ប្រទេសកម្ពុជាមានផ្ទៃដីប្រមាណ ៣,៧ លានហិកតាសម្រាប់ការងារដំាដុះ៕