រដ្ឋមន្ត្រីការបរទេសកម្ពុជា លោក ប្រាក់ សុខុនបានថ្លែងបញ្ជាក់ពីការពង្រឹងបន្ថែមទៀតនៃភាពជាដៃគូរវាងកម្ពុជា និងភ្នាក់ងារអង្គការសហប្រជាជាតិ។ នេះបើយោងតាមសេចក្តីប្រកាសមួយរបស់ក្រសួងការបរទេស និងសហប្រតិបត្តិការអន្តរជាតិ ដែលVOA បានទទួលនៅថ្ងៃព្រហស្បតិ៍នេះ។
ក្រសួងការបរទេសកម្ពុជាបានបញ្ជាក់ឲ្យដឹងនៅក្នុងសេចក្តីប្រកាសរបស់ខ្លួនចុះថ្ងៃទី២២ ខែកុម្ភៈនេះថា លោក ប្រាក់ សុខុនបានជួបលោកស្រី Claire Van der Vaeren តំណាងកម្មវិធីអភិវឌ្ឍន៍អ.ស.ប. ប្រចាំកម្ពុជា និងជាអ្នកសម្របសម្រួលប្រព័ន្ធអ.ស.ប.នៅកម្ពុជា។ ក្នុងជំនួបនោះ លោកបានប្រាប់អ្នកស្រីថា ក្រុមការងារអ.ស.ប.នៅកម្ពុជា តាមរយៈ«ក្របខ័ណ្ឌជំនួយអភិវឌ្ឍន៍អង្គការសហប្រជាជាតិ» បានរួមវិភាគទានដ៏សំខាន់ដល់កំណើនសេដ្ឋកិច្ច និងការអភិវឌ្ឍប្រកបដោយចីរភាព ក្នុងនោះមានការអភិវឌ្ឍសង្គម កិច្ចគាំពារសង្គម ការអភិវឌ្ឍធនធានមនុស្ស អភិបាលកិច្ចល្អ និងសិទ្ធិមនុស្សជាដើម។
លោកប្រាក់ សុខុន បានបន្តថា ក្រុមការងារអ.ស.ប.ក៏បានជួយកម្ពុជា ក្នុងការសម្រេចបាននូវគោលដៅអភិវឌ្ឍសហសវត្សរ៍ សកម្មភាពមនុស្សធម៌ដូចជា ការបោសសំអាតមីន និងការចូលរួមរបស់កម្ពុជានៅក្នុងបេសកកម្មរក្សាសន្តិភាពពិភពលោករបស់អ.ស.ប. ក៏ដូចជាការគាំទ្រដល់ការរីកចម្រើនប្រកបដោយសមធម៌នៅកម្ពុជា។
ក្នុងជំនួបរវាងលោក ប្រាក់ សុខុន និងអ្នកស្រី Claire ដែលបានធ្វើឡើងកាលពីម្សិលមិញ អ្នកស្រី Claire បានបញ្ជាក់ពីសេចក្តីរីករាយចំពោះការបំពេញការងាររបស់អ្នកស្រីនៅកម្ពុជាក្នុងរយៈពេល៥ឆ្នាំ និងបានវាយតម្លៃខ្ពស់ចំពោះការរីកចម្រើននៅលើវិស័យជាច្រើនដែលកម្ពុជាសម្រេចបាន ពិសេសគឺនៅលើគោលដៅអភិវឌ្ឍន៍ប្រកបដោយចីរភាព និងការរីកចម្រើនផ្នែកសេដ្ឋកិច្ច ដែលធ្វើឲ្យប្រទេសកម្ពុជាបានទទួលចំណាត់ថ្នាក់ជាប្រទេសមានចំណូលមធ្យម។
សេចក្តីប្រកាសដដែលរបស់ក្រសួងការបរទេសក៏បានឲ្យដឹងបន្ថែមទៀតថា លោកប្រាក់ សុខុន និងអ្នកស្រី Claire បានពិភាក្សាផ្លាស់ប្តូរយោបល់គ្នាអំពីការ«បន្តពង្រឹងបន្ថែមទៀតនូវភាពជាដៃគូដ៏ជិតសិ្នទ្ធរវាងរដ្ឋាភិបាល និងបណ្តាទីភ្នាក់ងារអ.ស.ប.ប្រចាំកម្ពុជា។
VOA ព្យាយាមសុំការអធិប្បាយពីលោក ជុំ សុន្ទរី អ្នកនាំពាក្យក្រសួងការបរទេស តែលោកមិនលើកទូរស័ព្ទ។ VOA មិនទាន់ទទួលបានសេចក្តីអធិប្បាយពីការិយាល័យអ្នកសម្របសម្រួលប្រព័ន្ធអ.ស.ប.នៅកម្ពុជា ពាក់ព័ន្ធនឹងជំនួបប្រជុំរបស់លោកប្រាក់ សុខុន និងអ្នកស្រី Claire ដែលបានធ្វើឡើងកាលពីថ្ងៃពុធ។
យ៉ាងណាក្តី ជំនួបរវាងរដ្ឋមន្ត្រីការបរទេសកម្ពុជា និងអ្នកសម្របសម្រួលប្រព័ន្ធអ.ស.ប.នៅកម្ពុជាបានធ្វើឡើង មួយថ្ងៃក្រោយពីមានប្រតិកម្មពីអ្នកជំនាញផ្នែកសិទ្ធិមនុស្សរបស់អង្គការសហប្រជាជាតិ ប្រឆាំងនឹងការធ្វើវិសោធនកម្មរដ្ឋធម្មនុញ្ញ និងក្រមព្រហ្មទណ្ឌកម្ពុជា។
អ្នកជំនាញសិទិ្ធមនុស្សពីររូបរបស់អ.ស.ប.បានចេញសេចក្តីប្រកាសមួយកាលពីថ្ងៃអង្គារ ដោយបានសម្តែងកង្វល់យ៉ាងខ្លាំងចំពោះសំណើកែប្រែរដ្ឋធម្មនុញ្ញកម្ពុជា ដែលនឹងអាចដាក់កំហិតយ៉ាងខ្លាំងទៅលើលទ្ធិប្រជាធិបតេយ្យនៅមុនការបោះឆ្នោតជាតិនៅឆ្នាំនេះ និងនៅពេលអនាគត៕