ចក្រភពអង់គ្លេសនឹងមិនចុះហត្ថលេខាលើកកិច្ចព្រមព្រៀងពាណិជ្ជកម្មជាមួយសហរដ្ឋអាមេរិកដែលមិនមែនជាផលប្រយោជន៍ដ៏ល្អបំផុតរបស់ខ្លួននោះទេ នេះបើតាមការបញ្ជាក់របស់លោក Liam Fox រដ្ឋមន្រ្តីពាណិជ្ជកម្មអង់គ្លេសកាលពីថ្ងៃសៅរ៍។
ការអះអាងនេះមានឡើងបន្ទាប់ពីពួកមន្រ្តីសហភាពអឺរ៉ុបដាក់ពាក្យបណ្តឹងទៅកាន់អង្គការពាណិជ្ជកម្មពិភពលោកដោយសារបញ្ហាការយកពន្ធគយរបស់សហរដ្ឋអាមេរិកលើការនាំចូលដែកថែបនិងអាលុយមីញ៉ូម។
លោក Fox បាននិយាយកាលពីថ្ងៃសៅរ៍នៅក្នុងកិច្ចសម្ភាសន៍ជាមួយវិទ្យុ BBCថា៖ «បើយើងមិនអាចឈានដល់ការព្រមព្រៀងគ្នាដែលយើងជឿជាក់ថា វាជាផលប្រយោជន៍របស់ចក្រភពអង់គ្លេសទេ យើងនឹងមិនចុះហត្ថលេខាលើកិច្ចព្រមព្រៀងពាណិជ្ជកម្មទេ»។
អត្ថាធិប្បាយរបស់លោក Fox បានកើតមានឡើងមួយថ្ងៃបន្ទាប់ពីពួកមន្រ្តីសហភាពអឺរ៉ុបបញ្ជូនពាក្យបណ្តឹងផ្លូវការមួយទៅកាន់អង្គការពាណិជ្ជកម្មពិភពលោកដែលជាសកម្មភាពសងសឹកលើកទី១ រួមមានលទ្ធភាពនៃការយកពន្ធគយពីទំនិញរបស់សហរដ្ឋអាមេរិកផង។
លោក Fox មានប្រសាសន៍ថា ការយកពន្ធគយនេះជាការខុសច្បាប់ហើយថា លោកស្រីនាយករដ្ឋមន្រ្តីចក្រភពអង់គ្លេស Theresa May នឹងលើកឡើងបញ្ហានេះនៅឯជំនួបក្រុមប្រទេស៧ដែលហៅកាត់ថា G7 ដែលជាប្រទេសមានសេដ្ឋកិច្ចជឿនលឿនបំផុតនៅសប្តាហ៍ក្រោយក្នុងប្រទេសកាណាដា។
ការតានតឹងខាងពាណិជ្ជកម្មឆ្លងកាត់មហាសមុទ្រអាត្លង់ទិក និងតំបន់អាមេរិកខាងជើងបានរីកកាន់តែធំឡើងនៅពេលដែលសហរដ្ឋអាមេរិកយកពន្ធគយ២៥ភាគរយកាលពីថ្ងៃសុក្រលើការនាំចូលដែកថែបនិងពន្ធគយចំនួន១០ភាគរយលើការនាំចូលអាលុយមីញ៉ូមមកពីសហភាពអឺរ៉ុប កាណាដានិងម៉ិកស៊ិក៕