ជនល្បីល្បាញកំពូលជាង២០០នាក់របស់ចក្រភពអង់គ្លេស រួមមានតារាភាពយន្ត លោក Ralph Fiennes នាង Keira Knightley លោក Benedict Cumberbatch និងអ្នកសរសេរបទភ្លេង Tom Stoppard និងលោក David Hare បានអំពាវនាវដល់រដ្ឋាភិបាលអង់គ្លេសធ្វើឲ្យមានកម្មវិធីតាំងទីលំនៅឡើងវិញសម្រាប់កុមារជនភៀសខ្លួន។
កុមារគ្មានឪពុកម្តាយមកជាមួយចំនួន២០០នាក់ បានត្រូវទទួលយកនៅក្រោមផែនការនោះក្នុងរយៈពេល៩ខែ។ កុមារ១៥០នាក់ផ្សេងទៀតនឹងត្រូវបានទទួលយកនៅក្នុងរយៈពេល៣ ទៅ ៤ខែខាងមុខទៀតមុនពេលកម្មវិធីនោះបិទបញ្ចប់។
នៅក្នុងលិខិតចំហរមួយច្បាប់កាលពីថ្ងៃអង្គារផ្ញើជូនលោកស្រីនាយករដ្ឋមន្រ្តី Theresa May នៃប្រទេសអង់គ្លេស ជនល្បីល្បាញបានពណ៌នាថា វាពិតជាការខ្មាស់អៀនយ៉ាងខ្លាំងចំពោះការសម្រេចចិត្តបញ្ឈប់កម្មវិធីនោះ។ ជនល្បីល្បាញទាំងនោះបានសរសេរថា៖ «គំនិតដែលថាក្នុងឋានៈជាប្រទេសមួយដែលយើងនឹងបិទកម្មវិធីនោះបន្ទាប់ពីកូនក្មេង៣៥០នាក់បានមកដល់ដោយសុវត្ថិភាពនោះជាការមិនអាចទទួលយកបានទាល់តែសោះ»។
ពួកគេនិយាយទៀតថា៖ «ប្រទេសដែលយើងស្គាល់និងស្រឡាញ់នោះ ត្រូវធ្វើប្រសើរជាងនេះ»។
ផែនការអនុញ្ញាតឲ្យកុមារជនភៀសខ្លួនមិនមានឪពុកម្តាយមកជាមួយដែលកំពុងដើរ ត្រាច់ចរក្នុងតំបន់អឺរ៉ុបបន្ទាប់ពីរត់គេចចេញពីតំបន់មជ្ឈិមបូព៌ាមិនមែនជាគំនិតរបស់រដ្ឋាភិបាលទេ។ រដ្ឋាភិបាលមានការស្ទាក់ស្ទើរបន្ទាប់ពីសមាជិកសភាបានអនុម័ត វិសោធនកម្មច្បាប់អន្តោប្រវេសន៍ថ្មីកាលពីខែមេសាឆ្នាំទៅ។ ពួកសមាជិកសភារំពឹងថា ចំនួនកូនក្មេងដែលមិនមានឪពុកម្តាយមកជាមួយ នឹងមានកាន់តែច្រើនឡើងរហូតដល់៣ពាន់នាក់។
ការណ៍នេះចំណាយពេលរហូតដល់៥ខែបន្ទាប់ពីការអនុម័តវិសោធនកម្មសម្រាប់រដ្ឋាភិបាលផ្តល់ការតាំងទីលំនៅដល់ជនភៀសខ្លួនកុមារដែលជាប់គាំងនៅក្នុងតំបន់អឺរ៉ុប៕