លោក Joe Biden ដែលគេសន្មតថាជាប្រធានាធិបតីជាប់ឆ្នោតថ្មីរបស់សហរដ្ឋអាមេរិក បានជ្រើសរើសលោក Xavier Becerra អគ្គរដ្ឋអាជ្ញារដ្ឋ California ឲ្យធ្វើជារដ្ឋមន្ត្រីក្រសួងសុខាភិបាល។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន AP។
លោក Becerra ដែលជាអ្នកការពារច្បាប់ធានារ៉ាប់រងសុខភាព Affordable Act នឹងកាន់តួនាទីដឹកនាំ ដើម្បីមើលការខុសត្រូវលើវិធានការរបស់រដ្ឋបាលលោក Biden នៅក្នុងការឆ្លើយតបទៅនឹងជំងឺកូវីដ១៩។
មួយវិញទៀត លោក Biden បានជ្រើសរើសអ្នកស្រីវេជ្ជបណ្ឌិត Rochelle Walensky អ្នកជំនាញផ្នែកជំងឺឆ្លងនៃសាកលវិទ្យាល័យ Harvard ឲ្យដឹកនាំមជ្ឈមណ្ឌលគ្រប់គ្រងនិងបង្ការជំងឺ (CDC)។
ប្រសិនបើទទួលបានការអនុម័តពីព្រឹទ្ធសភា លោក Becerra ដែលមានអាយុ ៦២ ឆ្នាំ នឹងក្លាយជាជាតិសាសន៍ឡាទីនដំបូងបង្អស់នៅក្នុងការដឹកនាំក្រសួងសុខាភិបាល។
ការជ្រើសតាំងលោក Becerra នេះ ត្រូវបានបញ្ជាក់ដោយមនុស្ស ២ នាក់ ដែលដឹងអំពីការសម្រេចនេះ ដែលនិយាយក្នុងលក្ខខណ្ឌមិនបញ្ចេញឈ្មោះ។ ការប្រកាសជាផ្លូវការអំពីការជ្រើសតាំងនេះត្រូវគេរំពឹងថានឹងធ្វើឡើងនៅថ្ងៃអង្គារស្អែក។
មនុស្ស ២ នាក់ដែលមិនបញ្ជាក់អត្តសញ្ញាណនោះ ក៏បានបញ្ជាក់ផងដែរអំពីការជ្រើសតាំងអ្នកស្រី Walensky។ តំណែងជានាយកមជ្ឈមណ្ឌល CDC មិនតម្រូវឲ្យមានការអនុម័តពីព្រឹទ្ធសភាទេ៕