ប្រធានាធិបតីសហរដ្ឋអាមេរិកលោក Joe Biden បានធ្វើដំណើរទស្សនកិច្ចដោយមិនប្រាប់ឱ្យដឹងជាមុនទៅកាន់ប្រទេសអ៊ុយក្រែននៅថ្ងៃចន្ទនេះ ប៉ុន្មានថ្ងៃមុនខួបមួយឆ្នាំនៃការឈ្លានពានរបស់រុស្ស៊ី។
គម្រោងនេះរួមមានការធ្វើសុន្ទរកថានៅថ្ងៃអង្គារស្អែកនៅក្នុងរដ្ឋធានីវ៉ាសូវីនៃប្រទេសប៉ូឡូញ ដែលពណ៌នាពីការខំប្រឹងប្រែងរបស់សហរដ្ឋអាមេរិក ដើម្បីប្រមូលការគាំទ្រសម្រាប់អ៊ុយក្រែន និងមានការសន្យាបន្តរួបរួមជាមួយប្រជាពលរដ្ឋអ៊ុយក្រែនផងដែរ។
លោកប្រធានាធិបតី Biden ក៏មានគម្រោងជួបជាមួយអគ្គលេខាធិការអង្គការអូតង់លោក Jens Stoltenberg និងពួកមេដឹកនាំរបស់ក្រុមប្រទេស Bucharest ចំនួន៩ មុនពេលត្រឡប់មកកាន់រដ្ឋធានីវ៉ាស៊ីនតោនវិញនៅថ្ងៃពុធ។
ប្រធានាធិបតីអាមេរិកលោក Joe Biden និងប្រធានាធិបតីអ៊ុយក្រែនលោក Volodymyr Zelenskyy ដើរក្បែរវិហារ Saint Michael ចំពេលមានការវាយប្រហាររបស់រុស្ស៊ីលើអ៊ុយក្រែន នៅក្នុងទីក្រុងកៀវ ប្រទេសអ៊ុយក្រែន នៅថ្ងៃទី២០ ខែកុម្ភៈ ឆ្នាំ២០២៣។
សហរដ្ឋអាមេរិកនិងសហភាពអឺរ៉ុប បានព្រមាននៅថ្ងៃចន្ទនេះពីផលវិបាកដែលចិនផ្តល់ជំនួយអាវុធទៅឱ្យកងទ័ពរុស្ស៊ី ដើម្បីប្រយុទ្ធនៅក្នុងប្រទេសអ៊ុយក្រែន។
រដ្ឋមន្ត្រីការបរទេសសហរដ្ឋអាមេរិកលោក Antony Blinken បានប្រាប់ពួកអ្នកយកព័ត៌មានថា នឹងមាន«ផលវិបាកពិតប្រាកដ»នៅក្នុងទំនាក់ទំនងរវាងសហរដ្ឋអាមេរិកនិងរុស្ស៊ី ហើយថា លោកបានចែករំលែកការព្រួយបារម្ភនេះដោយផ្ទាល់ជាមួយមន្ត្រីគោលនយោបាយការបរទេសកំពូលចិនលោក Wang Yi។
លោក Blinken បានមានប្រសាសន៍ថា «ខ្ញុំគិតថា ចិនយល់ពីអ្វីដែលជាហានិភ័យដែលខ្លួនបានធ្វើដើម្បីផ្តល់ការជួយឧបត្ថម្ភនេះដល់ប្រទេសរុស្ស៊ី»។
លោកបានបន្ថែមទៀតថា ប្រទេសជាច្រើននឹងគិតគូរដ៏ហ្មត់ចត់អំពីជំនួយយោធាបែបនេះពីប្រទេសចិនទៅឱ្យរុស្ស៊ី។
អ្នកនាំពាក្យក្រសួងការបរទេសចិនលោក Wang Wenbin បានថ្លែងនៅឯសន្និសីទកាសែតនៅថ្ងៃចន្ទនេះថា សហរដ្ឋអាមេរិកមិនមានតួនាទីដើម្បីធ្វើការដាក់សម្ពាធលើចិននោះទេ ហើយថា ទំនាក់ទំនងរបស់ចិនជាមួយរុស្ស៊ីផ្អែកលើការមិនចូលបក្សសម្ព័ន្ធ ការមិនប្រឈមមុខ និងការមិនវាយប្រហារលើភាគីទី៣។
លោក Wang Wenbin បាននិយាយទៀតថា «គឺសហរដ្ឋអាមេរិកទេ ដែលកំពុងដឹកជញ្ជូនអាវុធមិនឈប់ឈរទៅកាន់សមរភូមិក្នុងប្រទេសអ៊ុយក្រែន មិនមែនចិនឡើយ»។
ប្រធានគោលនយោបាយការបរទេសសហភាពអឺរ៉ុបលោក Joseph Borrell បានប្រាប់ពួកអ្នកយកព័ត៌មាននៅក្នុងទីក្រុងព្រុចសែលថា លោកក៏បានពិភាក្សាស្ថានភាពនេះជាមួយលោក Wang Yi ហើយក៏បានសុំឱ្យចិនកុំផ្តល់អាវុធទៅឱ្យរុស្ស៊ី។
លោក Borrell បាននិយាយទៀតថា «ជំនួយនឹងក្លាយជាបន្ទាត់ក្រហមនៅក្នុងទំនាក់ទំនងរបស់យើង»។
លោកបានថ្លែងមុនជំនួបរបស់រដ្ឋមន្ត្រីការបរទេសសហភាពអឺរ៉ុប ហើយបាននិយាយទៀតថា តម្រូវការជាបន្ទាន់របស់អ៊ុយក្រែនគឺគ្រាប់រំសេវ។ លោក Borrell បាននិយាយទៀតថា អស់លោករដ្ឋមន្ត្រីការបរទេសនឹងពិភាក្សា ថាតើការផ្តល់អាវុធឱ្យបានរហ័សថែមទៀតយ៉ាងដូចម្តេច ជាពិសេសគ្រាប់រំសេវទៅឱ្យកងទ័ពអ៊ុយក្រែននោះ៕
ព័ត៌មានខ្លះនៃសេចក្តីរាយការណ៍នេះត្រូវបានដកស្រង់ពីទីភ្នាក់ងារព័ត៌មាន AFP និង Reuters។