រដ្ឋបាលលោក Biden បានតាំងចិត្តនៅក្នុងខែចុងក្រោយរបស់ខ្លួន ដើម្បីជួយធានាថា អ៊ុយក្រែនអាចបន្តប្រយុទ្ធប្រឆាំងនឹងការឈ្លានពានរបស់រុស្ស៊ីនៅឆ្នាំក្រោយ ដោយបញ្ជូនជំនួយឱ្យបានច្រើនតាមតែអាចធ្វើទៅបាន ដើម្បីឱ្យអ៊ុយក្រែនអាចបន្តទប់ទល់កងកម្លាំងរុស្ស៊ី និងមានកម្លាំងរឹងមាំក្នុងការចរចាសន្តិភាពដែលអាចកើតមាននានា។ នេះបើតាមការបញ្ជាក់របស់រដ្ឋមន្ត្រីការបរទេសសហរដ្ឋអាមេរិក លោក Antony Blinken កាលពីថ្ងៃពុធ។
លោក Blinken បាននិយាយថា៖ «លោកប្រធានាធិបតី Biden បានប្ដេជ្ញាចិត្តដើម្បីធ្វើឱ្យប្រាកដថា រាល់ប្រាក់ដុល្លារដែលយើងនៅមាន នឹងត្រូវបានចំណាយទាំងអស់នៅចន្លោះពេលនេះដល់ថ្ងៃទី២០ ខែមករា» ជាពេលដែលប្រធានាធិបតីជាប់ឆ្នោតលោក Donald Trump នឹងត្រូវស្បថចូលកាន់តំណែង។
លោក Blinken បាននិយាយក្នុងអំឡុងដំណើរទស្សនកិច្ចទៅកាន់ទីក្រុងព្រុចសែល ប្រទេសបែលហ្ស៊ិកថា ប្រទេសជាសមាជិកអង្គការអូតង់ត្រូវតែផ្តោតលើកិច្ចខិតខំប្រឹងប្រែងរបស់ពួកគេលើ «ការធានាថាអ៊ុយក្រែនមានប្រាក់ គ្រាប់បែក និងកងកម្លាំងរួម ដើម្បីប្រយុទ្ធប្រកបដោយប្រសិទ្ធភាពក្នុងឆ្នាំ ២០២៥ ឬដើម្បីអាចចរចាសន្តិភាពដោយមានជំហររឹងមាំ»។
លោក Blinken បាននិយាយដោយមិនផ្តល់ព័ត៌មានលម្អិតថា សហរដ្ឋអាមេរិកនឹង «សម្របនិងកែសម្រួល» សម្ភារៈចុងក្រោយបំផុតដែលខ្លួនកំពុងផ្ញើទៅអ៊ុយក្រែន។
សង្គ្រាមដែលមានរយៈពេលជិតបីឆ្នាំនេះ មិនបង្ហាញសញ្ញានៃការរំសាយនោះទេ។
រុស្ស៊ីបានវាយប្រហាររដ្ឋធានីកៀវរបស់អ៊ុយក្រែន ដោយការរួមបញ្ចូលគ្នាយ៉ាងទំនើបនៃកាំជ្រួចនិងដ្រូនជាលើកដំបូងក្នុងរយៈពេល ៧៣ ថ្ងៃកាលពីថ្ងៃពុធ។ ព្រឹត្តិការណ៍នោះបានកើតឡើងមួយថ្ងៃ បន្ទាប់ពីមន្ទីរបញ្ចកោណបាននិយាយថា ភាគច្រើននៃកងទ័ពកូរ៉េខាងជើង ដែលបានបញ្ជូនទៅជួយដល់កិច្ចខិតខំប្រឹងប្រែងសង្រ្គាមរបស់រុស្ស៊ី កំពុងប្រយុទ្ធដើម្បីបណ្តេញកងទ័ពអ៊ុយក្រែនចេញពីទឹកដីរុស្ស៊ីនៅក្នុងតំបន់ព្រំដែន Kursk ។
អ៊ុយក្រែនក៏កំពុងប្រឹងប្រែងទប់ស្កាត់ការវាយលុករបស់រុស្ស៊ីរយៈពេលមួយខែនៅក្នុងតំបន់ Donetsk ភាគខាងកើត។
ភាពមិនប្រាកដប្រជាផ្នែកនយោបាយអំពីរបៀបដែលរដ្ឋបាលសហរដ្ឋអាមេរិកក្រោមការដឹកនាំរបស់លោក Trump នឹងផ្លាស់ប្តូរគោលនយោបាយរបស់ទីក្រុងវ៉ាស៊ីនតោនចំពោះសង្រ្គាមនេះ គឺជាកត្តាថ្មីដ៏សំខាន់នៅក្នុងជម្លោះនេះ។
ជំនួយយោធារបស់សហរដ្ឋអាមេរិកមានសារៈសំខាន់សម្រាប់អ៊ុយក្រែន ប៉ុន្តែលោក Trump បានផ្តល់សញ្ញាថា លោកមិនចង់បន្តផ្តល់ប្រាក់រាប់សិបពាន់លានដុល្លារដល់ទីក្រុងកៀវនោះទេ៕