ប្រធានាធិបតីសហរដ្ឋអាមេរិកលោកJoe Biden និងប្រធានាធិបតីរុស្សីលោកVladimir Putin បានចាប់ផ្តើមជំនួបកំពូលដែលបានរង់ចាំជាយូរមកហើយកាលពីថ្ងៃពុធនៅក្នុងទីក្រុងហ្សឺណែវ ប្រទេសស្វីស។ ទីក្រុងហ្សឺណែវត្រូវបានជ្រើសរើសធ្វើជាទីតាំងនៃកិច្ចប្រជុំកំពូលរវាងមេដឹកនាំទាំងពីររូបនេះ ដោយសារតែប្រវត្តិអព្យាក្រឹតខាងនយោបាយរបស់ខ្លួន។
នៅមុនជំនួបកំពូលចាប់ផ្តើមឡើង មេដឹកនាំទាំងពីររូប បានចាប់ដៃគ្នា នៅចំពោះមុខក្រុមអ្នកសារព័ត៌មានអាមេរិកនិងរុស្ស៊ី ដែលកំពុងប្រជ្រៀតរុញគ្នាទៅវិញទៅមកដើម្បីថតយករូបភាពនៃមេដឹកនាំទាំងពីរនេះ។
លោក Putin បានថ្លែងតាមរយៈអ្នកបកប្រែភាសាក្នុងជំនួបនោះថា៖ «ខ្ញុំសូមអរគុណលោកប្រធានាធិបតីដែលបានផ្តើមគំនិតឲ្យមានជំនួបកំពូលនៅថ្ងៃនេះ។ ខ្ញុំដឹងថាលោកបានធ្វើដំណើរក្នុងផ្លូវដ៏វែងមួយ។ ទំនាក់ទំនងរវាងរុស្សីនិងសហរដ្ឋអាមេរិក មានបញ្ហាជាច្រើន ដែលតម្រូវឲ្យមានដោះស្រាយតាមរយៈជំនួបកំពូលនេះហើយខ្ញុំសង្ឃឹមថា ជំនួបរបស់យើងនៅថ្ងៃនេះ នឹងទទួលបានលទ្ធផលល្អប្រសើរ»។
ជាការឆ្លើយតបវិញ ប្រធានាធិបតីអាមេរិកលោកBidenបាននិយាយថា៖ «ខ្ញុំសូមអរគុណ។ ដូចខ្ញុំបាននិយាយនៅខាងក្រៅមុននេះអញ្ចឹង ខ្ញុំគិតថា វាតែងតែជាការប្រសើរក្នុងការជួបទល់មុខគ្នាដោយផ្ទាល់នោះ»។
ភាគីទាំងពីរធ្លាប់បានលើកឡើងក្នុងពេលកន្លងមក ស្តីពីឱកាសនៃកិច្ចសហប្រតិបត្តិការរួមគ្នា ប៉ុន្តែមិនបានរំពឹងទុកនូវភាពប្រសើរណាមួយក្នុងទំនាក់ទំនងដែលមានភាពតានតឹងរវាងរដ្ឋាភិបាលក្រុងមូស្គូនិងរដ្ឋាភិបាលក្រុងវ៉ាស៊ីនតោននោះទេ។ ជំនួបកំពូលនេះ ត្រូវបានគេរំពឹងទុកថា នឹងមានការ មិនចុះសម្រុងគ្នាច្រើនជាងការឈានដល់ការព្រមព្រៀងសំខាន់ៗ។
មន្ត្រីជាន់ខ្ពស់អាមេរិកម្នាក់បានប្រាប់វីអូអេនិងក្រុមអ្នកយកព័ត៌មានផ្សេងៗទៀតនៅលើយន្តហោះប្រធានាធិបតី Air Force One ដែលកំពុងធ្វើដំណើរទៅកាន់ប្រទេសស្វីសថា «យើងមិនរំពឹងទុកថា នឹងទទួលបានលទ្ធផលធំដុំណាមួយពីជំនួបកំពូលនេះទេ»។
យន្តហោះរបស់ប្រធានាធិបតីរុស្សីបានចុះចតក្នុងទីក្រុងហ្សឺណែវ ហើយលោកPutin បានធ្វើដំណើរទៅដល់ទីកន្លែងសម្រាប់ជំនួបកំពូលនៅ Villa La Grange ប្រហែលជាម៉ោង១រសៀលម៉ោងក្នុងប្រទេសស្វីស។ ចំណែកលោក Biden បានទៅដល់ទីតាំងប្រជុំកំពូលនោះ នៅក្រោយលោកPutin បន្តិចដែលនេះជាគម្រោងការទូតមួយរបស់សេតវិមាន ក្នុងការជៀសវាងនូវអ្វីដែលកើតមានឡើងក្នុងជំនួបកំពូលកាលពីឆ្នាំ២០១៨ រវាងលោក Putin និងអតីតប្រធានាធិបតីអាមេរិកលោក Donald Trump ក្នុងទីក្រុង Helsinki ប្រទេសហ្វាំងឡង់ ដែលកាលនោះលោក Trump ត្រូវអង្គុយចាំលោក Putin ដែលមកយឺតរហូតដល់៣០នាទីឯណោះ។
លោកPutinនិងលោក Biden បានចាប់រលាក់ដៃគ្នានៅខាងក្រៅបន្ទប់ មុនពេលដើរចូលទៅក្នុងបន្ទប់ប្រជុំរួមគ្នា។
កិច្ចប្រជុំកំពូលនេះនឹងបញ្ចប់នូវដំណើរទស្សនកិច្ចទៅក្រៅប្រទេសជាលើកដំបូងរបស់លោកJoe Biden ចាប់តាំងពីលោកឡើងកាន់តំណែងជាប្រធានាធិបតីអាមេរិកមក។ ក្នុងសប្តាហ៍នេះ លោក Biden បានចូលរួមក្នុងកិច្ចប្រជុំក្រុមប្រទេសដែលមានសេដ្ឋកិច្ចជឿនលឿន ឬG-7 និងចូលរួមកិច្ចពិភាក្សាជាមួយអង្គការអូតង់ និងមេដឹកនាំសហភាពអឺរ៉ុប ដើម្បីជំរុញនូវទំនាក់ទំនងក្នុងចំណោមសម្ព័ន្ធមិត្តរបស់អាមេរិក និងពិភាក្សាជាមួយពួកគេស្តីពីកិច្ចប្រជុំកំពូលរវាងអាមេរិក និងរុស្ស៊ីនោះ។
ក្នុងបទសម្ភាសន៍មួយ ជាមួយទូរទស្សន៍NBC News លោក Putin និយាយថា៖ «ទំនាក់ទំនងរវាងរុស្ស៊ីនិងសហរដ្ឋអាមេរិក បានធ្លាក់ដល់ចំណុច «ដ៏ទាបបំផុតមួយ ក្នុងរយៈពេលប៉ុន្មានឆ្នាំថ្មីៗចុងក្រោយនេះ»៕