ប្រធានាធិបតីសហរដ្ឋអាមេរិកលោក Joe Biden បានផ្សព្វផ្សាយនូវផែនការមួយដែលលោកហៅថា ជាផែនការជាតិ «លើកដំបូងបង្អស់» ដើម្បីប្រយុទ្ធប្រឆាំងនឹងភេរវកម្មក្នុងប្រទេស។
នៅក្នុងសេចក្តីថ្លែងការណ៍មួយកាលពីថ្ងៃអង្គារម្សិលមិញ លោក Biden បានមានប្រសាសន៍ថា «យុទ្ធសាស្ត្រជាតិ ទប់ទល់នឹងភេរវកម្មក្នុងប្រទេស» នេះ មានគោលបំណងធ្វើឲ្យប្រសើរឡើងនូវការវិភាគរបស់រដ្ឋាភិបាល និងការចែករំលែកព័ត៌មានអំពីភេរវកម្មនៅក្នុងប្រទេសដល់ទីភ្នាក់ងារពង្រឹងច្បាប់នានានៅគ្រប់កម្រិតទាំងអស់។
លោក Biden បានបញ្ជាក់ថា ការរារាំងមិនឲ្យមានការជ្រើសរើសភេរវជន ក៏ដូចជាការរារាំងសមត្ថភាពរបស់ភេរវជននៅក្នុងការកៀរគរសមាជិក និងការបង្អាក់សកម្មភាពរបស់ពួកគេ ក៏ជាផ្នែកដ៏សំខាន់ផងដែរនៃយុទ្ធសាស្ត្រនេះ។
ផែនការនេះ ក៏មានគោលបំណងផងដែរនៅក្នុងការ «ផ្ដោតលើកត្តារួមចំណែកជាយូរមកហើយកន្លងមក» ដល់សកម្មភាពភេរវកម្មនៅក្នុងប្រទេសដូចជា «អំពើស្អប់គុំកួនជាតិសាសន៍ និងសាសនា» ជាដើម។
លោក Biden បានបញ្ជាក់នៅក្នុងសេចក្តីថ្លែងការណ៍នោះថា៖
«ភេរវកម្មក្នុងប្រទេស ដែលជំរុញឡើងដោយការស្អប់គុំកួន ការប្រកាន់គំនិតអត្តនោម័តិជ្រុល និងទម្រង់ផ្សេងៗទៀតនៃអំពើជ្រុលនិយម គឺជាស្លាកស្នាមប្រឡាក់ដួងព្រលឹងរបស់សហរដ្ឋអាមេរិក។ ភេរវកម្មក្នុងប្រទេស គឺផ្ទុយនឹងអ្វីៗទាំងអស់ដែលប្រទេសរបស់យើងខិតខំប្រឹងប្រែងសម្រេចឲ្យបាន ហើយវាបង្កជាការប្រឈមដោយផ្ទាល់ដល់សន្តិសុខជាតិ លទ្ធិប្រជាធិបតេយ្យ និងការឯកភាពជាតិរបស់យើង»៕
