ធនាគារកណ្តាលចក្រភពអង់គ្លេស (Bank of England) បានផ្អាកការបង្កើនការប្រាក់ជិតពីរឆ្នាំ ក្រោយពីអតិផរណានៅចក្រភពអង់គ្លេសបានចុះថយ នាំឱ្យមានការបន្ថយកង្វល់អំពីល្បឿននៃទំនិញឡើងថ្លៃ។
នៅក្នុងព្រឹត្តិការណ៍មួយកាលពីថ្ងៃព្រហស្បតិ៍ ទី២១ ខែកញ្ញា ដែលមានមនុស្សតិចតួចបានទស្សន៍ទាយកាលពីពីរថ្ងៃមុននេះ ធនាគារកណ្តាលអង់គ្លេសបានរក្សាទុកអត្រាការប្រាក់ឱ្យនៅដដែល គឺ៥,២៥%ដែលជាកម្រិតខ្ពស់បំផុតក្នុងរយៈពេល១៥ឆ្នាំ។ ការណ៍នេះបាននាំឱ្យមានការធូរចិត្តសម្រាប់ក្រុមម្ចាស់ផ្ទះរាប់លាននាក់ដែលប្រឈមនឹងអត្រាប្រាក់បង់រំលោះខ្ពស់បង់រាល់ខែសម្រាប់ទិញផ្ទះ។
សេចក្តីសម្រេចនេះមានការខ្វែងមតិគ្នា ដោយសមាជិក៤នាក់ក្នុងបណ្តាសមាជិក៩នាក់នៃគណៈកម្មាធិការគោលនយោបាយហិរញ្ញវត្ថុបានបោះឆ្នោតឱ្យមានការបង្កើនការប្រាក់។
ធនាគារកណ្តាលនៅជុំវិញពិភពលោកហាក់ដូចជាជិតបញ្ចប់ការបង្កើនការប្រាក់ដើម្បីបន្ធូរអតិផរណាបណ្តាលមកពីការចាកចេញពីវិបត្តិការរាតត្បាតជំងឺកូវីដ១៩និងសង្គ្រាមរុស្ស៊ីនៅក្នុងប្រទេសអ៊ុយក្រែន។ ធនាគារកណ្តាលសហរដ្ឋអាមេរិកបានរក្សាទុកអត្រាការប្រាក់ឱ្យនៅដដែលកាលពីថ្ងៃពុធ ទី២០ ខែកញ្ញា។
អ្វីដែលមានឥទ្ធិពលយ៉ាងជាក់ច្បាស់ទៅលើសេចក្តីសម្រេចរបស់ធនាគារកណ្តាលអាមេរិកគឺអតិផរណាបានចុះថយមកនៅត្រឹម៦,៧%កាលពីខែសីហា ដែលជាកម្រិតទាបបំផុតចាប់តាំងពីរុស្ស៊ីបានលុកលុយអ៊ុយក្រែនកាលពីខែកុម្ភៈឆ្នាំ២០២២។
តែយ៉ាងណាក៏ដោយ ក៏អតិផរណានៅតែខ្ពស់ជាងអត្រាទីដៅរបស់ធនាគារកណ្តាលនេះ ដែលនោះគឺ២% ហើយខ្ពស់ជាងអត្រានៅក្នុងប្រទេសឯទៀតនៃពួកប្រទេសមានសេដ្ឋកិច្ចធំជាងគេទាំង៧ក្នុងពិភពលោក។
អត្រាការប្រាក់ខ្ពស់ ដែលធ្វើឱ្យសេដ្ឋកិច្ចបន្ថយល្បឿនបន្តិចដោយធ្វើឱ្យការខ្ចីលុយថ្លៃជាងមុន បានរួមចំណែកក្នុងការធ្វើឱ្យអតិផរណាចុះថយនៅទូទាំងពិភពលោក។
ប៉ុន្តែសម្រាប់ម្ចាស់ផ្ទះអង់គ្លេសជាច្រើន នឹងមានការពិបាកច្រើនជាងមុន។ ខុសពីនៅសហរដ្ឋអាមេរិក ម្ចាស់ផ្ទះភាគច្រើននៅអង់គ្លេសអាចរក្សាទុកអត្រាការប្រាក់បង់រំលោះតែពីរបីឆ្នាំ ដូច្នេះក្រុមម្ចាស់ផ្ទះដែលមានកិច្ចសន្យាការប្រាក់ផុតពេលកំណត់ក្នុងពេលឆាប់ៗនេះ ដឹងថាពួកគេប្រឈមនឹងសោហ៊ុយខ្ចីប្រាក់ច្រើនជាងមុនដោយសារកំណើនអត្រាការប្រាក់ខ្លាំងកាលពីពីរបីឆ្នាំកន្លងទៅនេះ៕
ប្រែសម្រួលដោយលោក ឈឹម សុមេធ