ពីរដ្ឋធានីអាក្រា៖កាលពីថ្ងៃទី ២៣ ខែកញ្ញា បាតុកររាប់រយនាក់បានប្រមូលផ្ដុំគ្នានៅក្នុងរដ្ឋធានីអាក្រានៃប្រទេសហ្គាណាដើម្បីតវ៉ាប្រឆាំងនឹងរដ្ឋាភិបាលពាក់ព័ន្ធនឹងបញ្ហាធ្លាក់ចុះនៃសេដ្ឋកិច្ច។
បាតុកររាប់រយនាក់បានប្រមូលផ្ដុំគ្នានៅក្នុងរដ្ឋធានីអាក្រានៃប្រទេសហ្គាណាកាលពីថ្ងៃទី២៣ ខែកញ្ញា ដែលជាថ្ងៃទី ៣ នៃការតវ៉ាប្រឆាំងនឹងរដ្ឋាភិបាលពាក់ព័ន្ធនឹងបញ្ហាលំបាកផ្នែកសេដ្ឋកិច្ច។ ការតវ៉ានេះបានបណ្ដាលឱ្យមានការចាប់ខ្លួនមនុស្សរាប់សិបនាក់។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន Reuters។
ក្រុមបាតុករដែលអ្នកខ្លះគ្រវីបដាហើយអ្នកខ្លះទៀតគ្រវីទង់ជាតិហ្គាណា បានសម្ដែងការមិនពេញចិត្តចំពោះការចំណាយខ្ពស់សម្រាប់ជីវភាពប្រចាំថ្ងៃនិងកង្វះការងារនៅពេលដែលពួកគេបានដើរក្បួនតវ៉ានៅក្រោមការរឹតបន្តឹងសន្តិសុខរបស់ប៉ូលិសបង្ក្រាបកុបកម្ម។
ប្រទេសហ្គាណាដែលជាប្រទេសផលិតមាស ប្រេងឥន្ធនៈ និងកាកាវបានតតាំងនឹងវិបត្តិសេដ្ឋកិច្ចដ៏អាក្រក់បំផុតរបស់ខ្លួននៅក្នុងជំនាន់នេះដែលបង្កឡើងដោយបំណុលសាធារណៈកើនឡើង។
បាតុករពាក់មួកកន្តឹបពណ៌ក្រហមអាយុ២៤ ឆ្នាំលោក Romeo ដែលគ្មានការងារធ្វើដូចបាតុករដទៃទៀតដែរនៅក្នុងការតវ៉ានេះ បាននិយាយថា៖«ជាមធ្យម ពលរដ្ឋហ្គាណាម្នាក់មិនអាចរកប្រាក់ដើម្បីអាហារ៣ពេល [ក្នុងមួយថ្ងៃ]។ រដ្ឋាភិបាលមិនខ្វល់នោះទេ»។
ប៉ូលិសបានរារាំងផ្លូវដើម្បីបង្ការមិនឱ្យក្រុមបាតុកររុលចូលវិមាន Jubilee House របស់ប្រធានាធិបតី។ ក្រុម Democracy Hub ដែលជាអ្នករៀបចំបាតុកម្មនេះ បានសន្យាថានឹងចូលកាន់កាប់វិមានប្រធានាធិបតីនេះ។
កាលពីថ្ងៃទី ២១ ខែកញ្ញា ប៉ូលិសបាននិយាយថា មនុស្ស ៤៩ នាក់ត្រូវបានឃុំខ្លួនសម្រាប់ការជួបជុំខុសច្បាប់និងការរំលោភលើច្បាប់សណ្ដាប់ធ្នាប់សាធារណៈនៅថ្ងៃដំបូងនៃការតវ៉ារយៈពេល ៣ ថ្ងៃនេះ។ គេមិនឃើញមានសញ្ញានៃការចាប់ខ្លួនបន្ថែមណាមួយទៀតទេ ហើយស្ថានការណ៍ហាក់ដូចជាមានភាពស្ងប់ស្ងាត់កាលពីថ្ងៃទី ២៣ ខែកញ្ញា។
កាលពីឆ្នាំមុន ការតវ៉ាលើបញ្ហាតម្លៃទំនិញឡើងថ្លៃនិងបញ្ហាប្រឈមផ្នែកសេដ្ឋកិច្ចផ្សេងទៀតបានបណ្ដាលឱ្យមានការប៉ះទង្គិចគ្នាជាមួយនឹងប៉ូលិស។
រដ្ឋាភិបាលហ្គាណាបានចុះកិច្ចព្រមព្រៀងដែលមានទឹកប្រាក់៣ពាន់លានដុល្លារលើកម្មវិធីកម្ចីរយៈពេល៣ឆ្នាំជាមួយនឹងអង្គការមូលនិធិរូបិយវត្ថុអន្តរជាតិ (IMF) កាលពីខែឧសភា ប៉ុន្តែអ្នករិះគន់បាននិយាយថា អាជ្ញាធរមិនបានធ្វើអ្វីច្រើននោះទេដើម្បីជួយអ្នកដែលប្រឹងប្រែងយ៉ាងត្រដាបត្រដួសដើម្បីបំពេញតម្រូវការចាំបាច់ប្រចាំថ្ងៃរបស់ខ្លួននៅចំពេលដែលវិបត្តិសេដ្ឋកិច្ចធ្លាក់ចុះអូសបន្លាយដ៏យូរនេះ។
ការរីកចម្រើនសេដ្ឋកិច្ចត្រូវបានគេព្យាករណ៍ថានឹងធ្លាក់ចុះនៅត្រឹម ១,៥% នៅក្នុងឆ្នាំនេះពីកម្រិត ៣,១% នៅក្នុងឆ្នាំ ២០២២៕
ប្រែសម្រួលដោយ លោក ភី សុភាដា
