អ្នកវិទ្យាសាស្ត្រអូស្ត្រាលីនានាបាននិយាយថា ពួកគេរកឃើញភស្តុតាងថ្មីដែលបញ្ជាក់អំពីការសន្និដ្ឋានកាលពីលើកមុនរបស់ខ្លួនពាក់ព័ន្ធនឹងកន្លែងដែលយន្តហោះម៉ាឡេស៊ីមួយគ្រឿងអាចធ្លាក់ ដែលយន្តហោះនេះបានបាត់ខ្លួនដោយគ្មានតម្រុយទាល់តែសោះកាលពីជាង ៣ ឆ្នាំមុន។
របាយការណ៍ដែលចេញផ្សាយនៅថ្ងៃពុធនេះដោយអង្គការស្រាវជ្រាវវិទ្យាសាស្ត្រ និងឧស្សាហកម្មនៃរដ្ឋាភិបាលអូស្ត្រាលី (Commonwealth Scientific and Industrial Research Organization) បានធ្វើការសន្និដ្ឋានថា យន្តហោះ Malaysia Airlines Flight MH 370 បានធ្លាក់នៅក្នុងរង្វង់តំបន់មួយដែលមានទំហំ ២ ម៉ឺន ៥ ពាន់ គីឡូម៉ែត្រការ៉េ នៅក្នុងមហាសមុទ្រឥណ្ឌាចេញពីឆ្នេរសមុទ្រភាគខាងលិចប្រទេសអូស្ត្រាលី គឺស្ថិតនៅភាគឦសាននៃតំបន់ទំហំ ១ សែន ២ ម៉ឺន គីឡូម៉ែត្រការ៉េ ដែលជាតំបន់ដែលកាលពីលើកមុន ត្រូវបានគេជឿជាក់ថាជាកន្លែងធ្លាក់យន្តហោះនេះ។
អង្គការនេះបានធ្វើការសន្និដ្ឋានដូច្នេះដោយផ្អែកលើរូបថតមួយចំនួនដែលថតដោយផ្កាយរណបយោធារបស់បារាំង ដែលរូបថតទាំងនោះបង្ហាញពីបំណែកមួយចំនួនដែល «ប្រហែលជាធ្វើឡើងដោយមនុស្ស» អណ្ដែតនៅលើផ្ទៃទឹក។ ប៉ុន្តែ ការិយាល័យសុវត្ថិភាពនៃការដឹកជញ្ជូនរបស់ប្រទេសអូស្ត្រាលី (Australian Transport Safety Bureau) ដែលដឹកនាំការរុករកយន្តហោះ Malaysia Airlines MH 370 នេះ បានចេញនូវសេចក្ដីប្រកាសមួយដោយលើកឡើងថា ការរកឃើញរបស់អង្គការស្រាវជ្រាវវិទ្យាសាស្ត្រ និងឧស្សាហកម្មនៃរដ្ឋាភិបាលអូស្ត្រាលីនេះ គឺមិនមែនជាភស្តុតាងដែលបង្ហាញអំពីបំណែករបស់យន្តហោះនេះ នោះទេ។
ប្រតិបត្តិការស្រាវជ្រាវ និងរុករករួមគ្នា ដែលធ្វើឡើងដោយប្រទេសអូស្ត្រាលី ចិន និងម៉ាឡេស៊ី ត្រូវបានលុបចោលកាលពីខែមករាកន្លងទៅនេះ បន្ទាប់ពីមិនទទួលបានលទ្ធផលអ្វីជាផ្លែផ្កាក្នុងរយៈពេលពីរឆ្នាំកន្លងមក។ ប្រទេសទាំង ៣ បានបញ្ជាក់ថា ពួកគេនឹងធ្វើការរុករកឡើងវិញ ប្រសិនបើមានភស្តុតាងជាក់លាក់ណាដែលបង្ហាញអំពីទីកន្លែងដែលយន្តហោះនេះធ្លាក់។ ក្រុមហ៊ុនឯកជនមួយបានបញ្ជាក់ថា នឹងជួយស្វែងរកយន្តហោះនេះឡើងវិញដោយមិនគិតថ្លៃ ហើយថា ខ្លួននឹងយកថ្លៃសេវាស្វែងរកយន្តហោះនេះ ក្នុងករណីដែលខ្លួនបានរកឃើញយន្តហោះនេះតែប៉ុណ្ណោះ។
យន្តហោះ Malayisa Airlines Flight MH 370 បានបាត់ខ្លួនកាលពីថ្ងៃទី ៨ ខែមីនា ឆ្នាំ ២០១៤ ក្នុងអំឡុងពេលហោះហើរពីទីក្រុងកូឡាឡាំពួរ ប្រទេសម៉ាឡេស៊ី ទៅកាន់ទីក្រុងប៉េកាំង ប្រទេសចិន ដោយមានអ្នកធ្វើដំណើរ និងក្រុមអាកាសយានិកសរុបចំនួន ២៣៩ នាក់ នៅលើយន្តហោះ៕