កាលពីថ្ងៃទី៦កក្កដា លោកស្រី Penny Wong រដ្ឋមន្ត្រីការបរទេសអូស្ត្រាលីបានអំពាវនាវដល់ប្រទេសចិនឱ្យប្រើឥទ្ធិពលខ្លួនលើរុស្ស៊ីដើម្បីបញ្ឈប់សង្គ្រាមនៅអ៊ុយក្រែន។
នៅក្នុងសុន្ទរកថាសំខាន់មួយនៅវិទ្យាស្ថានអន្តរជាតិខាងការសិក្សាយុទ្ធសាស្ត្រក្នុងប្រទេសសិង្ហបូរីនាសប្តាហ៍ទីមួយនៃខែកក្កដា រដ្ឋមន្ត្រីការបរទេសអូស្ត្រាលីលោកស្រី Penny Wong បានមានប្រសាសន៍ថាពួកប្រទេសធំៗដែលមាន«ឥទ្ធិពល»លើរុស្ស៊ីគួរប្រើឥទ្ធិពលនេះដើម្បីបញ្ឈប់សង្គ្រាមនៅអ៊ុយក្រែន។
លោកស្រីបាននិយាយថាការលុកលុយនេះ «គ្មានការបង្ករឿងទេ» ដោយលោកស្រីបានបន្ថែមថាសង្គ្រាមនេះជាការមិនត្រឹមត្រូវតាមច្បាប់ទេ វាជាអំពើអសីលធម៌និងអមនុស្សធម៌ផងដែរ។
លោកស្រីបានសុំដល់ប្រទេសចិនឱ្យប្រើទំនាក់ទំនងជិតស្និទ្ធរបស់ខ្លួនជាមួយរដ្ឋាភិបាលក្រុងម៉ូស្គូដើម្បីបញ្ឈប់ការវាយលុកលើប្រទេសអ៊ុយក្រែន។
អូស្ត្រាលីបានដាក់ទណ្ឌកម្មលើពួកមន្ត្រីរុស្ស៊ី ដោយមានរួមបញ្ចូលពួកអ្នកនយោបាយនិងពួកសមាជិកកងយោធាផងដែរ។
ចិនមិនបានថ្កោលទោសការលុកលុយរបស់រុស្ស៊ីទេ ហើយពួកអ្នកវិភាគមានជំនឿថាចិនបានបង្ហាញការគាំទ្រដល់អំពើឈ្លានពានរបស់រុស្ស៊ី។
លោកស្រី Wong បាននិយាយជាថ្មីអំពីអត្ថាធិប្បាយកាលពីពេលថ្មីៗនេះដោយនាយករដ្ឋមន្ត្រីសិង្ហបូរីលោក Lee Hsien Loong នៅពេលលោកអំពាវនាវដល់ប្រទេសចិនឱ្យជួយបញ្ចប់សង្គ្រាមនៅអ៊ុយក្រែន។ លោកស្រី ថ្លែងថា៖ «ដើម្បីបណ្តុះបណ្តាលឥទ្ធិពលអន្តរជាតិរបស់ខ្លួនឱ្យហួសពីកម្លាំងយោធាចិនគួរប្រើកម្លាំងនេះដោយមានការទប់ចិត្តនិងភាពត្រឹមត្រូវតាមច្បាប់។ នៅពេលនេះ តំបន់នេះនិងពិភពលោកកំពុងមើលសកម្មភាពរបស់រដ្ឋាផិបាលក្រុងប៉េកាំងក្នុងទំនាក់ទំនងជាមួយប្រទេសអ៊ុយក្រែន»។
លោកស្រី Wong ក៏បាននិយាយប្រាប់ពួកអ្នកកាសែតនៅសិង្ហបូរីថារដ្ឋបាលថ្មីនិយមនយោបាយកណ្តាល-ខាងឆ្វេងនៃប្រទេសអូស្ត្រាលីបានសន្យាដល់ពួកដៃគូក្នុងតំបន់អំពីសកម្មភាពធំៗជាងមុនសម្រាប់ប្រយុទ្ធប្រឆាំងការប្រែប្រួលអាកាសធាតុ។ លោកស្រីបានថ្លែងបន្តទៀតថា៖ «រដ្ឋាភិបាលអូស្ត្រាលីថ្មីបានត្រូវជាប់ឆ្នោតជាមួយមហិច្ឆតាធំជាងមុនអំពីការប្រែប្រួលធាតុអាកាស។ យើងហ្មត់ចត់អំពីការណ៍នេះ ហើយជាការមានសារៈសំខាន់យើងមានទស្សនៈដូចគ្នាជាមួយសិង្ហបូរីដោយយើងយល់ឃើញថានេះជាឱកាសសេដ្ឋកិច្ចធំមួយសម្រាប់ប្រទេសយើងទាំងពីរផងដែរ»។
សុន្ទរកថារបស់លោកស្រី Wong គូសបញ្ជាក់ការប្តេជ្ញារបស់អូស្ត្រាលីដល់សន្តិភាពនិងភាពសំបូររុងរឿងក្នុងអាស៊ីអាគ្នេយ៍។
អ្នកស្រី Susannah Patton ជាអ្នកវិភាគនៅវិទ្យាស្ថាន Lowy ដែលជាក្រុមស្រាវជ្រាវមួយមានមូលដ្ឋាននៅក្រុង Sydney។ អ្នកស្រីបាននិយាយប្រាប់វិទ្យុនិងទូរទស្សន៍ Australian Broadcasting Corp ថាសុន្ទកថានេះក៏មានគោលដៅរកវីធីរួមគ្នាមួយអំពីទំនាក់ទំនងតំបន់ជាមួយប្រទេសចិនផងដែរ។ អ្នកស្រីបានថ្លែងថា៖ «ខ្ញុំយល់ថាសុន្ទរកថានេះជាការប៉ុនប៉ងមួយដោយលោកស្រី Penny Wong ក្នុងការចាត់ចែងជាថ្មីទំនាក់ទំនងរបស់អូស្ត្រាលីមួយអាស៊ីអាគ្នេយ៍ក្នុងវិធីវិជ្ជមានជាងមុននិងធ្វើឱ្យដឹងអំពីផលប្រយោជន៍ដូចគ្នា ទោះជាអូស្ត្រាលីនិងអាស៊ីអាគ្នេយ៍មានការយល់ឃើញមិនដូចគ្នាអំពីប្រទេសចិនក៏ដោយ»។
ទំនាក់ទំនងរបស់អូស្ត្រាលីជាមួយចិនបានធ្លាក់ដល់កម្រិតទាបកាលពីប៉ុន្មានឆ្នាំថ្មីៗនេះ។ មានការខ្វែងគំនិតគ្នាអំពីសិទ្ធិមនុស្ស លទ្ធិប្រជាធិបតេយ្យនៅហុងកុងនិងមហិច្ឆតាដែនដីរបស់រដ្ឋាភិបាលប៉េកាំងក្នុងសមុទ្រចិនខាងត្បូង។ មានការរកាំចិត្តគ្នាក្នុងឆ្នាំនេះដោយសារការប៉ុនប៉ងរបស់ចិនពង្រីករបៀបវារៈពាណិជ្ជកម្មនិងសន្តិសុខរបស់ខ្លួនក្នុងមហាសមុទ្រប៉ាស៊ិហ្វិក។
រដ្ឋាភិបាលគណបក្សពលករអូស្ត្រាលីចង់លះបង់ចោលគោលនយោបាយកណ្តាល-ខាងស្តាំរបស់រដ្ឋបាលមុនដែលជាញឹកញយមានអរិភាពជាមួយចិន។
លោកស្រី Wong បានសន្យាអំពីរបៀបដោះស្រាយមានការពិចារណាជាងមុន។ របាយការណ៍បាននិយាយថាលោកស្រីអាចជួបជាមួយសមភាគីចិនរបស់លោកស្រីគឺលោករដ្ឋមន្ត្រីការបរទេស Wang Yi នៅខាងក្រៅសន្និសីទកំពូលក្រុមប្រទេស G-20 ក្នុងកោះបាលី ប្រទេសឥណ្ឌូណេស៊ី៕
ប្រែសម្រួលដោយលោក ឈឹម សុមេធ