នៅពេលដែលសេវាកម្មគ្រាមានអាសន្នតស៊ូដើម្បីពន្លត់ការឆេះព្រៃប្រកបដោយមហន្តរាយនៅរដ្ឋ Queensland ហើយនិងបោសសម្អាតបន្ទាប់ពីព្យុះស៊ីក្លូននៅរដ្ឋ New South Wales ការស្រាវជ្រាវលើកដំបូងរបស់ពិភពលោកនៅប្រទេសអូស្ត្រាលីបានបង្ហាញថា មានបញ្ហាសុខភាពផ្លូវចិត្តយ៉ាងខ្លាំងរបស់ពួកអ្នកឆ្លើយតបលើកដំបូង។
ការសា្រវជ្រាវនោះបានរកឃើញកម្រិតទុក្ខព្រួយខាងផ្លូវចិត្តខ្លាំងក្នុងចំណោមមន្រ្តីប៉ូលិស និងបុគ្គលិកជួយសង្រ្គោះគ្រាអាសន្នដទៃទៀត ដោយមួយភាគបួននៃអ្នកឆ្លើយតបដំបូងដែលបានចូលនិវត្តន៍ បានរាយការណ៍ពីបទពិសោធន៍នៃជំងឺបាក់ស្បាត។
យន្តហោះដឹកអ្នកដំណើរកែច្នៃមួយគ្រឿងម៉ាក្ស Boeing 747 បានទម្លាក់ទឹកចំនួន១ម៉ឺន៥ពាន់លីត្រលើអគ្គិភ័យនៅក្បែរទីក្រុង Mackay នៃរដ្ឋ Queensland។
នៅទូទាំងរដ្ឋ ក្រុមសង្គ្រោះបន្ទាន់បានតស៊ូដើម្បីពន្លត់ការឆេះព្រៃជាង១០០កន្លែង។
នៅភាគខាងត្បូងឆ្ងាយ ទីក្រុងស៊ីដនីដែលជាទីក្រុងដ៏ធំបង្អស់របស់អូស្ត្រាលីបានជួបប្រទះព្យុះកាលពីថ្ងៃពុធដែលមានម្តងក្នុងរយៈពេល១០០ឆ្នាំ។ អ្នកស្ម័គ្រចិត្តគ្រាអាសន្នម្នាក់បានស្លាប់នៅក្នុងប្រតិបត្តិការបោសសម្អាតដ៏ធំមួយ។
លោក Greg Murphy មកពីសេវាកម្មសង្គ្រោះបន្ទាន់នៃរដ្ឋ New South Wales បានថ្លែងថា៖ «ខ្ញុំអាចបញ្ជាក់ថា មនុស្សម្នាក់ក្នុងចំណោមសមាជិករបស់យើងគឺសមាជិកម្នាក់ នៃសេវាកម្មសង្គ្រោះបន្ទាន់ បានដួលសន្លប់ ហើយស្លាប់នៅថ្ងៃនេះនៅពេលបំពេញការងារជួយសង្រ្គោះ។ សមានចិត្តរបស់យើងស្ថិតនៅជាមួយក្រុមគ្រួសារនិងសហការីទាំងអស់របស់យើងដែលមានអារម្មណ៍រងការប៉ះពាល់ពីព្រឹត្តិការដ៏ក្រៀមក្រំនេះ»។
ការស្រាវជ្រាវលើកដំបូងនៅក្នុងប្រទេសអូស្ត្រាលីបានពណ៌នារូបភាពលម្អិតនៃសុខ ភាពផ្លូវចិត្តរបស់មន្ត្រីប៉ូលិសកាលពីអតីតកាល និងបច្ចុប្បន្ន ហើយនិងបុគ្គលិកសេវាកម្មសង្គ្រោះបន្ទាន់ផ្សេងៗទៀត។ អង្គការសប្បុរសធម៌ Beyond Blue បានធ្វើការស្ទង់មតិមនុស្ស២ម៉ឺន១ពាន់នាក់។
ការស្ទង់មតិនោះ បានរកឃើញថា អ្នកដែលស្ថិតនៅជួរមុខនៃគ្រោះមហន្តរាយធម្មជាតិ គ្រោះថ្នាក់ និងឧក្រិដ្ឋកម្មផ្សេងៗមានហានិភ័យខ្ពស់ក្នុងការធ្វើឲ្យមានបញ្ហាសុខ ភាពផ្លូវចិត្តដែលទាក់ទិននឹងព្រឹត្តិការណ៍តក់ស្លុតក៏ដូចជាកន្លែងធ្វើការមិនល្អ។
លោក Steve McDowell អតីតអ្នកជំនួយការគ្រូពេទ្យហើយបានបង្កើតក្រុមជួយមួយដែលមានឈ្មោះថា No More Neglect ដើម្បីផ្តល់ឱវាទដល់អ្នកដែលមានជំងឺតានតឹងក្នុងចិត្ត។ លោក Steve McDowell ថ្លែងថា៖ «ខ្ញុំមានជំងឺបាក់ស្បាតមកពីកន្លែងធ្វើការរបស់ខ្ញុំ ហើយដោយសារបទពិសោធន៍នេះ ខ្ញុំបានបង្កើតក្រុមគាំទ្រមួយនៅឆ្នាំ ២០១៥។ ក្រុមនោះជួយមនុស្សដែលមានបញ្ហាផ្លូវចិត្តដែលជាអ្នកឆ្លើយតបដំបូង។បទពិសោធន៍ជាច្រើនទាក់ទិននឹងការសម្លុតធ្វើបាបនៅកន្លែងធ្វើការ កង្វះការគាំទ្រនៅកន្លែងធ្វើការនិងការមានអារម្មណ៍ឯកោ»។
ការស្ទង់មតិនោះ បានរកឃើញថា បុគ្គលិកសង្គ្រោះបន្ទាន់នៅប្រទេសអូស្រ្តាលីមានប្រហែល២ដងទំនងជាទទួលរង្គ្រោះ ជំងឺផ្លូវចិត្តឬត្រូវបានគេធ្វើរោគវិនិច្ឆ័យមានជំងឺផ្លូវចិត្តច្រើនជាងមនុស្សធម្មតា។
ការស្រាវជ្រាវនេះ នឹងត្រូវបានប្រើជាគម្រោងសម្រាប់ប៉ូលិសក៏ដូចជាសេវាកម្មរថយន្តពេទ្យនិងអគ្គិភ័យដើម្បីជួយដល់បុគ្គលិកនិងអ្នកស្ម័គ្រចិត្តដោះស្រាយឲ្យបានប្រសើរឡើងនូវបញ្ហាប្រឈមនិងការងារដែលគ្រោះថ្នាក់បំផុតនៅក្នុងប្រទេសអូស្ត្រាលី៕
ប្រែសម្រួលដោយហេង រស្មី