កាលពីថ្ងៃអាទិត្យម្សិលមិញ អាជ្ញាធរនៅក្នុងរដ្ឋ California សហរដ្ឋអាមេរិក អាចបញ្ជាក់បានថា មនុស្សជិត ៣ រយនាក់ទៀតមានសុវត្ថិភាព បន្ទាប់ពីមានភ្លើងឆេះព្រៃដ៏ប្រល័យនៅក្នុងប្រវត្តិសាស្ត្ររបស់រដ្ឋនេះបានកើតឡើងមក។
ប៉ុន្តែ ជាងមួយសប្ដាហ៍ក្រោយមក បន្ទាប់ពីភ្លើងឆេះព្រៃ Camp Fire បានចាប់ផ្ដើមនៅក្នុងក្រុង Paradise មនុស្សជិត ១ ពាន់នាក់នៅតែបាត់ខ្លួននៅឡើយ ស្របពេលដែលក្រុមអ្នកជួយសង្គ្រោះនៅតែព្យាយាមរុករកអ្នកដែលបាត់ខ្លួនតាមកម្ទេចផ្ទះផ្សេងៗដែលត្រូវបានឆេះបំផ្លាញ។
ចំនួនអ្នកស្លាប់ផ្លូវការដោយសារភ្លើងឆេះព្រៃនេះបានកើនដល់ ៧៧ នាក់ហើយកាលពីថ្ងៃអាទិត្យម្សិលមិញ។ កន្លងមក ការិយាល័យប៉ូលិសស្រុក Butte បានបញ្ជាក់ថា អាជ្ញាធរបានកំណត់អត្តសញ្ញាណអ្នកស្លាប់បាន ៦៧ នាក់ហើយក្នុងចំណោមនោះ។
អ្នកពន្លត់អគ្គិភ័យបានពន្លត់ភ្លើងឆេះព្រៃនេះបាន ៦៥ ភាគរយហើយ។
អភិបាលរដ្ឋ California លោក Jerry Brown បានបង្ហាញសុទិដ្ឋិនិយមកាលពីថ្ងៃអាទិត្យម្សិលមិញថា លោកប្រធានាធិបតី Donald Trump នឹងផ្ដល់ថវិកាសហព័ន្ធជួយដល់រដ្ឋ California។
លោក Jerry Brown និយាយដូច្នេះថា៖ «លោកប្រធានាធិបតី Trump មិនត្រឹមតែបានចុះហត្ថលេខាលើសេចក្ដីសម្រេចប្រកាសប្រធានាធិបតីផ្ដល់ថវិកាជួយដល់រដ្ឋ California ប៉ុណ្ណោះទេ ប៉ុន្តែលោកថែមទាំងបាននិយាយ និងសន្យាជាពិសេសថានឹងបន្តជួយរដ្ឋ California»។
កាលពីថ្ងៃសៅរ៍ លោក Trump បានទៅពិនិត្យមើលការបំផ្លិចបំផ្លាញដោយសារភ្លើងឆេះព្រៃនេះ៕
