អង្គការឃ្លាំមើលសិទ្ធិមនុស្សក្នុងប្រទេសស៊ីរី Syrian Observatory for Human Rights ដែលមានមូលដ្ឋានក្នុងប្រទេសអង់គ្លេសបាននិយាយថា កងយន្តហោះចម្បាំងរបស់រុស្ស៊ីនិងរបស់រដ្ឋាភិបាលស៊ីរីបានធ្វើការវាយប្រហារនៅក្នុងក្រុងមួយនាប៉ែកខាងកើតនៃប្រទេសស៊ីរីបណ្តាលឱ្យមនុស្សយ៉ាងតិចណាស់៤៥នាក់ស្លាប់ដោយមានរួមបញ្ចូលទាំងកុមារផងដែរ។
អង្គការនេះដែលឃ្លាំមើលស្ថានការណ៍ក្នុងប្រទេសស៊ីរីបាននិយាយថាការ វាយប្រហារនេះបានត្រូវចំក្រុង Qourieh ក្នុងខេត្ត Deir el-Zour ដែលនៅជាប់ព្រំដែនប្រទេសអ៊ីរ៉ាក់ ហើយដែលតំបន់ភាគច្រើនបានត្រូវត្រួតត្រាដោយពួកជនសកម្មប្រយុទ្ធរដ្ឋឥស្លាម។
នៅពេលជាមួយគ្នានេះ កងកម្លាំងប្រជាធិបតេយ្យស៊ីរីហៅកាត់ថា SDF ដែលជាក្រុមចម្រុះមួយនៃកងកម្លាំង Kurde និងអារ៉ាប់គាំទ្រដោយការវាយប្រហារតាមអាកាសដោយក្រុមចម្រុះដឹកនាំដោយស.រ.អា. បានប៉ះទង្គិចជាមួយពួករដ្ឋ ឥស្លាម នៅក្នុងក្រុង Manbij ដែលជាសំបុកសំខាន់មួយរបស់ពួកជ្រុលនិយមនេះ។
កងកម្លាំង SDF បានជម្រុលទៅមុខចូលក្នុងក្រុងនេះពីជាយក្រុងខាងត្បូងក្រោយពីបានត្រួតត្រាមជ្ឈមណ្ឌលជង្រុកស្រូវសាឡីមួយកន្លែងនៅជាយក្រុងនេះ។
ក្រុង Manbij ជាកន្លែងឈប់សំចតសំខាន់មួយសម្រាប់ទទួលការផ្គត់ផ្គង់សម្រាប់ពួកជនសកម្មប្រយុទ្ធរដ្ឋឥស្លាម នៅក្នុងតំបន់ខាងជើងនៃប្រទេសស៊ីរីដែលពួកគេត្រួតត្រា។ ពួកសកម្មជនក្នុងមូលដ្ឋានបាននិយាយថា ការបាត់បង់ក្រុងនេះជាដំណើរថយក្រោយធ្ងន់ធ្ងរមួយសម្រាប់ពួកភេរវជននេះ។
ក្រុមជនអំបូរ Kurde រាប់រយនាក់ទទួលរងការបាញ់ប្រហារនៅក្នុងប៉ែកខាងជើងនៃប្រទេសស៊ីរី ហើយជនមួយចំនួនបានស្លាប់និងត្រូវរបួសនៅពេលខិតខំប្រឹងប្រែងរត់គេចខ្លួនចេញពីការបាញ់តគ្នារវាងកងកម្លាំងជាគូបដិបក្ខ។
ការនាំគ្នារត់ចេញទាំងក្រុមនេះបានចាប់ផ្តើមមានឡើងនៅក្រោយពួករដ្ឋឥស្លាម បានចាប់ពង្រត់ជនស៊ីវិល Kurde ប្រមាណ៩០០នាក់នៅក្នុងខេត្ត Aleppo កាលពីបីសប្តាហ៍មុននេះ។ ជនខ្លះទៀតបានខិតខំព្យាយាមរត់គេចខ្លួនចេញពីក្រុង Manbij ដែលត្រូវឡោមព័ទ្ធដោយពួកយុទ្ធជននៃកងកម្លាំង SDF ដែលគាំទ្រដោយក្រុមចម្រុះដឹកនាំដោយស.រ.អា.៕