ប្លុកដែលមានអ្នកនិពន្ធអានាមិកបានក្លាយជាប្រភពដ៏មានប្រជាប្រីយភាពមួយសម្រាប់ព័ត៌មានសម្ងាត់ស្តីពីនយោបាយវៀតណាម។
ប្លុកឈ្មោះ Portrait Power ឬ Chan Dung Quyen Luc បានចេញផ្សាយឯកសារនិងរូបថតដែលចោទប្រកាន់ពីការពុករលួយយ៉ាងខ្លាំងក្នុងចំណោមសមាជិកខ្លះរបស់គណៈរដ្ឋមន្ត្រីហើយនិងសាច់ញាតិរបស់ពួកគេ។ ប្លុកនោះបានទាក់ទាញការចូលមើលចំនួន១៤លានដងចាប់តាំងពីប្លុកនោះបានចាប់ផ្តើមបង្ហោះកាលពីមួយខែមុន។
លោក Pham Chi Dung ប្រធានក្រុមអ្នកយកព័ត៌មានឯករាជ្យ បានប្រាប់វីអូអេ ផ្សាយជាភាសាវៀតណាមថា សាធារណជនមានការចង់ដឹងថាតើនរណាស្ថិតនៅពីខាងក្រោយប្លុកនោះដែលលោកគិតថា កំពុងធ្វើឲ្យកក្រើកដល់អ្នកនយោបាយ។
លោកនិយាយថា ភាពច្របូកច្របល់លើបញ្ហាថាតើនរណាជាម្ចាស់ប្លុកដែលចុះផ្សាយព័ត៌មានផ្តាច់មុខនិងព័ត៌មានដែលគួរឲ្យទុកចិត្តនឹងនាំឲ្យមានការសង្ស័យនៅក្នុងចំណោមសមាជិកគណបក្សដែលកំពុងប៉ះពាល់សាមគ្គីភាពរបស់គណបក្ស ជាពិសេសចាប់តាំងពីមានសេចក្តីរាយការណ៍ពីការឈ្លោះគ្នានៅក្នុងគណបក្សមក។
ដោយបណ្តាញព័ត៌មានស្ថិតនៅក្រោមការឃ្លាំមើលពីរដ្ឋ លោក Huynh Ngoc Chenh អ្នកសរសេរប្លុក និងជាអតីតអ្នកកាសែត Thanh Nien ចាត់ចែងដោយរដ្ឋនិយាយថា ប្រជាពលរដ្ឋវៀតណាម កំពុងងាកទៅបណ្តាញព័ត៌មានសង្គមនៅក្នុងការស្វែងរកព័ត៌មានដែលមានគ្មានប្រភពច្បាស់លាស់។ ព័ត៌មានទាំងនោះមិនត្រូវបានរាយការណ៍នៅក្នុងប្រព័ន្ធព័ត៌មានសំខាន់ៗ។
លោក Huynh Ngoc Chenh និយាយថា បណ្តាញផ្សាយព័ត៌មានវៀតណាមជាឧបករណ៍ឃោសនាស្ថិតនៅក្រោមការត្រួតត្រារបស់គណបក្ស។ ដោយហេតុនេះហើយ ប្លុក Portrait Power បានធ្វើឲ្យចាប់អារម្មណ៍ដល់ក្រុមអ្នកអានដោយមានព័ត៌មានដែលក្លាយជាការដែលអាចទុកចិត្តបានហើយត្រឹមត្រូវ កំពុងមានចរាចរណ៍យ៉ាងខ្លាំងនៅក្នុងប្លុកក្នុងរយៈពេលដ៏ខ្លី៕