បណ្តាញផ្សាយព័ត៌មានរដ្ឋរបស់កូរ៉េខាងជើង និងចិនបានបញ្ជាក់កាលពីថ្ងៃពុធថា មេដឹកនាំកូរ៉េខាងជើង គីម ជុងអ៊ុន បានទៅបំពេញទស្សនកិច្ចប្រទេសចិន នៅសប្តាហ៍នេះ។
សេចក្តីរាយការណ៍ទាំងនោះបានបញ្ជាក់ពីការសន្និដ្ឋានមុនថា គីម ជុងអ៊ុន បានធ្វើដំណើរបំពេញទស្សនកិច្ចនោះ បន្ទាប់ពីរទេះភ្លើងពិសេសមួយខ្សែមកពីកូរ៉េខាងជើងបានឆ្លងចូលក្នុងប្រទេសចិន។ គីម ជុងអ៊ុន បានជួបជាមួយប្រធានាធិបតីចិន លោក ស៊ី ជីនពីង មុនពេលជំនួបនៅពេលខាងមុខជាមួយប្រធានាធិបតីកូរ៉េខាងត្បូងនិងសហរដ្ឋអាមេរិកស្តីពីការធ្វើឲ្យឧបទ្វីបកូរ៉េគ្មានអាវុធនុយក្លេអ៊ែរ។
ស្ថានីយរទេះភ្លើងកណ្តាលក្រុងប៉េកាំងមានការរឹតបន្តឹងសន្តិសុខបន្ទាប់ពីមានសេចក្តីរាយការណ៍ពីការមកដល់របស់រទេះភ្លើងពិសេសមួយខ្សែមកពីទីក្រុងព្យុងយ៉ាង។ក្បួនរថយន្តផ្លូវការបានត្រូវគេឃើញចាកចេញពីស្ថានីយរទេះភ្លើង។ ឆ្មាំការពារសន្តិសុខនិងរបងក៏ត្រូវបានដាក់ពង្រាយឡោមព័ទ្ធជុំវិញតំបន់មួយនៃទីក្រុងប៉េកាំងដែលជាកន្លែងរស់នៅរបស់មន្រ្តីជាន់ខ្ពស់របស់ចិននិងផ្ទះសំណាក់ដែលនៅទីនោះជនជាតិកូរ៉េខាងជើងល្បីៗបានស្នាក់នៅកាលពីអតីតកាល។
ដំណើរទស្សនកិច្ចលើកទីមួយរបស់គីម ជុងអ៊ុនទៅកាន់ប្រទេសចិនបានកើតមានឡើងមុនជំនួបដែលបានគ្រោងទុករបស់លោកជាមួយមេដឹកនាំកូរ៉េខាងត្បូងហើយនឹងលទ្ធភាពនៃជំនួបជាមួយលោកប្រធានាធិបតីអាមេរិក ដូណាល់ ត្រាំដើម្បីពិភាក្សាលប់បំបាត់អាវុធនុយក្លែអ៊ែរបស់កូរ៉េខាងជើង។
លោក Steve Chung នៃសាកលវិទ្យាល័យចិនហុងកុងបាននិយាយថា៖ «កូរ៉េខាងជើងនឹងមិនសុខចិត្ត១រយភាគរយទេនៅក្នុងការចរចាជាមួយសហរដ្ឋ អាមេរិក ដូច្នេះ ពួកគេត្រូវការការធានាខាងសន្តិសុខខ្លះពីភាគីក្រុងប៉េកាំង។ដូច្នេះ ការណ៍នេះមានសារៈសំខាន់បំផុតដែលគេមានការពិភាក្សាជាមុនជាមួយ រដ្ឋាភិបាលក្រុងប៉េកាំងដើម្បីបញ្ជាក់ពីអ្វីដែលរដ្ឋាភិបាលក្រុងប៉េកាំងអាចផ្តល់ឲ្យ កូរ៉េខាងជើង មុនពេលពួកគេចរចាជាមួយសហរដ្ឋអាមេរិក»។
ចិនជាសម្ព័ន្ធមិត្តដ៏ជិតស្និទ្ធបំផុតនិងជាអ្នកផ្តល់ការជួយឧបត្ថម្ភដល់ប្រទេសកូរ៉េខាងជើង។ក៏ប៉ុន្តែ ការសាកល្បងអាវុធនុយក្លែអ៊ែនិងកាំជ្រួចមីស៊ីលរបស់រដ្ឋាភិ បាលក្រុងព្យុងយ៉ាងក្នុងប៉ុន្មានឆ្នាំថ្មីៗនេះ បានជំរុញឲ្យរដ្ឋាភិបាលក្រុងប៉េកាំងដាក់ទណ្ឌកម្មសេដ្ឋកិច្ចលើកូរ៉េខាងជើង។
អ្នកវិភាគ Steve Chung មកពីសាកលវិទ្យាល័យក្រុងហុងកុងនិយាយថា ស្ថានភាពក្នុងប្រទេសកូរ៉េខាងជើងមានភាពធ្ងន់ធ្ងបំផុតដែលគីម ជុងអ៊ុនប្រហែលស្នើសុំរដ្ឋាភិបាលក្រុងប៉េកាំងឲ្យបន្ធូបន្ថយការដាក់ទណ្ឌកម្មនេះ។
លោកSteve Chungបានថ្លែងទៀតថា៖ «ស្ថានភាពសេដ្ឋកិច្ចក្នុងប្រទេសកូរ៉េខាងជើងប្រាកដជាកំពុងកាន់តែយ៉ាប់យ៉ឺនឡើងៗក្នុង រយៈពេល៣-៤ខែនេះ ដូច្នេះហើយបានជាគីម ជុងអ៊ុន ចង់ទៅបំពេញទស្សនកិច្ចនៅប្រទេសចិនដើម្បីចរចាជាមួយប្រធានាធិបតីស៊ី ជីនពីងអំពីការលុបចោលការដាក់ទណ្ឌកម្មទាំងនោះខ្លះ ដូច្នេះ លោកគីមអាចបង្ហាញថា តើលោកគិតគូអំពីស្ថានភាពនេះយ៉ាងដូចម្តេច»។
ការស្នើកាលពីពេលថ្មីៗនេះរបស់កូរ៉េខាងជើងទៅកូរ៉េខាងត្បូងនិងសហរដ្ឋអា មេ រិកបានបណ្តាលឲ្យមានការនិយាយប៉ាន់ស្មានថា ចិនជាអ្នកសម្របសម្រួលពី ខាងក្រៅសម្រាប់រដ្ឋាភិបាលក្រុងព្យុងយ៉ាង។ លោកChung និយាយទៀតថា ដំណើរទស្សនកិច្ចរបស់លោកគីមទៅកាន់ក្រុងប៉េកាំងជាសញ្ញាថា ចិននៅតែមានតួនាទីដ៏សំខាន់នៅក្នុងការចរចាអំពីការលុបចោលអាវុធនុយក្លែអ៊ែនៅឧបទ្វីបកូរ៉េ។ចិនបានសរសើរកូរ៉េទាំង២ចំពោះការសម្រេចធ្វើការចរចាបន្ទាប់ពីមានទំនាក់ទំនងតានតឹងអស់រយៈពេលជាច្រើនឆ្នាំ។
លោកស្រី Hua Chunying អ្នកនាំពាក្យក្រសួងការបរទេសចិនបានថ្លែងថា៖ «ប្រទេសចិនក៏នឹងមានឆន្ទៈផ្តល់ការគាំទ្រដល់ការខំប្រឹងប្រែងណាមួយដែលមានផលប្រយោជន៍ដល់ការធ្វើ ឲ្យប្រ សើរឡើងនូវសេចក្តីសម្រេចដ៏ត្រឹមត្រូវដើម្បីលុបបំបាត់អាវុធនុយក្លែអ៊ែនៅឧបទ្វីបកូរ៉េនិងមានប្រយោជន៍ដល់ការការពារសន្តិភាពនិងស្ថិរភាពនៅឧបទ្វីបកូរ៉េ»។
បណ្តាញផ្សាយព័ត៌មានរដ្ឋចិនបានរាយការណ៍ថា មេដឹកនាំកូរ៉េខាងជើងទៅបំពេញទស្សនកិច្ចប្រទេសចិននោះតាមការអញ្ជើញរបស់លោកស៊ី ជីនពីង មេដឹកនាំប្រទេសចិន៕
ប្រែសម្រួលដោយ ជឹង ប៉ូជីន