ប៉ូលិសរុស្ស៊ីបានចាប់ខ្លួនអ្នកតវ៉ាប្រហែលជាង២០នាក់កាលពីថ្ងៃអាទិត្យនៅក្នុងទីក្រុងមូស្គូ មួយសប្តាហ៍បន្ទាប់ពីអ្នកតវ៉ាជាង១០០០នាក់ត្រូវបានឃុំខ្លួនក្នុងអំឡុងពេលនៃការប្រមូលផ្តុំគ្នាទ្រង់ទ្រាយធំមួយ ដែលត្រូវបានរៀបចំឡើងដោយអ្នករិះគន់លោកប្រធានាធិបតី Vladimir Putin។
ទីភ្នាក់ងារសារព័ត៌មាន Tass របស់រដ្ឋក្នុងប្រទេសរុស្ស៊ីបានចេញសេចក្តីរាយការណ៍ថា ការចាប់ខ្លួនកាលពីថ្ងៃអាទិត្យត្រូវបានធ្វើឡើងខណៈពេលដែលបាតុករបានព្យាយាមដើរដង្ហែក្បួនដែលមិនត្រូវបានអនុញ្ញាត ឆ្ពោះទៅកាន់វិមានក្រឹមឡាំង ចេញពីទីលានសាធារណៈ២នៅក្នុងទីក្រុងមូស្គូ។
ប៉ូលិសបានបិទទីលាន Pushkin Square ដែលជាទីកន្លែងប្រមូលផ្តុំគ្នាសម្រាប់អ្នកតវ៉ា។ អាជ្ញាធរក៏បានហាមឃាត់មិនឲ្យប្រើប្រាស់គេហទំព័រមួយចំនួនដែលរដ្ឋាភិបាលបាននិយាយថា គាំទ្រដល់ការតវ៉ាខុសច្បាប់ ដែលរៀបចំឡើងដើម្បីប្រឆាំងនឹងរដ្ឋាភិបាលនៅក្នុងឬក្បែរទីលាន Red Square ក្នុងទីក្រុងមូស្គូ។
នៅមិនទាន់ច្បាស់នៅឡើយទេថា នរណាជាអ្នកបានរៀបចំបាតុកម្មនេះ។ អ្នកនាំពាក្យម្នាក់របស់លោក Alexei Navalny ដែលជាអ្នករិះគន់រដ្ឋាភិបាលក្រុងក្រឹមឡាំងយ៉ាងសំខាន់ បានបដិសេធថាខ្លួនមិនបានពាក់ព័ន្ធនោះទេ។ លោកនិងបាតុកររាប់រយនាក់ដែលប្រឆាំងនឹងអំពើពុករលួយ ដែលបានទាមទារឲ្យលោកនាយករដ្ឋមន្ត្រី Dmitry Medvedev ចុះចេញពីតំណែង ត្រូវបានចាប់ឃុំខ្លួនកាលពីសប្តាហ៍មុនផងដែរ៕