សហរដ្ឋអាមេរិកបានថ្កោលទោសយ៉ាងដាច់អហង្ការចំពោះការឃុំខ្លួនអ្នកតវ៉ារាប់រយនាក់នៅទូទាំងប្រទេសរុស្ស៊ីកាលពីថ្ងៃអាទិត្យម្សិលមិញ ដែលក្នុងនោះមានទាំងមេដឹកនាំបក្សប្រឆាំងលោក Alexei Navalny ផងដែរ។
ពលរដ្ឋរុស្ស៊ីរាប់ម៉ឺននាក់បានតវ៉ានៅតាមទីក្រុងនានានៅទូទាំងប្រទេសរុស្ស៊ី ដើម្បីគាំទ្រដល់ការអំពាវនាវរបស់លោក Navalny ឲ្យវរជននានានៅក្នុងប្រទេសរុស្ស៊ីមានភាពទទួលខុសត្រូវ។
អង្គការ OVD-Info ដែលជាអង្គការតាមដានពីការគាបសង្កត់ផ្នែកនយោបាយនៅក្នុងប្រទេសរុស្ស៊ី បានឲ្យដឹងនៅលើវិបសាយរបស់ខ្លួនថា មនុស្សជាង ១ ពាន់នាក់ ត្រូវបានចាប់ខ្លួននៅក្នុងការតវ៉ានៅក្នុងទីក្រុងមូស្គូ។
តួលេខនេះមិនទាន់មានការអះអាងបែបឯករាជ្យណាមួយនោះទេ ហើយទីភ្នាក់ងារព័ត៌មាន TASS ដែលជាទីភ្នាក់ងាររបស់រដ្ឋ បានដកស្រង់សម្ដីរបស់ប៉ូលិសទីក្រុងមូស្គូ ដែលបាននិយាយថា ពួកគេចាប់អ្នកតវ៉ាបានប្រហែល ៥ រយនាក់ រួមទាំងលោក Navalny ផងដែរ។
លោក Mark Toner អ្នកនាំពាក្យស្ដីទីរបស់ក្រសួងការបរទេសសហរដ្ឋអាមេរិក បានបញ្ជាក់នៅក្នុងសេចក្ដីប្រកាសមួយថា៖ «ការឃុំខ្លួនអ្នកដែលតវ៉ាដោយសន្តិវិធី អ្នកសង្កេតស្ថានការណ៍សិទ្ធិមនុស្ស និងអ្នកសារព័ត៌មាន គឺជាការប្រមាថមើលងាយដល់តម្លៃស្នូលរបស់លទ្ធិប្រជាធិបតេយ្យ»។
លោកបានបញ្ជាក់បន្ថែមទៀតថា សហរដ្ឋអាមេរិកមានការខឹងសម្បារចំពោះការចាប់ខ្លួនលោក Navalny ដែលមានគម្រោងចង់ឈរឈ្មោះជាប្រធានាធិបតីរុស្ស៊ីនៅក្នុងការបោះឆ្នោតឆ្នាំ ២០១៨ ខាងមុខនេះ៕
