ប្រមាណ ១២ ម៉ោង បន្ទាប់ពីការចាក់វ៉ាក់សាំងបង្ការជំងឺកូវីដ១៩ លោក ស៊ាង តុលា អាយុ ៣៩ ឆ្នាំ ដែលជាអ្នកបម្រើការនៅផ្នែកពិគ្រោះជំងឺ និងសង្រ្គោះបន្ទាន់នៅមន្ទីរពេទ្យបង្អែកខេត្តសៀមរាប បានស្លាប់។
មន្ទីរពេទ្យបង្អែកខេត្តសៀមរាបដែលជាកន្លែងលោកចាក់វ៉ាក់សាំង កាលពីថ្ងៃទី១ ខែមីនា បានលើកឡើងថា ការស្លាប់នេះ មិនពាក់ព័ន្ធនឹងការចាក់វ៉ាក់សាំងនោះទេ ប៉ុន្តែដោយសារលោកមានជំងឺបេះដូង ដែលក្រសួងសុខាភិបាលហាមមិនឲ្យចាក់វ៉ាក់សាំង។
លោក ស៊ាង តុលា បានស្លាប់កាលពីថ្ងៃទី ២ ខែមីនា ឆ្នាំ ២០២១ វេលាម៉ោង ៤និង១២នាទី ទៀបភ្លឺ។
មន្ទីរពទ្យបង្អែកខេត្តសៀមរាបបានចេញលិខិតបំភ្លឺមួយដោយថា លោកបានស្ម័គ្រចិត្តចាក់វ៉ាក់សាំងរបស់ចិនឈ្មោះស៊ីណូហ្វាម (Sinopharm) កាលពីម៉ោង៣រសៀលថ្ងៃទី ១ ខែមីនា។
មន្ទីរពេទ្យបញ្ជាក់ថា៖ «ការពិនិត្យនិងវាយតម្លៃមុនចាក់របស់មន្រ្តីបម្រើការនៅកន្លែងចាក់វ៉ាក់សាំង ឃើញថា គាត់ពុំមានបញ្ហាដែលត្រូវហាមចាក់វ៉ាក់សាំងទេ»។
ភ្លាមៗបន្ទាប់ពីចាក់វ៉ាក់សាំងលោកមិនមានបញ្ហាអ្វីនោះទេ។ បើតាមសេចក្តីបំភ្លឺរបស់មន្ទីរពេទ្យបង្អែកខេត្តសៀមរាប ភរិយារបស់អ្នកដែលស្លាប់បានលើកឡើងថា នៅយប់ថ្ងៃទី ១ ខែមីនា បន្ទាប់ពីត្រឡប់មកពីមន្ទីរពេទ្យ លោកបានបរិភោគអាហារជុំគ្រួសារធម្មតា ហើយមុនពេលចូលសម្រាកគាត់បានត្អូញថា «ឈឺទ្រូងនិងអស់កម្លាំង ដោយសារមិនសូវបានសម្រាក»។
បន្ទាប់មក លោកក៏ស្ថិតក្នុងសភាពសន្លប់ និងគាំងដង្ហើមម្តងៗ។ មន្ទីរពេទ្យបញ្ជាក់ថា ការស្លាប់នេះ ដោយសារសរសៃឈាមបេះដូង (Myocardial infarction) មិនមានជាប់ពាក់ព័ន្ធនឹងការចាក់វ៉ាក់សាំងបង្ការកូវីដ១៩ ទេ។
ជាធម្មតា មុនពេលចាក់វ៉ាក់សាំង ប្រជាពលរដ្ឋកម្ពុជាត្រូវបានសួរនាំអំពី «ភាពស្មោះត្រង់» លើបញ្ហាសុខភាពរបស់ពួកគេថា មិនមានបញ្ហានោះទេ។ ចំណុចសុខភាពត្រូវបានក្រសួងសុខាភិបាលកំណត់ មិនគួរចាក់វ៉ាក់សាំងបង្ការកូវីដ១៩ មានដូចជាអាការៈក្តៅខ្លួន មានជំងឺផ្លូវដង្ហើម ហឺត ជំងឺរ៉ាំរ៉ៃធ្ងន់ធ្ងរ ជំងឺថ្លើម តម្រងនោម ជំងឺប្រកាច់ អាឡាក់ស៊ី ស្រ្តីមានផ្ទៃពោះ អ្នកមានប្រវត្តិប្រតិកម្មជាមួយវ៉ាក់សាំង និងអ្នកមានប្រវត្តិជំងឺកូវីដ១៩ ជាដើម។
អ្នកចាក់វ៉ាក់សាំងក៏ត្រូវចុះហត្ថលេខាលើលិខិតព្រមព្រៀងទទួលចាក់ ដោយទទួលខុសត្រូវចំពោះហានិភ័យក្រោយចាក់វ៉ាក់សាំង ក្នុងនោះមានការស្លាប់ផងដែរ។ ចំណុចមួយទៀត គឺថា ការចាក់វ៉ាក់សាំងនេះអាចមានប្រតិកម្ម ដូចជាញាក់ គ្រុនក្តៅ ឈឺសាច់ដុំ ល្ហិតល្ហៃ ឈឺសន្លាក់ ឈឺក្បាល និងឈឺចាប់នៅកន្លែងចាក់។
គេមិនទាន់ដឹងនៅឡើយទេថា មូលហេតុអ្វីបានជាលោក ស៊ាង តុលា ដែលស្លាប់នោះ ព្រមទទួលចាក់វ៉ាក់សាំង ខណៈខ្លួនមានជំងឺបេះដូង ឬក៏មូលហេតុអ្វីបានជាលោកត្រូវបានអនុញ្ញាតឲ្យចាក់វ៉ាក់សាំង ខណៈលោកមានជំងឺបេះដូង។
VOA មិនអាចសុំការឆ្លើយតបពីក្រុមគ្រួសារលោក ស៊ាង តុលា ដែលស្លាប់បាននៅឡើយទេ។
រូបឯកសារ៖ ការចាក់វ៉ាក់សាំងបង្ការជំងឺកូវីដ១៩ ស៊ីណូហ្វាម នៅភ្នំពេញ ថ្ងៃទី១០ ខែកុម្ភៈ ឆ្នាំ២០២១។ (ហ៊ាន សុជាតា/វីអូអេ)
លោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាព មានប្រសាសន៍ថា គួរតែមានការស្រាវជ្រាវនិងពន្យល់បន្ថែមថា តើអ្នកមានបញ្ហាបេះដូងអាចចាក់វ៉ាក់សាំងបាន ឬយ៉ាងណា ដើម្បីឲ្យសាធារណជនបានដឹង និងទុកចិត្តចំពោះវ៉ាក់សាំងនេះ។
លោកមានប្រសាសន៍ថា៖ «ការដែលពន្យល់អំពីការមិនពាក់ព័ន្ធគ្នារវាងជំងឺបេះដូង ហើយនិងវ៉ាក់សាំង គឺមានសារសំខាន់បំផុតដែលប្រជាពលរដ្ឋអាចនឹងចង់ដឹង»។
ប្រធានមន្ទីរពេទ្យបង្អែកខេត្តសៀមរាប លោក ប៉ែន ផលគុណ បានបដិសេធមិនអត្ថាធិប្បាយបន្ថែមលើសេចក្តីបំភ្លឺដែលចេញផ្សាយកាលពីកន្លងទៅ។
លោកបញ្ជាក់ថា៖ «ខ្ញុំបញ្ជាក់នៅហ្នឹងហើយអស់តើ។ អត់មានអីថែមទៀតទេ ប៉ុណ្ណឹងឯង។ គ្រប់អស់ហើយ»។
ប្រធានមន្ទីរសុខាភិបាលខេត្តសៀមរាប លោក ក្រុស សារ៉ាត់ ក៏បានបដិសេធមិនអត្ថាធិប្បាយតាមទូរស័ព្ទ ប៉ុន្តែលោកថា ករណីនេះខាងមន្ទីរពេទ្យបង្អែកបានបកស្រាយរួចហើយ។ លោកក៏បានបដិសេធមិនឆ្លើយនឹងសំណួរថា តើគ្រូពេទ្យដែលស្លាប់នោះ មានសុខភាពមិនល្អមុនពេលចាក់ ឬក៏គ្រូពេទ្យមិនបានសួរនាំឲ្យបានដិតដល់ មុនពេលចាក់វ៉ាក់សាំងនេះ។
លោកមានប្រសាសន៍ថា៖ «ខ្ញុំក៏មិនមែនជាអ្នកបច្ចេកទេសនៅក្នុងរឿងហ្នឹងដែរ។ គឺមន្ទីរពេទ្យខេត្តសៀមរាប។ គឺជារឿងថ្នាក់ដឹកនាំនៅក្នុងមន្ទីរពេទ្យខេត្ត។ គេបានវិនិច្ឆយអីហើយអស់ហើយ»។
VOA មិនទាន់អាចសុំការបកស្រាយពីអ្នកនាំពាក្យក្រសួងសុខាភិបាលលោកស្រី ឱ វណ្ណឌីន បាននៅឡើយទេ។
វ៉ាក់សាំង Sinopharm របស់ចិន ត្រូវបានក្រុមហ៊ុនផលិតប្រកាសថាមានប្រសិទ្ធភាពក្នុងអត្រា ៧៩,៣៤% ក្នុងការសាកល្បងដំណាក់កាលទី ៣។ វ៉ាក់សាំង ៦០ ម៉ឺនដូស ដែលអាចចាក់មនុស្សបាន ៣០ ម៉ឺននាក់ ត្រូវបានផ្តល់ជាជំនួយមនុស្សធម៌របស់រដ្ឋាភិបាលចិន ហើយកម្ពុជាកំពុងបន្តយុទ្ធនាការចាក់វ៉ាក់សាំងនេះ សម្រាប់ក្រុមជួរមុខ ក្នុងនោះមានគ្រូពេទ្យផងដែរ។ រហូតមកដល់ពេលនេះ មានមនុស្សជាង ៨ ម៉ឺននាក់ហើយ ដែលបានចាក់វ៉ាក់សាំងនេះ។
ទាក់ទងនឹងចំនួនមនុស្សចាក់វ៉ាក់សាំងនេះ ស្ថានទូតចិនប្រចាំនៅកម្ពុជាបានបង្ហោះសារនៅលើហ្វេសប៊ុករបស់ខ្លួន កាលពីថ្ងៃអង្គារថា៖ «នេះជាតួលេខដែលបង្ហាញឲ្យឃើញពីទំនុកចិត្តខ្ពស់របស់ប្រជាជនកម្ពុជាទៅលើវ៉ាក់សាំងចិន»។
ប៉ុន្តែ ប្រជាពលរដ្ឋកម្ពុជាមួយចំនួនក៏បានបង្ហាញភាពស្ទាក់ស្ទើរក្នុងការចាក់វ៉ាក់សាំងនេះ។
កាលពីថ្ងៃច័ន្ទ ប្រទេសចិនបានប្រកាសថាវ៉ាក់សាំង ៤០ ម៉ឺនដូសទៀតដែលជាជំនួយឥតសំណងរបស់រដ្ឋាភិបាលចិន ដែលអាចចាក់មនុស្សប្រមាណ ២០ ម៉ឺននាក់ នឹងមកដល់កម្ពុជា នៅមុនចូលឆ្នាំខ្មែរ។
នៅថ្ងៃព្រហស្បតិ៍នេះ លោកនាយករដ្ឋមន្រ្តី ហ៊ុន សែន បានចាក់វ៉ាក់សាំងរបស់ក្រុមហ៊ុន AstraZeneca តាមរយៈកម្មវិធីផ្ដល់វ៉ាក់សាំងកូវីដ១៩ ជាសាកលរបស់អង្គការសុខភាពពិភពលោក (WHO) ដែលហៅថាកូវ៉ាក់ (COVAX)។ វ៉ាក់សាំងចំនួន ៣២៤.០០០ ដូស ត្រូវបានបញ្ជូនមកកម្ពុជាកាលពីយប់ថ្ងៃអង្គារ។
លោក ហ៊ុន សែន បញ្ជាក់ថាវ៉ាក់សាំង Sinopharm លោកមិនអាចចាក់បានទេព្រោះលោកមានអាយុលើស៥៩ឆ្នាំ។
ចំណែកវ៉ាក់សាំងដែលទទួលស្គាល់ដោយអង្គការសុខភាពពិភពលោកនេះ លោកថា លោកអាចចាក់បាន ព្រោះវ៉ាក់សាំងនេះអនុញ្ញាតឲ្យអ្នកមានអាយុលើសពី ៦០ ឆ្នាំចាក់បាន។
ក្នុងសន្និសីទសារព័ត៌មាននៅព្រឹកថ្ងៃព្រហស្បតិ៍នេះ នៅមន្ទីរពេទ្យកាល់ម៉ែត្រក្នុងរាជធានីភ្នំពេញដដែល ក្រោយចាក់វ៉ាក់សាំង លោកនាយករដ្ឋមន្រ្តីហ៊ុន សែន ថ្លែងដែរថា «បញ្ហាទាក់ទិននឹងវេជ្ជសាស្រ្តបច្ចេកទេស វាមិនមែនជាបញ្ហានយោបាយនោះទេ»។
លោកបញ្ជាក់ថា អ្នកដែលគិតថាវ៉ាក់សាំងសម្លាប់មនុស្ស មិនបាច់មកចាក់នោះទេ៕