កូនស្រីលោក កឹម សុខា មេដឹកនាំគណបក្សប្រឆាំង ដែលកំពុងជាប់ឃុំ បានរៀបរាប់ហេតុការណ៍នៃការវាយឆ្មក់របស់កម្លាំងប្រដាប់អាវុធចូលក្នុងផ្ទះ មេដឹកនាំគណបក្សប្រឆាំងរូបនេះ។ កូនស្រីពៅលោក កឹម សុខា រូបនេះ ប្តេជ្ញាជួយឪពុកខ្លួនដែលគ្មានកំហុសរហូតដល់ដង្ហើមចុងក្រោយ។ យ៉ាងណាក្តី មន្ត្រីជាន់ខ្ពស់រដ្ឋសភាបានបញ្ជាក់ថា គណៈកម្មាធិការអចិន្ត្រៃយ៍សភានឹងបើកកិច្ចប្រជុំពិនិត្យលើសេចក្តីរាយការណ៍របស់មន្ត្រីតុលាការ ហើយធ្វើការសម្រេចថា តុលាការត្រូវបន្តក្តីលោក កឹម សុខា ឬយ៉ាងណានោះ។
ការភ័យខ្លាចនឹងការបោះឆ្នោតជាតិនៅឆ្នាំ ២០១៨ គឺជាដើមចមនាំទៅរកការឃុំខ្លួនលោក កឹម សុខា ប្រធានគណបក្សសង្គ្រោះជាតិ ដែលត្រូវតុលាការចោទប្រកាន់និងឃុំខ្លួនពីបទឃុំឃិតជាមួយបរទេស ក្បត់ប្រទេសជាតិ។ នេះបើយោងតាមការបញ្ជាក់ពីកូនស្រីពៅរបស់មេដឹកនាំគណបក្សប្រឆាំងរូបនេះ។
ក្នុងសារអេឡិចត្រូនិក ឬ Email ដែល VOA ទទួលបាន កាលពីយប់ថ្ងៃអង្គារ កញ្ញា កឹម សម្មាធីតា ដែលមិនមានតួនាទីនៅក្នុងគណបក្សប្រឆាំង បានថ្លែងថា វាគឺជារឿងគួរឲ្យហួសចិត្ត ដែលលោក កឹម សុខា ឪពុករបស់នាង ត្រូវបានចោទប្រកាន់ថា ប្រព្រឹត្តអំពើក្បត់ជាតិ ហើយថា ការណ៍នេះជាការប្រមាថដល់ការគិតរបស់ពលរដ្ឋរាល់រូប។
ដោយមិនសំដៅចំទៅបុគ្គលណាមួយ កញ្ញា កឹម សម្មាធីតា បានប្រាប់ VOA តាមសារអេឡិចត្រូនិក ឬ Email ក្នុងខ្លឹមសារដើមថា៖
«ការភ័យខ្លាចរបស់ពួកគេអំពីការចាញ់ការប្រកួតក្នុងការបោះឆ្នោតឆ្នាំ២០១៨ មិនដែលត្រូវបានបង្ហាញឲ្យឃើញជាក់ស្តែង ជាងការចាប់ឪពុករបស់ខ្ញុំ ជាមួយការបង្ក្រាបលើបណ្តាញផ្សព្វផ្សាយ និងសង្គមស៊ីវិល។ ពួកគេមិនមានសូម្បីតែសំអាងណាមួយធ្វើជាលេសដែលអាចជឿបាន»។
កញ្ញាបានថ្លែងបន្តក្នុងន័យដើមថា៖
«នេះគឺជាអ្វីដែលពួកគេកំពុងធ្វើដើម្បីវាយខ្នោះ និងដាក់ឃុំឃាំងគូប្រជែងរបស់ពួកគេ ហើយបញ្ជូនគាត់ទៅកាន់ពន្ធនាគារមួយដែលស្ថិតនៅឆ្ងាយ។ ពួកគេនឹងបន្តប្រើប្រាស់ប្រព័ន្ធ «យុត្តិធម៌» និងកម្លាំងប្រដាប់អាវុធវាយប្រហារលើអ្នកណាដែលស្ថិតក្នុងតួនាទីដឹកនាំគណបក្សសង្គ្រោះជាតិ រហូតដល់យើងអស់មនុស្សមានសមត្ថភាពបែបនេះ»។
កញ្ញា កឹម សម្មាធីតា អះអាងថា ក្រុមដែលធ្វើបាបលោក កឹម សុខា ទាល់ប្រាជ្ញាក្នុងការរកលេសណាមួយដែលគួរឲ្យជឿបានដើម្បីវាយប្រហារលើគណបក្សសង្គ្រោះ ហេតុនេះហើយបានជាគេបង្កើតឲ្យមានការចោទប្រកាន់អំពីអំពើក្បត់ជាតិនេះ។
លោក កឹម សុខា ប្រធានគណបក្សជំទាស់ដ៏ធំនៅកម្ពុជា ត្រូវបានអាជ្ញាធរចាប់ខ្លួនកាលពីថ្ងៃអាទិត្យកន្លងទៅ ដោយសំអាងលើការថ្លែងរបស់លោកនៅក្នុងវីដេអូខ្លីមួយ ដែលគេចែកចាយពេញបណ្តាញសង្គមហ្វេសប៊ុក ហើយត្រូវបានអង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្ត្រីផ្សាយបន្តជាសាធារណៈតែប៉ុន្មានម៉ោងប៉ុណ្ណោះ ក្រោយការចាប់ខ្លួនមេដឹកគណបក្សជំទាស់រូបនេះ។
ក្នុងវីដេអូខ្លីដែលគ្មានកាលបរិច្ឆេទ និងបង្ហោះតាមបណ្តាញសង្គមហ៊េសប៊ុកនេះ លោក កឹម សុខា បានថ្លែងទៅកាន់អ្នកគាំទ្រក្នុងប្រទេសអូស្ត្រាលី ដោយលើកឡើងអំពីយុទ្ធសាស្ត្រនយោបាយរបស់គណបក្សជំទាស់តទល់នឹងគណបក្សប្រជាជនកម្ពុជារបស់លោក ហ៊ុន សែន។
កញ្ញា កឹម សម្មាធីតា ដែលអះអាងថា ខ្លួនមិនមែនជាមន្ត្រីគណបក្សសង្គ្រោះជាតិ បានរៀបរាប់អំពីហេតុការណ៍នៃចាប់ខ្លួនលោក កឹម សុខា មុនពេលព្រះអាទិត្យរះនាថ្ងៃអាទិត្យថា ជនដែលចូលក្នុងផ្ទះកញ្ញា មានបំពាក់ដោយអាវុធ និងបានគំរាមកម្ទេចផ្ទះចោល។ កញ្ញាបន្តថា ពួកគេបានលើកកាំភ្លើងផ្ជង់សមាជិកក្នុងផ្ទះ ដែលមានទាំងអ្នកចំអិនអាហារ។ កញ្ញាបានបន្ថែមថា ពួកគេ ដែលជា «ប៉ូលិស» បានប្លន់ទូរសព្ទ និងប្រាក់សន្សំរបស់អ្នកទាំងនោះ ហើយផ្ទះបាយត្រូវបានធ្វើឲ្យខូចខេ្ទចខ្ទី។
កញ្ញារៀបរាប់បន្តក្នុងន័យដើមថា៖
«ម្តាយរបស់ខ្ញុំភ័យស្លន់ស្លោ។ ឪពុកខ្ញុំត្រូវគេវាយខ្នោះ ហើយនាំយកចេញពីគ្រួសារ មិនដល់មួយឆ្នាំផង បន្ទាប់ពីគាត់ត្រឡប់មកពីការជាប់ឃុំក្នុងការិយាល័យ កាលពីឆ្នាំមុន។ តើខ្ញុំមានអារម្មណ៍បែបណា? ជាមនុស្សម្នាក់ ខ្ញុំមានការឈឺចាប់រកពាក្យណាមកបរិយាយមិនបាន ទាំងជាភាសាខ្មែរ និងអង់គ្លេស។ ក្តីឈឺចាប់បង្កដោយអំពើអយុត្តិធម៌គឺជារឿងធម្មតានៅកម្ពុជា ដូច្នេះ ខ្ញុំដឹងថាមានប្រជាពលរដ្ឋខ្មែរជាច្រើនយល់ពីអារម្មណ៍នេះ។ ប៉ុន្តែទោះជាខ្ញុំស្ថិតក្នុងកាលៈទេសៈនេះ ខ្ញុំនឹងនៅតែរឹងមាំ និងបន្តប្រយុទ្ធរហូតដល់វិនាទីចុងក្រោយនៃជីវិតខ្ញុំ ដើម្បីឲ្យមានការដោះលែងឪពុកខ្ញុំ និងការពារគុណតម្លៃដែលគាត់មាន»។
ភ្លាមៗក្រោយការចាប់ខ្លួនលោក កឹម សុខា តំណាងរាស្ត្រមណ្ឌលខេត្តកំពង់ចាម នាយករដ្ឋមន្ត្រីខ្មែរ គឺលោក ហ៊ុន សែនបានព្រមានចាប់ខ្លួនជនណាដែលចេញមុខការពារលោក កឹម សុខា ដែលលោកបានចោទថា បានប្រព្រឹត្តអំពើក្បត់ជាតិ។
យ៉ាងណាក៏ដោយ ក្រុមសមាជិកសភាគណបក្សសង្គ្រោះជាតិ បានចេញសេចក្តីការណ៍នាថ្ងៃពុធនេះ ដោយបានទាមទារឲ្យសភាច្រានចោលការចោទប្រកាន់លោក កឹម សុខា។
សេចក្តីថ្លែងការណ៍ចុះថ្ងៃទី៦ ខែកញ្ញា ឆ្នាំ ២០១៧បានពណ៌នាក្នុងន័យដើមថា៖
«ការណ៍ដែលចាប់ខ្លួនឯកឧត្តម កឹម សុខាគឺធ្វើឡើងដោយយោងរូបភាពក្នុងវីដេអូ ដែលមិនមែនជាអំពើល្មើសជាក់ស្តែង ស្របតាមមាត្រា៨៦ នៃក្រមព្រហ្មទណ្ឌទេ។ មាត្រា៨៦នៃក្រមនីតិវិធីព្រហ្មទណ្ឌចាត់ទុកថា បទឧក្រិដ្ឋ ឬបទមជ្ឈិមជាក់ស្តែង លុះត្រាតែជាបទល្មើសដែលកំពុងប្រព្រឹត្ត បទល្មើសដែលប្រព្រឹត្តរួចភ្លាម ឬនៅក្រោយពេលមានបទល្មើសបន្តិច ជនដែលគេសង្ស័យត្រូវបានសាធារណជនស្រែកដេញប្រផាប់ ចាប់ប្រភីង ឬបុគ្គលនោះត្រូវរកគេឃើញថា មានភស្តុតាង ឬមានស្លាកស្នាម ឬតម្រុយច្បាស់លាស់ ហើយភស្តុតាងស៊ីសង្វាក់ផ្សេងទៀត ដែលនាំឲ្យគេសន្និដ្ឋានថា បុគ្គលនោះបានប្រព្រឹត្ត ឬបានចូលរួមប្រព្រឹត្តល្មើស»។
សេចក្តីថ្លែងការណ៍នោះបានបន្តថា៖
«ផ្ទុយទៅវិញក្នុងវីដេអូនេះ ឯកឧត្តម កឹម សុខា បានថ្លែងនៅទីកន្លែងសាធារណៈ កាលពីឆ្នាំ២០១៣ នៅប្រទេសអូស្រ្តាលី ដែលកន្លងផុតទៅជាច្រើនឆ្នាំមកហើយ។ ជាពិសេសថ្មីៗនេះ ឯកឧត្តម កឹម សុខា តែងតែបញ្ជាក់ពីការផ្លាស់ប្តូរជាវិជ្ជមាន ដោយការប្រកួតប្រជែងតាមរយៈការបោះឆ្នោតដោយសេរី ត្រឹមត្រូវ និងយុត្តិធម៌ ដែលធានាដោយរដ្ឋធម្មនុញ្ញនៃព្រះរាជាណាចក្រកម្ពុជា»។
តំណាងអយ្យការអមសាលាដំបូងរាជធានីភ្នំពេញ បានការពារចំណាត់ការផ្លូវច្បាប់របស់ខ្លួន។
លិខិតរបស់លោកព្រះរាជអាជ្ញា យ៉េត ចរិយា ចុះថ្ងៃទី ៥ ខែកញ្ញា ហើយដែលត្រូវបានផ្ញើជូនលោក ហេង សំរិន ប្រធានរដ្ឋសភាជាតិ បានបញ្ជាក់ឲ្យដឹងថា លោក កឹម សុខា មានផែនការសម្ងាត់ដែលត្រូវបានអនុវត្តចាប់តាំងពីឆ្នាំ ១៩៩៣ ដល់ឆ្នាំ ២០១៣ និងបានបន្តរហូតមកដល់បច្ចុប្បន្ននេះ ហើយខ្លឹមសារសំខាន់នៃផែនការរួមជាមួយបរទេសក្បត់នឹងកម្ពុជានេះ ត្រូវលាតត្រដាងបង្ហាញតាមរយៈវីដេអូឃ្លីប ដែលត្រូវបានផ្សព្វផ្សាយដោយបណ្តាញ CBN (Cambodian Broadcasting Network) មានទីតាំងនៅប្រទេសអូស្រា្តលី។
លិខិតរបស់លោកព្រះរាជអាជ្ញា យ៉េត ចរិយា បានសរសេរក្នុងន័យដើមថា៖
«ផ្អែកតាមសម្តីជាចំហរបស់ឈ្មោះ កឹម សុខា នៅក្នុងវីដេអូឃ្លីបដែលកំពុងបន្តផ្សព្វផ្សាយមកដល់ពេលនេះ រួមទាំងភស្តុតាងដែលអាជ្ញាធរមានសមត្ថកិច្ចប្រមូលបាន បង្ហាញច្បាស់ថា សកម្មភាពឃុបឃិតជាមួយបរទេស ក្បត់កម្ពុជានេះកើតមានពីឆ្នាំ១៩៩៣ ហើយផែនការនេះបន្តអនុវត្តជាជំហានៗ រហូតមកដល់បច្ចុប្បន្ននេះ។ ការធ្វើសកម្មភាពបន្តមកដល់ពេលនេះត្រូវកំណត់បានជាស្ថានភាពនៃបទល្មើសជាក់ស្តែង ដោយយោងតាមក្រមនីតិវិធីព្រហ្មទណ្ឌនៃព្រះរាជាណាចក្រកម្ពុជា»។
មួយថ្ងៃក្រោយព្រះរាជអាជ្ញាផ្តល់ដំណឹងដល់សភាអំពីនីតិវិធីចាប់ខ្លួនលោក កឹម សុខា នារសៀលថ្ងៃពុធនេះ តុលាការរាជធានីភ្នំពេញបានសម្រេចឃុំខ្លួនលោក កឹម សុខាបណ្តោះអាសន្នដើម្បីបន្តកិច្ចស៊ើបសួរអំពីបទ «សន្ទិដ្ឋិភាពជាមួយបរទេស» ដែលស្មើនឹងអំពើក្បត់ជាតិ។
លោក លី សុផាណា អ្នកនាំពាក្យសាលាដំបូងរាជធានីភ្នំពេញ បានបញ្ជាក់ប្រាប់ VOA ឲ្យដឹងតាមសារទូរសព្ទក្នុងន័យដើមថា៖
«បន្ទាប់ពីបញ្ចប់ការពិភាក្សាដេញដោលចំពោះមុខ និងសាកសួរចម្លើយជនត្រូវចោទឈ្មោះ កឹម សុខា រួចរាល់ ចៅក្រមស៊ើបសួរបានសម្រេចឃុំខ្លួនបណ្តោះអាសន្នជនត្រូវចោទឈ្មោះ កឹម សុខា ពីបទសន្ទិដ្ឋិភាពជាមួយបរទេស តាមបញ្ញត្តិមាត្រា ៤៤៣ នៃក្រមព្រហ្មទណ្ឌ ហើយបានអនុវត្តការឃុំខ្លួនតាមនីតិវិធី»។
ការចាប់ខ្លួនលោក កឹម សុខា បានបង្កឲ្យមានប្រតិកម្មជាបន្តបន្ទាប់ពីសហគមន៍អន្តរជាតិ ដែលអនុវត្តលទ្ធិប្រជាធិបតេយ្យ អង្គការសិទ្ធិមនុស្ស និងអង្គការសហប្រជាជាតិ ដោយបានលើកឡើងពីក្តីបារម្ភនៃភាពស្របច្បាប់សម្រាប់ការបោះឆ្នោតនៅឆ្នាំ២០១៨ និងការរឹតបន្តឹងលើសិទិ្ធបញ្ចេញមតិ និងសិទ្ធិនយោបាយ។ ពួកគេថា ការចាប់ខ្លួនលោក កឹម សុខា និងសកម្មភាពវាយប្រហារលើបណ្តាញព័ត៌មានឯករាជ្យ បានធ្វើឲ្យកម្ពុជាឃ្លាតឆ្ងាយពីគន្លងប្រជាធិបតេយ្យ ហើយបានទាមទារឲ្យរដ្ឋាភិបាលកម្ពុជាស្តារស្ថានការណ៍នយោបាយដ៏តានតឹងនេះឡើងវិញ។
ឆ្លើយតបនឹងការទាមទារពីក្រុមសមាជិកសភាគណបក្សសង្គ្រោះជាតិ ដែលសុំឲ្យតំណាងអយ្យការទម្លាក់ការចោទប្រកាន់លោក កឹម សុខានោះ លោក ឡេង ប៉េងឡុង អ្នកនាំពាក្យសភាជាតិ បានប្រាប់ VOA នៅថ្ងៃពុធនេះថា ការផ្អាកនីតិវិធីរបស់តុលាការអាចធ្វើទៅបាន លុះត្រាតែមានសំឡេង៣/៤នៃសភាទាំងមូល ពោលគឺតំណាងរាស្ត្រ៩៣នាក់ ទើបអាចផ្អាកដំណើរការនេះបាន។
លោកបានបញ្ជាក់ឲ្យដឹងទៀតថា គណៈកម្មាធិការអចិន្ត្រៃយ៍នៃរដ្ឋសភានឹងបើកកិច្ចប្រជុំពិនិត្យលើករណីលោក កឹម សុខា។ លោកមានប្រសាសន៍ថា កិច្ចប្រជុំនេះនឹងមិនផ្តោតលើការដកអភ័យឯកសិទ្ធិសភាលោក កឹម សុខាទេ តែជាការប្រជុំដើម្បីបើកផ្លូវឲ្យមានអង្គប្រជុំវិសាមញ្ញមួយ ដែលនឹងសម្រេចថា តើតុលាការអាចបន្តនីតិវិធីរបស់ខ្លួនបានឬយ៉ាងលើក្តីប្រធានគណបក្សប្រឆាំងរូបនេះ។
លោក ឡេង ប៉េងឡុង អ្នកនាំពាក្យសភាជាតិ បានប្រាប់ VOA នៅថ្ងៃពុធនេះថា៖
«ទីមួយគឺ តើរដ្ឋសភាហ្នឹង សុំឲ្យតុលាការ ទាមទារឲ្យតុលាការផ្អាកចោទប្រកាន់ឬទេ។ បើវាទាមទារឲ្យតុលាការផ្អាកការចោទប្រកាន់គឺត្រូវបោះឆ្នោត រកឲ្យបាននូវសំឡេង ការសុំឲ្យផ្អាកហ្នឹងចំនួន ៣/៤នៃចំនួនសំឡេងរដ្ឋសភាទាំងមូលគឺ៩៣រូប បាទ បើសិនជារដ្ឋសភាចង់ផ្អាក ហើយចង់សុំឲ្យផ្អាក កុំឲ្យតុលាការធ្វើការចោទប្រកាន់ ហើយផ្អាកការចោទប្រកាន់របស់តុលាការ»។
ទាក់ទងសំណុំរឿងលោក កឹម សុខានេះ អាជ្ញាធរមានសមត្ថកិច្ចក៏កំពុងស្រាវជ្រាវរកអ្នកជាប់ពាក់ព័ន្ធដទៃទៀតផងដែរ។
កាសែតភ្នំពេញប៉ុស្តិ៍ ដែលបានចេញផ្សាយកាលពីថ្ងៃចន្ទ បានឲ្យដឹងថា កូនស្រីលោក កឹម សុខា និងមន្ត្រីជាន់ខ្ពស់មួយចំនួនទៀតរបស់គណបក្សសង្គ្រោះជាតិ អាចនឹងត្រូវចាប់ខ្លួនជាបន្តបន្ទាប់ទៀត។ កាសែតនេះបានលើកឡើងពីកូនស្រីពីរនាក់របស់លោក កឹម សុខា ដែលរួមមាន កញ្ញាកឹម មនោវិទ្យា អនុប្រធានកិច្ចការសាធារណៈគណបក្សសង្គ្រោះជាតិ និងកញ្ញា កឹម សម្មាធីតា។
កញ្ញា កឹម សម្មាធីតា បានប្រាប់ VOA តាមសារអេឡិចត្រូនិកថា មនុស្សជាច្រើនក្នុងជួរគណបក្សសង្គ្រោះជាតិ កំពុងប្រឈមនឹងហានិភ័យនៃការចាប់ឃុំខ្លួន។ យ៉ាងណាក្តី កញ្ញាអះអាងថា ក្រុមមន្ត្រីគណបក្សសង្គ្រោះជាតិនឹងមិនចាកចេញពីប្រទេស ដើម្បីគេចពីការធ្វើទុក្ខបុកម្នេញតាមប្រព័ន្ធតុលាការនោះទេ។
«សម្រាប់ការចាប់ខ្លួនជាច្រើននៅពេលខាងមុខ គឺអ្នករាល់គ្នានៅគណបក្សសង្គ្រោះជាតិពិតជាកំពុងប្រឈមនឹងគ្រោះថ្នាក់។ នេះមិនមែនជាសំណួរដែលត្រូវសួរទៀតទេ។ សំណួរគឺថា តើយើងនឹងធ្វើអ្វីទៀតអំពីរឿងនេះ? តើពិភពលោកនឹងគ្រាន់តែឱបដៃតែឈរមើលលទ្ធិប្រជាធិបតេយ្យកំពុងត្រូវបានគេធ្វើឲ្យវិនាសឬ? ពួកគេកំពុងរុញច្រានយើងឲ្យទៅទីចោទមួយ ហើយក៏គ្មានមន្ទិលទេដែលពួកគេនឹងបន្តរុញច្រានយើងបន្ថែមទៀត។ សំណួរគឺថា តើយើងនឹងត្រូវឈរស្ងៀមមិនធ្វើអី្វទាំងអស់ ហើយបន្តឲ្យគេធ្វើរឿងនេះទៀតឬ? ខ្ញុំដឹង ខ្ញុំមិនធ្វើអីចឹងទេ។ ខ្ញុំជាកូនស្រី កឹម សុខា។ យើងទន់ភ្លន់ តែស៊ូ។ យើងនៅទីនេះដើម្បីស្ថិតនៅយូរ។ យើងមិនបោះបង់គោលការណ៍ទាំងឡាយរបស់យើងទេ។ យើងមិនបោះបង់ប្រជាពលរដ្ឋយើង និងប្រទេសយើងទេ។ យើងមិនបោះបង់សេរីភាព និងប្រជាធិបតេយ្យ។ ខ្ញុំមិនមែនរស់សម្រាប់តែចុះចាញ់នោះឡើយ»។
VOA ព្យាយាមសុំការអធិប្បាយពីនាយឧត្តមសេនីយ៍ខៀវ សុភ័គ អ្នកនាំពាក្យក្រសួងមហាផ្ទៃ និងនាយឧត្តមសេនីយ៍ គៀត ចន្ទថារិទ្ធ អ្នកនាំពាក្យអគ្គស្នងការដ្ឋាននគរបាលជាតិ តែមិនទាន់អាចទាក់ទងបានទេ នៅថ្ងៃពុធនេះ។
ដោយមិនចង់ប្រឈមនឹងការជ្រៀតជ្រែកកិច្ចការផ្ទៃក្នុង លោកប្រាក់ សុខុន រដ្ឋមន្ត្រីក្រសួងការបរទេសបានចេញសេចក្តីពន្យល់ដល់ប្រមុខ និងតំណាងស្ថានទូតនានាប្រចាំនៅកម្ពុជា នៅថ្ងៃពុធនេះ។
សេចក្តីពន្យល់នោះបានបញ្ជាក់ឲ្យដឹងថា លោក កឹម សុខា បានសារភាពយ៉ាងច្បាស់នៅក្នុងវីដេអូថា សហរដ្ឋអាមេរិក បានប្រាប់លោក តាំងពីដំបូងអំពីអ្វីដែលត្រូវធ្វើ។
លោក ប្រាក់ សុខុន ត្រូវបានដកស្រង់សម្តីក្នុងសេចក្តីពន្យល់នោះ ក្នុងន័យដើមថា៖
«តើយើងខ្ញុំចង់បានអ្វីពីប្រទេសទាំងអស់នោះ? ពីឯកឧត្តម លោក ជំទាវ? គឺការគោរពគ្នាទៅវិញទៅមក ការគោរពឯករាជ្យភាព អធិបតេយ្យភាព និងអព្យាក្រឹត្យភាពរបស់យើងខ្ញុំ។ សូមទុកឲ្យប្រជាជនយើងខ្ញុំសម្រេចចិត្តដោយសេរីថា តើអ្នកណាជាអ្នកដឹកនាំពួកគាត់៖ សូមកុំជ្រៀតជ្រែក និងសូមគោរពច្បាប់របស់យើងខ្ញុំ»។
ទោះជាយ៉ាងណាក្តី បណ្តាញព័ត៌មាននៅលោកខាងលិចជាច្រើន បានរាយការណ៍ថា គណបក្សប្រឆាំងអាចនឹងត្រូវបានរារាំងមិនឲ្យចូលរួមក្នុងការបោះឆ្នោតជាតិឆ្នាំ២០១៨ ដែលជាឱកាសឲ្យពលរដ្ឋជ្រើសរើសនរណាដែលនឹងអាចដឹកនាំប្រទេសកម្ពុជាតាមការបោះឆ្នោតមួយត្រឹមត្រូវ និងយុត្តិធម៌នោះ៕