ប្រធានាធិបតីអ៊ុយក្រែនលោក Volodymyr Zelenskyy កំពុងធ្វើដំណើរទៅកាន់សហរដ្ឋអាមេរិកនៅថ្ងៃពុធនេះ ដោយនឹងធ្វើទស្សនកិច្ចទៅកាន់សេតវិមាននិងថ្លែងសុន្ទរកថាទៅកាន់សម័យប្រជុំរួមរបស់សភាទាំងពីរថ្នាក់របស់សហរដ្ឋអាមេរិក។
នេះគឺជាដំណើរទស្សនកិច្ចលើកដំបូងបង្អស់របស់លោកទៅក្រៅប្រទេស តាំងពីពេលដែលប្រទេសរុស្ស៊ីបានចាប់ផ្ដើមឈ្លានពានប្រទេសអ៊ុយក្រែនកាលពីខែកុម្ភៈមក។
លោក Zelenskyy បានសរសេរនៅលើ Twitter នៅព្រឹកថ្ងៃពុធនេះថា លោកកំពុងធ្វើដំណើរទៅកាន់សហរដ្ឋអាមេរិក «ដើម្បីពង្រឹងភាពធន់និងសមត្ថភាពផ្នែកការពាររបស់អ៊ុយក្រែន»។
មន្ត្រីជាន់ខ្ពស់មួយរូបរបស់រដ្ឋាភិបាលអាមេរិកបានប្រាប់អ្នកកាសែតថា ប្រធានាធិបតីអាមេរិកលោក Joe Biden បានអញ្ជើញលោក Zelenskyy ឱ្យមកជួបលោក ក្រុមសន្តិសុខជាតិរបស់លោក និងគណៈរដ្ឋមន្ត្រីរបស់លោក។
មន្ត្រីរូបនេះបានបញ្ជាក់ទៀតថា ការពិភាក្សានៅក្នុងដំណើរទស្សនកិច្ចរបស់លោក Zelenskyy នេះនឹងរួមមាន «ការពិភាក្សាស៊ីជម្រៅផ្នែកយុទ្ធសាស្ត្រអំពីវិធីឆ្ពោះទៅមុខនៅសមរភូមិប្រយុទ្ធ» សព្វាវុធនិងការបណ្ដុះបណ្ដាលអ្វីខ្លះដែលសហរដ្ឋអាមេរិកនិងសម្ព័ន្ធមិត្តដទៃទៀតអាចផ្ដល់ជូនប្រទេសអ៊ុយក្រែន និងជំនួយផ្នែកសេដ្ឋកិច្ច ថាមពល និងមនុស្សធម៌។
មន្ត្រីរូបនេះបានថ្លែងដូច្នេះថា៖ «លោកប្រធានាធិបតី Biden នឹងមានឱកាសដើម្បីគូសបញ្ជាក់បន្ថែមថា ការគាំទ្រនេះគឺមិនត្រឹមតែអំពីអ្វីដែលយើងបានធ្វើពីមុននោះទេ ប៉ុន្តែថែមទាំងអំពីអ្វីដែលយើងនឹងធ្វើនៅពេលបច្ចុប្បន្ននិងអ្វីដែលយើងនឹងបន្តធ្វើរហូតមិនថាយូរប៉ុណ្ណានោះទេ»។
មន្ត្រីរូបនេះបានលើកឡើងថា សហរដ្ឋអាមេរិកនឹងប្រកាសអំពីកញ្ចប់ជំនួយយោធាថ្មីសម្រាប់ប្រទេសអ៊ុយក្រែនដែលនឹងរួមមានប្រព័ន្ធមីស៊ីល Patriot ផងដែរ ដែលជាប្រព័ន្ធការពារដែនអាកាសទំនើបជាងអ្វីដែលអ៊ុយក្រែនអាចមានលទ្ធភាពប្រើប្រាស់បានពីមុន។
មន្ត្រីរូបនោះបានបន្តថា សុន្ទរកថារបស់លោក Zelenskyy ទៅកាន់សភាសហរដ្ឋអាមេរិកនឹងបង្ហាញជាពិសេសអំពីលក្ខណៈនៃការគាំទ្ររបស់សហរដ្ឋអាមេរិកចំពោះប្រទេសអ៊ុយក្រែនដែលមានការគាំទ្រពីគណបក្សទាំងពីររបស់អាមេរិក។
មន្ត្រីរូបនេះបានបន្ថែមថា ដំណើរទស្សនកិច្ចរបស់លោក Zelenskyy នេះបង្ហាញឱ្យឃើញអំពីសារៈសំខាន់ជានិមិត្តរូបនៅក្នុងសហរដ្ឋអាមេរិក ប្រទេសអ៊ុយក្រែន និងកន្លែងផ្សេងទៀតនៅលើពិភពលោក ដោយផ្ដល់ឱកាសឱ្យ «គូសបញ្ជាក់អំពីការតាំងចិត្តជាបន្តរហូតរបស់សហរដ្ឋអាមេរិកចំពោះប្រទេសអ៊ុយក្រែន»៕
