ប្រទេសអ៊ុយក្រែននិងគណៈកម្មការអឺរ៉ុបនៃសហភាពអឺរ៉ុបនឹងវាយតម្លៃក្នុងពេលឆាប់ៗខាងមុខនេះលើដំណើរវិវឌ្ឍន៍ដែលអ៊ុយក្រែនសម្រេចបាននៅក្នុងការសម្របច្បាប់របស់ខ្លួនតាមច្បាប់របស់សហភាពអឺរ៉ុប ហើយនឹងបង្កើតនូវក្របខ័ណ្ឌមួយសម្រាប់ការពិភាក្សាអំពីការចូលជាសមាជិកសហភាពអឺរ៉ុបដែលគ្រោងធ្វើឡើងនៅឆ្នាំក្រោយ។ នេះបើតាមការបញ្ជក់របស់ប្រធានាធិបតីអ៊ុយក្រែនលោក Volodymyr Zelenskyy នៅក្នុងសុន្ទរកថាជាវីដេអូរបស់លោកកាលពីយប់ថ្ងៃអាទិត្យ។
លោក Zelenskyy បាននិយាយថា៖ «នៅក្នុងរយៈពេលប៉ុន្មានថ្ងៃខាងមុខ យើងនឹងចាប់ផ្ដើមជាផ្លូវការជាមួយគណៈកម្មការអឺរ៉ុបនូវដំណើរការវាយតម្លៃច្បាប់របស់អ៊ុយក្រែនដើម្បីឱ្យស្របជាមួយនឹងច្បាប់របស់សហភាពអឺរ៉ុប ដែលនេះជាដំណើរការត្រួតពិនិត្យ»។
គណៈកម្មការអឺរ៉ុបបានរាយការណ៍កាលពីខែមុនថា អ៊ុយក្រែនបានបំពេញតាមអនុសាសន៍ ៤ ក្នុងចំណោម ៧ សម្រាប់ការចរចាចូលជាសមាជិកសហភាពអឺរ៉ុប ដែលក្នុងនោះរួមមានទាំងការជ្រើសរើសមន្ត្រីប្រឆាំងអំពើពុករលួយ ការត្រៀមសើរើខ្លាំងក្លាលើអង្គតុលាការ និងការធ្វើឱ្យច្បាប់ប្រព័ន្ធផ្សព្វផ្សាយស្របតាមស្ដង់ដាររបស់សហភាពអឺរ៉ុបផងដែរ។
គណៈកម្មការអឺរ៉ុបបានបញ្ជាក់ថា ខ្លួននឹងវាយតម្លៃលើដំណើរវិវឌ្ឍន៍របស់អ៊ុយក្រែនម្ដងទៀតនៅខែមីនាឆ្នាំក្រោយ ដែលនេះជាផ្នែកមួយនៃមាគ៌ាដ៏វែងឆ្ងាយនិងស្មុគស្មាញក្នុងការចូលជាសមាជិកសហភាពអឺរ៉ុប ដែលឯកអគ្គរដ្ឋទូតសហភាពអឺរ៉ុបប្រចាំប្រទេសអ៊ុយក្រែនអ្នកស្រី Katarina Mathernova ថាមានលក្ខណៈហត់នឿយខ្លាំង។
កាលពីសប្ដាហ៍មុន ថ្នាក់ដឹកនាំសហភាពអឺរ៉ុបបានឯកភាពគ្នានៅក្នុងការបើកការចរចាជាមួយអ៊ុយក្រែនអំពីរឿងសមាជិកភាពនេះនៅក្នុងការសម្រេចដ៏ភ្ញាក់ផ្អើលមួយនៅក្នុងកិច្ចប្រជុំរយៈពេល ២ ថ្ងៃរបស់ប្រទេសជាសមាជិកទាំង ២៧ នៃសហភាពអឺរ៉ុប។
នៅក្នុងរឿងដាច់ដោយឡែកមួយទៀត យោធាអ៊ុយក្រែនបានបញ្ជាក់នៅថ្ងៃចន្ទនេះថា ខ្លួនបានបាញ់ទម្លាក់ដ្រូនទាំង ៥ គ្រឿងដែលរុស្ស៊ីបានប្រើនៅក្នុងការប៉ុនប៉ងវាយប្រហារកាលពីយប់មិញ។
កងទ័ពជើងអាកាសអ៊ុយក្រែនបានលើកឡើងថា ដ្រូនទាំងនេះត្រូវបានបាញ់ទម្លាក់នៅទីតាំង ៤ ផ្សេងគ្នានៅក្នុងប្រទេសអ៊ុយក្រែនដែលនោះគឺតំបន់ Mykolaiv តំបន់ Dnipropetrovsk តំបន់ Vinnytsia និងតំបន់ Khmelnytskyi។
គេមិនឃើញមានសេចក្ដីរាយការណ៍ណាមួយថាមានអ្នកស្លាប់ឬក៏រងរបួសឬក៏ការខូចខាតណាមួយទេនៅលើដីដោយសារកម្ទេចកំទីបាក់បែករបស់ដ្រូនទាំងនោះដែលធ្លាក់ចុះមក៕
ព័ត៌មានខ្លះសម្រាប់សេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP, AFP និង Reuters។
