សហភាពអឺរ៉ុបមិនបានយល់ស្របគ្នាលើកញ្ចប់ជំនួយហិរញ្ញវត្ថុមានទឹកប្រាក់ ៥៤ ពាន់លានដុល្លារ ដែលអ៊ុយក្រែនត្រូវការខ្លាំងណាស់ដើម្បីឱ្យមានដំណើរការក្នុងប្រទេស ទោះបីជាប្លុកប្រទេសទាំងនេះសម្រេចបើកការចរចាឱ្យប្រទេសដាច់ដាចដោយសង្គ្រាមនេះបានចូលជាសមាជិកក៏ដោយ។
នាយករដ្ឋមន្ត្រីប្រទេសហុងគ្រី លោក Viktor Orban បានបោះឆ្នោតវ៉េតូប្រឆាំងនឹងការផ្តល់ជំនួយនេះ។
នេះជាដំណើរថយក្រោយមួយទៀតដល់ប្រធានាធិបតីអ៊ុយក្រែនលោក Volodymyr Zelenskyy ក្រោយពីលោកមិនបានជោគជ័យក្នុងការបញ្ចុះបញ្ចូលពួកសមាជិកសភាអាមេរិកឱ្យផ្តល់ជំនួយបន្ថែម ៦១ ពាន់លានដុល្លារទៀតដល់អ៊ុយក្រែន ភាគច្រើនដើម្បីទិញអាវុធពីសហរដ្ឋអាមេរិក។
អ៊ុយក្រែនពឹងពាក់ខ្លាំងណាស់លើប្រាក់ជំនួយសហភាពអឺរ៉ុបដើម្បីជួយដល់សេដ្ឋកិច្ចខ្លួននៅឆ្នាំក្រោយ។ ប៉ុន្តែប្រធានក្រុមប្រឹក្សាអឺរ៉ុបបានហៅសេចក្តីសម្រេចកាលពីថ្ងៃព្រហស្បតិ៍ឱ្យបើកការចរចាអំពីការចូលជាសមាជិករបស់អ៊ុយក្រែនថាជា «សញ្ញាច្បាស់លាស់មួយនៃសេចក្តីសង្ឃឹមសម្រាប់ប្រជាពលរដ្ឋពួកគេនិងទ្វីបរបស់យើង»៕
