សន្តិសុខត្រូវបានរឹតបន្តឹង នៅតាមទីក្រុងនានាជុំវិញពិភពលោក ដោយសារតែការព្រមានថា អំពើភេរវកម្ម អាចកើតមានឡើង នៅពេលដែលទីក្រុងទាំងនោះ ត្រៀមប្រារព្ធពិធីចូលឆ្នាំថ្មីឆ្នាំសកល។
ទីក្រុងស៊ីដនី នៅអូស្ត្រាលី នឹងក្លាយជាទីក្រុងដំបូងគេមួយ ដែលប្រារព្ធការចាប់ផ្តើមឆ្នាំថ្មី២០១៦ ដោយមានពិធីបាញ់កាំជ្រួចដ៏ច្រើនបំផុតមិនធ្លាប់មាន គឺកាំជ្រួចរហូតដល់ទៅ៧តោន ដែលត្រូវចំណាយទឹកប្រាក់អស់ជាង៥លានដុល្លារ សម្រាប់ពិធីបាញ់កាំជ្រួចរយៈពេល១២នាទីនោះ។
ប៉ុន្តែ ទីក្រុងហ្សាការតា នៅឥណ្ឌូនេស៊ី កំពុងប្រុងជើងការខ្ពស់នៅឆ្នាំនេះ ក្រោយពីប៉ូលិសបានរកឃើញ ផែនការវាយប្រហារភេរវកម្មមួយ ដែលគេសង្ស័យថា ត្រូវបានគ្រោងប្រព្រឹត្តនៅក្នុងទីក្រុងនោះ ក្នុងអំឡុងពេលប្រារព្ធពិធីចូលឆ្នាំថ្មីនេះ។
ចំណែកឯ អភិបាលក្រុង ព្រុចសែលវិញ បានលុបចោលការប្រារព្ធពិធីឆ្លងឆ្នាំថ្មីប្រចាំឆ្នាំនៅក្នុងរដ្ឋធានីនៃប្រទេសបែលហ្ស៊ិកនោះ ដោយសារតែការការគំរាមភេរវកម្មមួយ។
លោក អភិបាលក្រុងនោះគឺលោក Yvan Mayeur មានប្រសាសន៍ថា យោងតាមការវិភាគមួយរបស់មជ្ឈមណ្ឌលគ្រប់គ្រងវិបត្តិ គេមិនអាចត្រួតពិនិត្យសន្តិសុខ មនុស្សរ៉ាប់ម៉ឺននាក់ ដែលគេរំពឹងថា នឹងចេញទៅមើលការបាញ់កាំជ្រួចនោះបានទេ។
ទន្ទឹមពេលជាមួយគ្នានេះ ប៉ូលិសបែលហ្ស៊ិក បានប្រកាសនៅថ្ងៃសុក្រនេះថា ពួកគេ បានចាប់ខ្លួនជនសង្ស័យទី១០ ដែលជាប់ពាក់ព័ន្ធនឹងការវាយប្រហារនៅទីក្រុងប៉ារីស កាលពីថ្ងៃទី១៣ ខែវិច្ឆិកា ដែលបានសម្លាប់មនុស្សអស់១៣០នាក់នោះហើយ។
ប៉ូលិសបែលហ្ស៊ិក បានចាប់ខ្លួនមនុស្ស២នាក់ កាលពីដើមសប្ដាហ៍នេះ ក្រោមបទចោទថា ជនទាំងពីរនាក់នោះ កំពុងរៀបចំផែនការវាយប្រហារភេរវកម្ម ទៅលើអ្វីដែលពួកគេ ហៅថា ជាគោលដៅ «និមិត្តរូប»។
ជនឥស្លាមជ្រុលនិយម៤នាក់ ដែលបានសម្លាប់មនុស្សអស់១៣០នាក់ នៅក្នុងការវាយប្រហារភេរវកម្មផ្ទួនៗគ្នាក្នុងទីក្រុងប៉ារីសនោះ គឺចេញពីប្រទេសបែលហ្ស៊ិក៕
