តាំងពីក្លាយជាមេដឹកនាំតូចតាចមួយ រហូតដល់ប្រធានាធិបតី ការតែងតាំងសារជាថ្មីឲ្យប្រធានាធិបតីចិនស៊ី ជីនពីង កាន់តំណែងរយៈពេល៥ឆ្នាំទៀតជាមេដឹកនាំគណបក្សកុម្មុយនិស្តកាលពីថ្ងៃពុធជាកម្រិតខ្ពស់បំផុតទៅកាន់ការកាន់អំណាច។
លោក ស៊ី បានកើតនៅឆ្នាំ១៩៥៣ ដែលមានឪពុកឈ្មោះ Xi Zhongxun ជាបិតាបង្កើតគណបក្សកុម្មុយនិស្តចិនម្នាក់ យុវជន ស៊ី បានត្រូវគេបង្ខំឲ្យធ្វើការជាទម្ងន់អស់រយៈពេល៧ឆ្នាំនៅភូមិ Liangjiahe ដែលជាភូមិដាច់ស្រយាលមួយក្នុងអំឡុងនៃបដិវត្តន៍វប្បធម៌ បន្ទាប់ពីឪពុករបស់លោកបានត្រូវគេកម្ចាត់ចេញពីគណបក្សហើយត្រូវបានជាប់ពន្ធនាគារ។
លោក ស៊ី បាននៅរស់រានមានជីវិតពីបទពិសោធន៍ដ៏ជូរចត់នេះហើយបានចូលសិក្សានៅសាកលវិទ្យាល័យ Tsinghua ដែលនៅទីនោះលោកបានទទួលសញ្ញាប័ត្រខាងវិស្វកម្មនៅឆ្នាំ១៩៧៩។ បន្ទាប់មកលោកបានចូលក្នុងគណបក្សកុម្មុយនិស្ត ដោយបានចាប់ផ្តើមជាអគ្គលេខាធិការរងរបស់ខេត្ត Hubei មុនពេលឡើងកាន់តំណែងជាប្រធានបក្សទទួលបន្ទុកសេដ្ឋកិច្ចនៅទីក្រុងសៀងហៃដែលជាមជ្ឈមណ្ឌលពាណិជ្ជកម្ម។
កិត្តនាមរបស់លោកឡើងកាន់តែខ្ពស់ឡើងបន្ទាប់ពីលោកបានត្រូវតែងតាំងនៅក្នុងឆ្នាំ២០០៧ជាសមាជិកគណៈកម្មាធិការការិយាល័យនយោបាយ ដែលអង្គការធ្វើការសម្រេចកំពូលរបស់ប្រទេសចិន នៅទីបំផុតលោកបានក្លាយជាអគ្គលេខាធិការបក្សនៅឆ្នាំ២០១២ ហើយនិងក្លាយជាប្រធានាធិបតីមួយឆ្នាំក្រោយ។ នៅក្រោមការដឹកនាំរបស់លោក ស៊ី ចិនបានដើរតួនាទីកាន់តែខ្លាំងឡើងនៅក្នុងកិច្ចការតំបន់ និងក្នុងសាកលលោក រួមមានការស្ថាបនាទីតាំងយោធានៅតំបន់ថ្មប៉ប្រះទឹក និងកោះដែលគ្មានមនុស្សរស់នៅនៅទូទាំងសមុទ្រចិនខាងត្បូង ដោយមិនអើពើពីការប្រកួតប្រជែងទាមទារទឹកដីដែលធ្វើឡើងដោយប្រទេសជិតខាងនានានៅក្នុងតំបន់អាស៊ី និងមហាសមុទ្រប៉ាស៊ីហ្វិក។
លោកក៏បានចាប់ផ្តើមយុទ្ធនាការដ៏គគ្លើនប្រឆាំងនឹងអំពើពុករលួយដែលបាននាំឲ្យមានការដាក់ទោសពួកមន្ត្រីគណបក្សកុម្មុយនិស្តជាង១លាននាក់៕
