ប្រធានាធិបតីចិន លោក Xi Jinping នៅថ្ងៃចន្ទនេះ បានផ្ញើសារអបអរសាទរខួប៧០ឆ្នាំនៃការបង្កើតគណបក្សប្រជាជនកម្ពុជា ដោយលោកសន្យាថាចិននឹងបន្តគាំទ្រកម្ពុជាដែលជាមិត្តដែកថែបរបស់ចិន។ នេះបើយោងតាមសារព័ត៌មានរបស់រដ្ឋចិន។
បណ្តាញសារព័ត៌មាន CGTN ដែលជាទូរទស្សន៍រដ្ឋរបស់ចិន បានចុះផ្សាយអត្ថបទជាភាសាអង់គ្លេសថា លោក Xi បានជូនពរដល់លោកនាយករដ្ឋមន្រ្តី ហ៊ុន សែន គណបក្សប្រជាជនកម្ពុជានិងប្រជាជនកម្ពុជា។ លោកបានធានាអះអាងចំពោះលោក ហ៊ុន សែន ដែលជាប្រធានគណបក្សកាន់អំណាចថា ប្រទេសចិន«នឹងបន្តគាំទ្រកម្ពុជា»សម្រាប់ដំណើរអភិវឌ្ឍន៍។
លោក Xi ក៏បានបង្ហាញនូវជំនឿចិត្តពេញទំហឹងថា គណបក្សប្រជាជនកម្ពុជាដែលស្ថិតក្រោមការដឹកនាំរបស់លោក ហ៊ុន សែន នឹងរួមចំណែកកាន់តែខ្លាំងក្លាក្នុងការអភិវឌ្ឍប្រទេស និងជួយដល់ប្រជាជន ក៏ដូចជារួមចំណែកសម្រាប់សន្តិភាព និងការអភិវឌ្ឍក្នុងតំបន់។
រដ្ឋាភិបាលរបស់លោក ហ៊ុន សែន ត្រូវបានរិះគន់ដោយប្រទេសលោកខាងលិចថា បានបំផ្លាញលទ្ធិប្រជាធិបតេយ្យ ក្រោយរំលាយគណបក្សសង្រ្គោះជាតិ និងការរឹតត្បិតសិទ្ធិសេរីភាពរបស់ប្រជាពលរដ្ឋ។
នៅក្នុងជំនួបមួយជាមួយលោកនាយករដ្ឋមន្រ្តី ហ៊ុន សែន កាលពីដើមខែមិថុនា អនុរដ្ឋមន្រ្តីការបរទេសអាមេរិក អ្នកស្រី Wendy Sherman បានជំរុញឲ្យការដឹកនាំរបស់កម្ពុជា«ត្រូវរក្សានូវគោលនយោបាយការបរទេសដែលមានតុល្យភាពនិងឯករាជ្យមួយ ដើម្បីជាប្រយោជន៍ដ៏ល្អបំផុតសម្រាប់ប្រជាជនកម្ពុជា»។
ក្នុងឱកាសខួប៧០ឆ្នាំនៃការបង្កើតគណបក្សប្រជាជនចាប់តាំងពីឆ្នាំ១៩៥១មក លោក ហ៊ុន សែន ដែលជាប្រធានគណបក្សកាន់អំណាច បានផ្ញើសារដែលបង្ហាញពីការស្តារប្រទេសជាតិ ក្រោយការដួលរំលំរបបខ្មែរក្រហម ការបង្កើតរដ្ឋធម្មនុញ្ញថ្មី ការបង្កើតសន្តិភាពពេញលេញ ការលើកស្ទួយលទ្ធិប្រជាធិបតេយ្យ និងសិទ្ធិសេរីភាពរបស់ពលរដ្ឋ ក៏ដូចជាការអភិវឌ្ឍសង្គមសេដ្ឋកិច្ច៕
