ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ធនាគារ​ពិភពលោក៖ ​សេដ្ឋកិច្ច​កម្ពុជា​នៅខ្លាំង ​តែ​អាច​ប៉ះពាល់​បើ​អាមេរិក និង​អឺរ៉ុប​បិទ​ទីផ្សារ


រូបឯកសារ៖ ​កម្មករ​សំណង់​ម្នាក់កំពុងធ្វើការ​លើអគារមួយ​ នៅ​រាជធានី​ភ្នំពេញ​ កាល​ពី​ថ្ងៃទី​៩ ខែ​មីនា​ ឆ្នាំ​២០១៦។​

ដោយ​ការ​ព្យាករណ៍​ថា សេដ្ឋកិច្ច​កម្ពុជា​ នឹង​បន្តរីក​ចម្រើន​ខ្លាំងក្លា​សម្រាប់​ឆ្នាំ​២០១៨ ធនាគារ​ពិភព​លោក​ដែល​មាន​មូលដ្ឋាន​នៅ​សហរដ្ឋអាមេរិក​ ​ក៏​បាន​ឲ្យដឹង​ពី​ហានិភ័យ​ដែល​អាច​នឹង​បង្ក​ឡើង​នៅ​ឆ្នាំ​នេះ។

ធនាគារ​ពិភពលោក​នៅ​ថ្ងៃ​ព្រហស្បតិ៍​នេះ​ ​បាន​ប៉ាន់​ស្មាន​ទុក​ជា​មុន​ថា​ ​កំណើន​សេដ្ឋកិច្ច​កម្ពុជា​ នឹង​នៅ​តែមាន​ភាព​រឹងមាំ​ ​និង​មានកំណើន​ ​៦,៩​ភាគរយ​នៅឆ្នាំ​ ២០១៨​ ​ដោយ​សារ​តែ​ការនាំចេញ​វាយនភ័ណ្ឌ​ ​និង​សម្លៀកបំពាក់​ បាន​ស្ទុះឡើងវិញ​ ​ខណៈ​ដែល​វិស័យ​ទេសចរ​ណ៍​ និង​កសិកម្មបាន​បន្ត​ងើបឡើង​តទៅទៀត។​ ​កំណើន​នេះ​គឺ​ខ្ពស់​ជាង​ ​កំណើន​សេដ្ឋកិច្ច​ពិត​ក្នុង​ឆ្នាំ​២០១៧ ដែល​ត្រូវបាន​ប៉ាន់ស្មាន​ថា​នឹង​ថមថុយ​ចុះមក​ត្រឹម​៦,៨​ភាគរយ។

ដោយ​សារ​ឆ្នាំ​២០១៨​ ជាឆ្នាំ​នៃ​ការ​បោះឆ្នោត​ជ្រើស​រើស​តំណាង​រាស្ត្រ​ដ៏​ចម្រូង​ចម្រាស​នោះ​ ធនាគារ​ពិភព​លោក​ មាន​ការ​ប្រយ័ត្ន​ប្រយែង​ ​ចំពោះ​ការ​អធិប្បាយ​ទៅ​លើ​ផល​ប៉ះពាល់​នានា​ ​ដែល​អាចបណ្តាល​មក​ពី​ការ​ដាក់​ទណ្ឌកម្ម​សេដ្ឋកិច្ច​របស់​សហរដ្ឋ​អាមេរិក​ និង​សហភាព​អឺរ៉ុប​ ក្នុង​ករណី​ដែល​ការ​បោះឆ្នោត​ត្រូវបាន​រៀបចំ​ឡើង​ដោយ​មិន​មាន​ការ​ចូលរួម​ពី​គណបក្ស​សង្គ្រោះជាតិ​ ដែល​ត្រូវ​បាន​រំលាយ​តាម​បណ្តឹង​របស់​រដ្ឋាភិបាល​កាលពី​ឆ្នាំ​មុន។

ដោយ​ការ​ព្យាករណ៍​ថា សេដ្ឋកិច្ច​កម្ពុជា​ នឹង​បន្តរីក​ចម្រើន​ខ្លាំងក្លា​សម្រាប់​ឆ្នាំ​២០១៨ ធនាគារ​ពិភព​លោក​ដែល​មាន​មូលដ្ឋាន​នៅ​សហរដ្ឋអាមេរិក​ ​ក៏​បាន​ឲ្យដឹង​ពី​ហានិភ័យ​ដែល​អាច​នឹង​បង្ក​ឡើង​នៅ​ឆ្នាំ​នេះ។

យោង​តាម​របាយការណ៍​សង្ខេប​ស្តីពី​ការ​ប្រមើ​មើល​នៃ​កំណើន​សេដ្ឋកិច្ច​កម្ពុជា​ក្នុងឆ្នាំ២០១៨​ បាន​ឲ្យ​ដឹង​ថា៖

«ហានិភ័យ​ដែល​ធ្វើ​ឲ្យ​ប៉ះពាល់​ដល់​លើ​ទស្សនវិស័យ​សេដ្ឋកិច្ច ​រួមមានភាព​ធ្លាក់​ចុះ​នៃ​ការ​ប្រកួត​ប្រជែង​ក្នុងការ​នាំចេញ​ ដោយសារ​តែ​ការ​កើន​ឡើង​នៃ​ប្រាក់​ឈ្នួលពិតឆាប់​រហ័ស​ ហានិភ័យ​នា​នា​ដែល​ទាក់​ទងនឹង​ការ​អូសបន្លាយ​នៃ​ការ​រីក​ចម្រើន​ដ៏​ខ្លាំងក្លា​នៃ​វិស័យ​សំណង់​ និង​ភាព​មិន​ប្រាកដ​ប្រជា​ ដែល​អាច​កើត​មាន​ពាក់​ព័ន្ធ​នឹង​ការ​បោះឆ្នោត»។​

រូបឯកសារ៖ កម្មការិនីកំពុង​ធ្វើការ​នៅ​ក្នុង​រោងចក្រ​កាត់ដេរ​មួយនៅ​រាជធានី​ភ្នំពេញ កាលពីថ្ងៃទី២៨ ខែមីនា ឆ្នាំ២០១៦។
រូបឯកសារ៖ កម្មការិនីកំពុង​ធ្វើការ​នៅ​ក្នុង​រោងចក្រ​កាត់ដេរ​មួយនៅ​រាជធានី​ភ្នំពេញ កាលពីថ្ងៃទី២៨ ខែមីនា ឆ្នាំ២០១៦។

របាយការណ៍​បាន​បញ្ជាក់​ឲ្យ​ដឹង​ទៀតថា​ ​បន្ថែម​ពី​លើ​នេះ​ ទស្សនវិស័យ​សម្រាប់​ពេល​អនាគត​នៃ​កំណើន​ការងារ​ពុំសូវ​មាន​ភាពប្រាកដ​ប្រជា។​ ​ដោយ​សារ​ប្រាក់​ឈ្នួល​ពិត​កើន​ឡើង​យ៉ាង​ឆាប់​រហ័ស​ ភាព​ប្រកួតប្រជែង​របស់​កម្ពុជា​ លើ​ពាណិជ្ជកម្ម​ក្រៅប្រទេស​ ដែល​ពឹង​ផ្អែក​ជា​ចម្បង​លើ​កម្លាំង​ពល​កម្ម​ថោក​ ​កំពុង​រងការ​ប៉ះពាល់។

ការ​នាំចេញ​ទំនិញ​កាត់ដេរ​ទៅកាន់​ទីផ្សារ​សហភាព​អឺរ៉ុប ​និង​សហរដ្ឋ​អាមេរិក​ គឺជា​ផ្នែក​សំខាន់​មួយ​នៃ​ការ​ទ្រទ្រង់​កំណើន​សេដ្ឋកិច្ច​របស់​កម្ពុជា តែ​ការ​នាំចេញ​នេះ​ ក៏​កំពុង​ឃើញ​នូវ​ល្បឿន​យឺតយ៉ាវ​មួយ។

របាយការណ៍រ​បស់​ធនាគារ​ពិភពលោក​មាន​ចំណង​ជើង​ថា​ ​«បង្កើន​សក្តានុពល»​ ​(Enhancing Potential)​ ​ចេញផ្សាយ​នៅខែ​មេសា​ ឆ្នាំ​២០១៨​នេះ​ ​បាន​បញ្ជាក់​ឲ្យដឹង​ថា​ ការ​នាំចេញ​វាយនភ័ណ្ឌ​ និង​សម្លៀក​បំពាក់​ទៅកាន់​សហភាព​អឺរ៉ុប​ ​(រួមទាំង​ចក្រភព​អង់គ្លេស​)​ ក្នុង​ខែ​ធ្នូ​ ឆ្នាំ​២០១៧​ បាន​កើន​ឡើង​ដល់​ ​១៩,៦​ភាគរយ​ ​ធៀបនឹង​ឆ្នាំ​មុន​ ​ខណៈ​ដែល​ការ​នាំ​ចេញ​ ក្នុងខែ​កក្កដា​ ឆ្នាំ​ ២០១៧​នេះ​មាន​ត្រឹម​តែ​៧,៥​ភាគរយ។

របាយការណ៍​ដដែល​បាន​សរសេរ​ថា៖​ ​«ជារួម​កំណើន​នៃ​ការ​នាំចេញ​ ផលិតផល​វាយ​នភណ្ឌ​ ​និង​សម្លៀក​បំពាក់​ថយ​ល្បឿន​ពី​ ៨,៤ភាគរយ​ក្នុងឆ្នាំ​២០១៦​ ​មកត្រឹម ៧,៧ភាគរយ​ក្នុង​ឆ្នាំ​ ២០១៧»។

លោក​ ស៊ុឌៀ សេតទី​ ​(Sudhir Shetty)​ ​ប្រធាន​សេដ្ឋ​វិទូ​របស់​ធនាគារ​ពិភពលោក​ប្រចាំ​តំបន់​អាស៊ីបូព៌ា​ និង​ប៉ាស៊ីហ្វ៊ិក​ ថ្លែង​ថា​ ប្រសិនបើ​សហភាព​អឺរ៉ុប និង​សហរដ្ឋអាមេរិក​ បិទទីផ្សារ​ទំាងស្រុង សម្រាប់​ការ​នាំ​ចេញ​ផលិតផល​សម្លៀក​បំពាក់​របស់​កម្ពុជា​ ផល​ប៉ះពាល់​នឹង​កើត​មាន​ដល់​សេដ្ឋកិច្ច កម្ពុជា។

ក៏ប៉ុន្តែ​ លោក​មិន​អាច​ឲ្យដឹង​ពី​ទំហំ​នៃ​ផលប៉ះពាល់​នោះឡើយ។ លោក​ថា​ ការ​ប៉ាន់​ស្មាន​អំពី​កំណើន​សេដ្ឋកិច្ច​កម្ពុជា​ មិន​បាន​ធ្វើ​ឡើង​ដោយ​ភ្ជាប់​នឹង​ការ​បិទ​ទីផ្សារ​ធំៗ​ទាំងពីរ​នេះ​ សម្រាប់​ទំនិញ​កាត់​ដេរ​របស់​កម្ពុជា​នោះ​ឡើយ។

«ការ​ប៉ាន់​ស្មាន​របស់​ពួកយើង​អំពី​កំណើន​នៅ​កម្ពុជា ​ត្រូវបានផ្អែក​លើ​ការ​វាយ​តម្លៃ​មួយ​ដែល​ អ្វីៗ​នឹង​មិន​ឈាន​ដល់​ដំណាក់កាល ដែល​ការ​នាំចេញ​របស់​កម្ពុជា​ត្រូវបាន​បិទ​ទាំងស្រុង​ពី​ទីផ្សារ​ទាំងនេះ​ទេ។ ប៉ុន្តែ​អ្នក​បាន​លើក​ឡើង​អំពី​ចំណុចល្អ​ ដែល​ផ្សារ​ទាំង​នេះ​ គឺជា​ទីផ្សារ​សំខាន់​សម្រាប់​ការ​នាំ​ចេញ​របស់​កម្ពុជា។​ ​ដូច្នេះ​វា​នឹង​មាន​ផល​ប៉ះពាល់​ ប្រសិនបើ​ការ​ពិត​ ទីផ្សារ​ទាំង​នេះ​ ត្រូវបាន​បិទមែន​នោះ»។

បន្ទាប់ពី​ការ​អះអាង​របស់​គណបក្ស​ប្រជាជនកម្ពុជា​ថា​ ខ្លួន​ទទួល​បាន​អាសនៈ​ទាំងអស់​នៅ​ព្រឹទ្ធ​សភា​ពីការ​បោះឆ្នោត​ព្រឹទ្ធសភា​កាលពី​ចុង​ខែ​កុម្ភៈ ដែល​គ្មាន​គណបក្ស​សង្គ្រោះជាតិ​ចូលរួម​នោះ សហភាព​អឺរ៉ុប​បាន​គំរាម​ដាក់​ទណ្ឌកម្ម​សេដ្ឋកិច្ច​ប្រទេស​កម្ពុជា។

នាគ្រា​នោះ​ អ្នកស្រី​ ​Federica Mogherini​ ​មេដឹកនាំ​គោលនយោបាយ​ការបរទេស​សហភាព​អឺរ៉ុប ​បាន​ប្រាប់​សន្និសីទ​ព័ត៌មាន​មួយ​ថា​ ក្រុមប្រឹក្សា​សហភាព​អឺរ៉ុប​បាន​ពិចារណា​វិធានការ​ប្រឆាំង​រដ្ឋាភិបាល​កម្ពុជា។

អ្នកស្រី​និយាយ​ថា​ សហភាព​អឺរ៉ុប​កំពុង​ពិនិត្យ​ឡើងវិញ​នូវ​កិច្ច​ព្រម​ព្រៀង​ពាណិជ្ជកម្ម​អនុគ្រោះពន្ធ​លើ​ទំនិញ​គ្រប់បែប​យ៉ាង​លើក​លែងអាវុធ​សម្រាប់​ប្រទេស​កម្ពុជា។​ កិច្ចព្រមព្រៀង​នេះ​អនុញ្ញាត​ឱ្យ​កម្ពុជា​ទទួល​បាន​ការ​អនុគ្រោះ​ពន្ធ​នៅ​ទីផ្សារ​អឺរ៉ុប ​ដែល​មាន​ប្រជាជន​ប្រមាណ​ ៥០០លាននាក់។

ជាងនេះ​ទៅ​ទៀត​ ក្រុមហ៊ុន​សម្ព័ន្ធមិត្ត​មួយ​ដែល​មាន​សមាគម​ឧស្សហកម្ម​កាត់ដេរ​សម្លៀក​បំពាក់ ស្បែក​ជើង និង​សមាគម​ផ្សេងទៀត​របស់​ ស.រ.អា និង​អង់គ្លេស ​ហើយ​និង​សហភាព​អឺរ៉ុប​ បាន​ទទូច​ឲ្យ​លោក​នាយក​រដ្ឋមន្ត្រី ហ៊ុន សែន នៃ​ប្រទេស​កម្ពុជា​ចាត់​វិធានការ​កែទម្រង់​ស្ថានភាព​សិទ្ធិ​មនុស្ស​និង​ពលកម្ម។

ការ​ទទូច​ពី​ក្រុម​សមាគម​ដែល​មាន​ឥទ្ធិពល​លើ​ក្រុម​អ្នកបញ្ជា​ទិញ​ធំៗ​ក្នុង​ប្រទេស​ទាំងនេះ​ បាន​ធ្វើ​ឡើង​ក្នុង​លិខិត​ចំហ​មួយ​ទៅកាន់​លោក​នាយក​រដ្ឋមន្ត្រី ហ៊ុន សែន កាលពី​ថ្ងៃទី​២០ ​ខែមីនា។

នៅក្នុង​លិខិត​ចំហ​ដដែល​នោះ ​បាន​បង្ហាញ​ពី​ក្តី​បារម្ភ​កាន់តែ​ខ្លាំង​ចំពោះ​ការធ្វើ​ទុក្ខ​បុកម្នេញ ការ​រឹត​ត្បិត​លើ​សកម្មភាព​សហជីព ​និង​ស្ថាប័ន​ក្រុមប្រឹក្សា​អាជ្ញា​កណ្តាល ការ​បង្ក្រាប​លើ​គណបក្ស​ជំទាស់ ​និង​សង្គម​ស៊ីវិល​ឯករាជ្យ ហើយនឹង​ការ​យាយី​ដល់​មេដឹកនាំ​សហជីព​មួយ​ចំនួន​ មុន​ការ​បោះឆ្នោត​ខាងមុខ​ផងដែរ។

គណបក្ស​ប្រឆាំង​ដ៏​សំខាន់​នៅ​កម្ពុជា​គឺ​គណបក្ស​សង្គ្រោះជាតិបង្កើត​ឡើង​ដោយ​លោក​ សម រង្ស៊ី​ និង​លោក​ កឹម សុខា​ ត្រូវបាន​រំលាយ​ដោយ​តុលាការ​កំពូល​កាលពីថ្ងៃទី​ ១៦ ខែ​វិច្ឆិកា​ ឆ្នាំ​ ២០១៧​ តាម​បណ្តឹង​របស់​រដ្ឋាភិបាល​កម្ពុជា​ ហើយ​សមាជិក​សភា​៥៥រូប​ និង​សមាជិក​ក្រុមប្រឹក្សា​ឃុំ​៥០០៧​នាក់​ បាន​បាត់​សិទ្ធិបោះឆ្នោត​ព្រឹទ្ធសភា។

ការ​រំលាយ​នេះ​ធ្វើឡើង បន្ទាប់​ពី​ការ​ចាប់ខ្លួន​លោក ​កឹម សុខា​ មេដឹកនាំ​គណបក្ស​សង្គ្រោះ​ជាតិ​ដោយ​ចោទ​ថា ​គ្រោង​នឹង​ផ្តួលរំលំ​រដ្ឋាភិបាល​ដោយ​មាន​ជំនួយ​ពី​សហរដ្ឋ​អាមេរិក​ ជា​ការ​ចោទ​ប្រកាន់​ដែល​លោក​ កឹម សុខា និង​សហរដ្ឋ​អាមេរិក​បាន​បដិសេធ។

រូបឯកសារ៖ ភ្ញៀវ​ទេសចរ​ជាតិ​និង​អន្តរជាតិ​ថត​រូប​ទេស​ភាព​ថ្ងៃ​លិច​នៅ​លើ​កំពូល​ប្រាសាទ​ភ្នំ​បាក់ខែង​ ខេត្ត​សៀមរាប កាល​ពី​ល្ងាច​ថ្ងៃ​ទី​២១​ ខែ​មីនា​ ឆ្នាំ​២០១៥។ (នូវ​ ពៅ​លក្ខិណា​/VOA)
រូបឯកសារ៖ ភ្ញៀវ​ទេសចរ​ជាតិ​និង​អន្តរជាតិ​ថត​រូប​ទេស​ភាព​ថ្ងៃ​លិច​នៅ​លើ​កំពូល​ប្រាសាទ​ភ្នំ​បាក់ខែង​ ខេត្ត​សៀមរាប កាល​ពី​ល្ងាច​ថ្ងៃ​ទី​២១​ ខែ​មីនា​ ឆ្នាំ​២០១៥។ (នូវ​ ពៅ​លក្ខិណា​/VOA)

យ៉ាងណា​ក៏ដោយ​ ស្ថិត​នៅ​ក្រៅ​ភាព​មិន​ប្រាកដ​ប្រជា​នៃ​ស្ថានភាព​នយោបាយ​នេះ​ ធនាគារ​ពិភព​លោក​បាន​បញ្ជាក់​ឲ្យ​ដឹង​បន្ថែមទៀត​នៃ​ការ​អភិវឌ្ឍថ្មីៗ​ របស់​សេដ្ឋកិច្ច​កម្ពុជា ក្នុងនោះ​មាន​លំហូរ​នៃ​ភ្ញៀវ​ទេសចរ​ចិន​មក​កាន់​កម្ពុជា​ ការ​ងើប​ឡើងវិញ​នៃ​វិស័យ​កសិកម្ម​ និង​កំណើន​ឥណទាន​ក្នុង​វិស័យ​សំណង់។

របាយការណ៍​ធនាគារ​ពិភពលោក​ បាន​សរសេរ​ថា​ ចំនួន​ភ្ញៀវ​ទេសចរ​បាន​កើន​ឡើង​ពី​ ៥​ភាគរយ​ក្នុង​ឆ្នាំ​២០១៦​ ដល់​១១,៨ភាគរយ​ក្នុង​ឆ្នាំ​២០១៧​ ដោយសារ​តែកិច្ច​ខិតខំ​ប្រឹងប្រែង​របស់​អាជ្ញាធរ​ ក្នុងការ​ទាក់ទាញ​ភ្ញៀវទេសចរ​ចិន​ តាមរយៈ​ការ​ដាក់​ចេញ​គំនិត​ផ្តួចផ្តើម​ «​ត្រៀម​ខ្លួន​ជាស្រេច​សម្រាប់​ចិន​»។ បន្ថែម​លើ​នេះ ​ផលិតផល​ក្នុង​វិស័យ​កសិកម្ម​បាន​ងើប​ឡើងវិញ​តាម​រយៈ​ការ​ពង្រីក​ដំណាំស្រូវ​ និង​កៅស៊ូ​ដោយសារ​លក្ខខណ្ឌ​អាកាស​ធាតុ​អំណោយផល​ និងការ​ងើបឡើង​វិញ​ជា​បណ្តើរៗ​នៃ​ថ្លៃ​ទំនិញ​កសិផល​នានា។

ទាក់ទិន​វិស័យ​សំណង់​ ឥណទាន​ផ្តល់​ឲ្យ​វិស័យ​សំណង់​ និង​អចលនទ្រព្យ​ បានកើនឡើង​ជាថ្មី​ម្តង ទៀត​ក្នុង​ឆមាស​ទី​ពីរ​នៃឆ្នាំ​២០១៧ ​ពោល​គឺ​កើន​ឡើង​ពី​២៨,៤​ ភាគរយ​នៅក្នុង​ខែ​ឧសភា​ឆ្នាំ​ ២០១៧​ ដល់​ ៣៧,១ភាគរយ​ ក្នុងខែ​វិច្ឆិកា​ ឆ្នាំ២០១៧​ ដោយសារ​ចំណង់​ចំណូល​ចិត្ត​នៃ​ការ​វិនិយោគ​លើ វិស័យ​សំណង់​ និង​អចលនទ្រព្យ​បាន​ងើប​ឡើងវិញ។

យ៉ាងណា​ក៏​ដោយ​ ធនាគារ​ពិភពលោក​បាន​ព្រមាន​ថា​ សន្ទុះ​រីក​ចម្រើន​យ៉ាងខ្លាំងក្លា​នៃវិស័យ​សំណង់​ និង​អចលន​ទ្រព្យ​ដែល​កំពុង​ដំណើរ​ការ​ តម្រូវ​ឲ្យ​មានការ​តាមដាន​ឲ្យ​បាន​ដិតដល់។

របាយការណ៍​ដដែល​របស់​ធនាគារ​ពិភពលោក​បាន​សរសេរ​ក្នុង​ន័យដើម​ថា៖ «ក្នុង​រយៈពេល​ប៉ុន្មាន​ឆ្នាំ​ចុង​ក្រោយ​នេះ​ កំណើន​ឥណទាន​ដែលផ្តល់​ឲ្យ​វិស័យ​សំណង់​ និង​អចលនទ្រព្យ​បាន​កើនឡើង។ ដូច្នេះ​ ការកាត់​បន្ថយ​វិសាលភាព​នៃ​សកម្មភាព​ទិញ​ប្រថុយប្រថាន​ គឺជា​តម្រូវការ​មួយ​ដ៏សំខាន់»។

របាយការណ៍​បាន​បន្ថែម​ថា​ ​នៅ​ក្នុង​វិស័យ​ធនាគារ​ ​និង​មីក្រូហិរញ្ញវត្ថុ​ ​កិច្ចការ​សំខាន់​ ​គឺ​ត្រូវ​អនុម័ត​គោល​ការណ៍​ណែនាំ​ ក្នុងការ​ផ្តល់​ប្រាក់​កម្ចី​ និង​ត្រូវមាន​ការ​ត្រួត​ពិនិត្យ​ឡើងវិញ​នូវ​ចំណាត់​ថ្នាក់​ឥណទាន​មិន​ដំណើរ​ការ៕

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG