ធនាគារពិភពលោកបានប្រកាសនៅថ្ងៃអាទិត្យនេះថានឹងផ្តល់មូលនិធិរហូតដល់១ពាន់លានដុល្លារដល់ប្រទេសឥណ្ឌូណេស៊ី បន្ទាប់ពីប្រទេសនេះបានរងគ្រោះដោយសារគ្រោះមហន្តរាយនាពេលថ្មីៗនេះរួមមានគ្រោះរញ្ជួយដី និងរលកយក្សស៊ូណាមីដែលបានសម្លាប់មនុស្សរាប់ពាន់នាក់។
នាយកប្រតិបត្តិរបស់ធនាគារពិភពលោក លោកស្រី Kristalina Georgieva បានប្រកាសអំពីមូលនិធិនេះនៅឯកិច្ចប្រជុំប្រចាំឆ្នាំរបស់ធនាគារពិភពលោក និងមូលនិធិរូបិយវត្ថុអន្តរជាតិ IMF ដែលប្រារព្ធធ្វើឡើងនៅកោះបាលី ប្រទេសឥណ្ឌូណេស៊ី។
គ្រោះរញ្ជួយដីដែលមានកម្លាំង៧.៥វ៉ិចទ័រដែលបានបង្កឲ្យមានរលកយក្សស៊ូណាមីបានបំផ្លាញក្រុង Palu ដែលស្ថិតនៅលើកោះ Sulawesi កាលពីថ្ងៃទី២៨ខែកញ្ញាកន្លងទៅនិងបានសម្លាប់មនុស្សជាង២,០០០នាក់ ហើយមនុស្សរាប់ពាន់នាក់ទៀតកំពុងបាត់ខ្លួននៅឡើយដែលត្រូវបានគេប៉ាន់ស្មានជាមុនថាប្រហែលជាបានស្លាប់បាត់បង់ជីវិតទៅហើយ។ ក្រុមជួយសង្គ្រោះបានជីកកកាយគំនរថ្មបាក់បែកដើម្បីរកអ្នករស់រានមានជីវិតអស់ជាច្រើនថ្ងៃមុននឹងសម្រេចប្រកាសថាអ្នកដែលកំពុងបាត់ខ្លួនប្រមាណ៥,០០០នាក់ប្រហែលជាមិនអាចរកឃើញនោះទេ។
លោកស្រី Georgieva បានថ្លែងថាធនាគារពិភពលោកបានផ្តល់មូលនិធិនេះក្នុងទម្រង់ជាកម្ចីដែលអាចយកទៅប្រើដើម្បីកសាងទីក្រុងឡើងវិញ ក៏ដូចជាជួយពង្រឹងសមត្ថភាពដល់ប្រទេសឥណ្ឌូណេស៊ីដើម្បីត្រៀមលក្ខណៈឲ្យបានកាន់តែប្រសើរក្នុងការប្រឈមនឹងគ្រោះមហន្តរាយទៅថ្ងៃអនាគត។
លោកស្រី Georgievaបានធ្វើទស្សនៈកិច្ចនៅទីក្រុង Palu កាលពីដើមសប្តាហ៍នេះនិងបានថ្លែងថា «គ្រោះមហន្តរាយនឹងបន្តវាយប្រហារដោយបូករួមទាំងបញ្ហាបម្រែបម្រួលអាកាសដែរនោះ នឹងមានគ្រោះមហន្តរាយកាន់តែច្រើនឡើងថែមទៀត»៕
