គណៈកម្មាធិការជាតិរៀបចំការបោះឆ្នោត ហៅកាត់ គ.ជ.ប សម្រេចដាក់ក្រុមនិយោជិត កម្មករ~កម្មការិនីចូលក្នុងក្រុមអាទិភាព ដែលអាចបោះឆ្នោតបានមុន សម្រាប់ការបោះឆ្នោតជ្រើសរើសក្រុមប្រឹក្សាឃុំ~សង្កាត់ នៅថ្ងៃទី៤ ខែមិថុនាខាងមុខ។ នេះបើយោងតាមសេចក្តីណែនាំ ស្តីពីការបង្កលក្ខណៈងាយស្រួលដល់និយោជិត កម្មករ~កម្មការិនី បានចូលបោះឆ្នោតមុនគេ ចេញដោយ គ.ជ.ប កាលពីថ្ងៃសៅរ៍កន្លងទៅនេះ។
ការចេញសេចក្តីណែនាំរបស់ គ.ជ.ប ដែល VOA ទទួលបាននៅថ្ងៃច័ន្ទនេះ គឺដើម្បីឲ្យក្រុមមន្ត្រីរៀបចំការបោះឆ្នោតនៅតាមការិយាល័យបោះឆ្នោត ជួយសម្រួលឲ្យនិយោជិត កម្មករ~កម្មការិនីបានបោះឆ្នោតមុនគេ។
លោក ហង្ស ពុទ្ធា បញ្ជាក់ប្រាប់ VOA ថា ការសម្រេចរបស់ គ.ជ.ប នេះ គឺដើម្បីលើកទឹកចិត្តដល់ក្រុមនិយោជិត កម្មករ~កម្មការិនី ឲ្យមានឱកាសចូលរួមក្នុងការបោះឆ្នោតកាន់តែច្រើន និងពេញលេញ។
លោក ហង្ស ពុទ្ធា បន្ថែមថា៖ «អ្វីដែលបានលើកឡើងឃើញថា កម្មករលោកជួបការលំបាក ក្នុងការរៀបចំខ្លួនទៅបោះឆ្នោត។ អីចឹងហើយ ក្រៅអំពីផ្តល់អាទិភាពដល់ស្ត្រីមានផ្ទៃពោះ អ្នកជំងឺ ចាស់ជរា ព្រះសង្ឃ ជនជាតិភាគតិច យើងបន្ថែមចំណុចមួយទៀតព្រោះ យើងចង់ឲ្យកម្មករចូលរួមបានច្រើន»។
នៅក្នុងសេចក្តីណែនាំដដែល បញ្ជាក់ថា ដើម្បីទទួលបានការបោះឆ្នោតមុនគេ ក្រុមនិយោជិត កម្មករ~កម្មការិនី ត្រូវបង្ហាញបណ្ណការងារសម្គាល់ខ្លួន ដែលចេញដោយស្ថាប័នដែលពួកគេធ្វើការ ជាអាទិ៍សហគ្រាស ក្រុមហ៊ុន រោងចក្រ សណ្ឋាគារ និងភោជនីយដ្ឋានជាដើម៕
