ប៉ូលិសបាននិយាយថារូបយន្តឧស្សាហកម្មបានសម្លាប់កម្មករម្នាក់នៅឯរោងចក្រខ្ចប់បន្លែមួយកាលពីដើមវិច្ឆិកានៅកូរ៉េខាងត្បូង។
បុរសនេះបានស្លាប់ដោយសាររបួសក្បាលនិងដើមទ្រូងបន្ទាប់ពីលោកត្រូវបានចាប់និងរុញខ្ទប់ខ្សែបន្ទះយន្តសម្រាប់បញ្ជូនវត្ថុពីកន្លែងមួយទៅទីមួយទៀតដោយដៃរូប យន្តម៉ាស៊ីន។
លោកធ្វើការឱ្យក្រុមហ៊ុនមួយដែលដំឡើងរូបយន្តឧស្សាហកម្មហើយលោកត្រូវបានបញ្ជូនទៅកាន់រោងចក្រនោះដើម្បីពិនិត្យមើលថាតើម៉ាស៊ីននេះធ្វើការបានល្អឬទេ។ រូបយន្តដែលមានដៃសម្រាប់លើកនិងដាក់វត្ថុមានប្រើច្រើនក្នុងសហគមន៍កសិកម្មកូរ៉េខាងត្បូង។
ប៉ូលិសនៅស្រុក Goseong នាផ្នែកខាងត្បូងប្រទេសបាននិយាយកាលពីដើមខែវិច្ឆិកាថាពួកគេស៊ើបអង្កេតថាតើម៉ាស៊ីននេះមានបញ្ហាបច្ចេកទេសឬមានបញ្ហាសុវត្ថិភាព។
ប៉ូលិសមិនបានប្រាប់អត្តសញ្ញាណបុរសនេះទេ តែបានថាលោកជាបុគ្គលិកនៃក្រុមហ៊ុនមួយដែលដំឡើងរូបយន្តឧស្សាហកម្មហើយលោកបានត្រូវបានបញ្ជូនទៅកាន់រោងចក្រនោះដើម្បីពិនិត្យមើលថាតើម៉ាស៊ីននេះធ្វើការបានល្អឬទេ។
ប៉ូលិសបានថ្លែងថាម៉ាស៊ីនដែលបានបណ្តាលឱ្យកម្មករនេះស្លាប់កាលពីថ្ងៃទី៧ វិច្ឆិកាជារូបយន្តមួយក្នុងបណ្តារូបយន្តពីរគ្រឿងសម្រាប់លើកនិងដាក់វត្ថុដែលត្រូវប្រើនៅក្នុងរោងចក្រនោះដែលខ្ចប់ម្ទេសផ្លោកនិងបន្លែឯទៀតៗដឹកទៅលក់ក្នុងប្រទេសអាស៊ីឯទៀតៗ។ ម៉ាស៊ីនបែបនេះមានប្រើច្រើនក្នុងសហគមន៍កសិកម្មកូរ៉េខាងត្បូង ដែលមានបញ្ហាអ្នកធ្វើការតិចជាងមុននិងមានអាយុច្រើន។
លោក Kang Jin-gi ដែលជាប្រធានផ្នែកស៊ើបអង្កេតនៅស្ថានីយ៍ប៉ូលិស Gosong បានពោលថា«រូបយន្តនេះមិនមែនជារូបយន្តទំនើបដើរដោយបញ្ញាសិប្បនិម្មិតទេ តែ ជាម៉ាស៊ីនមួយដែលលើកប្រអប់ទំនិញនិងដាក់វាលើទម្រឈើ»។
លោកបាននិយាយថាប៉ូលិសបានធ្វើការជាមួយទីភ្នាក់ងារពាក់ព័ន្ធដើម្បីកំណត់ថាតើម៉ាស៊ីននេះមានបញ្ហាបច្ចេកទេសឬបញ្ហាសុវត្ថិភាព។
ប៉ូលិសម្នាក់ដែលមិនឱ្យបញ្ចេញឈ្មោះលោកបានថ្លែងថា«ជាការច្បាស់លាស់ នេះ មិនមែនជាករណីរូបយន្តច្រឡំមនុស្សជាមួយប្រអប់ដាក់វត្ថុទេ-នេះមិនមែនជាម៉ាស៊ីនជឿនលឿនទេ»៕
ប្រែសម្រួលដោយលោក ឈឹម សុមេធ
រដ្ឋធានីសេអ៊ូល —
