បន្ទាប់ពីសហរដ្ឋអាមេរិកបានប្រកាសថានឹងផ្អាកការធ្វើសមយុទ្ធយោធាផ្លូវអាកាសរួមគ្នាជាមួយនឹងប្រទេសកូរ៉េខាងត្បូងមក រដ្ឋាភិបាលក្រុងសេអ៊ូលបានប្រកាសថានឹងធ្វើសមយុទ្ធដោយខ្លួនឯង។
ការធ្វើសមយុទ្ធយោធាផ្លូវអាកាសរួមគ្នាដែលហៅថា Vigilant Ace នេះ ត្រូវបានគ្រោងធ្វើឡើងនៅខែធ្នូខាងមុខនេះ ប៉ុន្តែត្រូវបានក្រសួងការពារប្រទេសអាមេរិកលុបចោល ដើម្បីបន្តកិច្ចប្រឹងប្រែងការទូតជាមួយនឹងប្រទេសកូរ៉េខាងជើងបន្តទៅមុខទៀត។
អ្នកជំនាញនានាមានទស្សនៈផ្ទុយគ្នាអំពីថាតើស្ថានភាពនៅលើឧបទ្វីបកូរ៉េមានលក្ខណៈប្រសើរគ្រប់គ្រាន់ហើយឬនៅ ដើម្បីធានាថា ការផ្អាកការធ្វើសមយុទ្ធនេះគឺអាចធ្វើទៅបាន។
សមយុទ្ធ Vigilant Ace នេះ គឺជាសមយុទ្ធដ៏សំខាន់មួយដែលត្រូវបានផ្អាក តាំងពីប្រធានាធិបតីអាមេរិកលោក Donald Trump បានជួបប្រជុំលើកដំបូងជាមួយនឹងមេដឹកនាំកូរ៉េខាងជើងលោក Kim Jong Un នៅក្នុងប្រទេសសិង្ហបុរីកាលពីខែមិថុនាកន្លងមក។
សមយុទ្ធនេះត្រូវបានផ្អាកដើម្បីបន្ធូរបន្ថយភាពតានតឹងនៅលើឧបទ្វីបកូរ៉េ និងដើម្បីលើកទឹកចិត្តឲ្យមានការចរចាជាមួយនឹងរដ្ឋាភិបាលក្រុងព្យុងយ៉ាងដើម្បីឲ្យលះបង់កម្មវិធីអាវុធនុយក្លេអ៊ែរ និងគ្រាប់ផ្លោងមីស៊ីលរបស់ខ្លួន។
ប៉ុន្តែមន្ត្រីក្រសួងការពារជាតិកូរ៉េខាងត្បូងបានប្រកាសកាលពីថ្ងៃច័ន្ទកន្លងទៅនេះថា «គ្មានការផ្លាស់ប្ដូរណាមួយទាក់ទិននឹងការធ្វើសមយុទ្ធដែលនឹងធ្វើឡើងដោយកងកម្លាំងទ័ពអាកាសកូរ៉េខាងត្បូងនោះទេ ទោះបីជាសមយុទ្ធរួមគ្នាមិនត្រូវបានធ្វើឡើងក៏ដោយ»៕
