ក្រុមអ្នកពន្លត់អគ្គិភ័យនៅក្នុងប្រទេសបារាំងបានបង្កើនកិច្ចខិតខំប្រឹងប្រែងរបស់ពួកគេដើម្បីពន្លត់ភ្លើងឆេះព្រៃដែលបានចាប់ផ្តើមឆាបឆេះដល់ផ្នែកមួយចំនួននៃឆ្នេរសមុទ្រ Riviera កាលពីយប់ថ្ងៃអង្គារ និងបានបង្ខំឲ្យមានការជម្លៀសខ្លួនមនុស្សរាប់ពាន់នាក់។
អគ្គិភ័យនេះគឺជាហេតុការណ៍ឆាប់ឆេះដោយសារខ្យល់ដែលបានឆេះព្រៃនិងព្រៃគម្ពោតវាងទីក្រុង Marseilles និងទីក្រុង នីស នៅប៉ែកអាគ្នេយ៍នៃប្រទេសបារាំង។ អគ្គិភ័យដែលឆាបឆេះក្នុងល្បឿនលឿននៅក្បែររមណីយដ្ឋាន Saint-Tropez នេះ បានបង្កឲ្យមានការជម្លៀសខ្លួនមនុស្សប្រហែល១ម៉ឺននាក់ ដោយរួមទាំងមនុស្ស៣ពាន់នាក់នៅកន្លែងបោះជំរំផងដែរ។
ក្រុមអ្នកពន្លត់អគ្គិភ័យរាប់រយនាក់កំពុងតែពន្លត់អគ្គិភ័យនេះដោយប្រើប្រាស់យន្តហោះនិងឧទ្ធម្ភាគចក្រដើម្បីបាញ់ទឹកទៅលើតំបន់ជួរភ្នំនេះ ដែលជាទូទៅតែងតែមានអគ្គិភ័យឆាបឆេះឡើងនៅរដូវក្តៅ។
អគ្គិភ័យនេះបានចាប់ផ្តើមឆាបឆេះនៅតាមបណ្តោយឆ្នេរសមុទ្រកាលពីថ្ងៃចន្ទ ដែលបានបង្ខំឲ្យមានការជម្លៀសខ្លួនមនុស្សមួយចំនួនតូច ខណៈដែលអគ្គិភ័យបានឆេះជិតដល់កាច់ជ្រុងរមណីយដ្ឋាន Saint-Tropez។ ក្រុមអ្នកពន្លត់អគ្គិភ័យក៏បានព្យាយាមពន្លត់អគ្គិភ័យនៅប៉ែកខាងកើតសង្កាត់ Artigues និងនៅសង្កាត់ La Croix Valmer កាលពីល្ងាចថ្ងៃអង្គារផងដែរ។
មកទល់នឹងពេលនេះ នៅមិនទាន់មានសេចក្តីរាយការណ៍ថាមានមនុស្សស្លាប់ដោយសារអគ្គិភ័យនេះនៅឡើយទេ។
ឆ្នេរសមុទ្រមេឌីទែរ៉ាណេនៅបារាំងងាយរងគ្រោះភ្លើងឆេះព្រៃណាស់ដោយសារតំបន់នោះមានព្រៃក្រាស់ មានអាកាសធាតុស្ងួតនៅរដូវក្តៅ និងខ្យល់បក់ពីសមុទ្រដែលធ្វើឲ្យភ្លើងកាន់តែឆេះ៕
