គ្រោះភ្លើងឆេះព្រៃនៅប៉ែកខាងជើងរដ្ឋ កាលីហ្វ័រញ៉ា បានធ្វើឲ្យអ្នកស្រុក៩ម៉ឺននាក់ត្រូវចាកចេញពីផ្ទះសម្បែងរបស់ពួកគេ។
អ្នករស់នៅក្នុងរដ្ឋ កាលីហ្វ័រញ៉ា រាប់លាននាក់ កំពុងតែគ្មានអគ្គិសនីប្រើប្រាស់ដោយសារតែក្រុមហ៊ុនផ្គត់ផ្គង់អគ្គិសនី Pacific Gas & Electric បានសម្រេចកាលពីល្ងាចថ្ងៃសៅរ៍ ថា នឹងចាប់ផ្ដើមផ្ដាច់ភ្លើងនៅតាមផ្ទះមួយចំនួនធំ។ ប្រជាពលរដ្ឋជិតបីលាននាក់នឹងគ្មានអគ្គិសនីប្រើប្រាស់ រួមទាំងអ្នករស់នៅក្នុងទីក្រុង San Francisco ផងដែរ។
កាលពីខែមុន ក្រុមហ៊ុនអគ្គិសនី PG&E នេះ បានកាត់ផ្ដាច់អគ្គិសនីរបស់អតិថិជនរាប់ពាន់នាក់ ដើម្បីរារាំងដល់ការរីករាលដាលភ្លើងឆេះព្រៃនេះ។ ក្រុមហ៊ុននេះកំពុងស្ថិតក្នុងស្ថានភាពក្ស័យធន ដោយសារតែការសងការខូចខាតដល់អតិថិជននៅក្នុងហេតុការណ៍ភ្លើងឆេះព្រៃធំៗកន្លងមក ដោយរួមទាំងហេតុការណ៍ភ្លើងឆេះព្រៃកាលពីឆ្នាំមុន ដែលបានធ្វើឲ្យមនុស្សស្លាប់អស់ចំនួន៨៥នាក់ នៅទីក្រុង Paradiseដែលស្ថិតនៅប៉ែកខាងជើងរដ្ឋ កាលីហ្វ័រញ៉ា ផងដែរ។
មិនមាននរណាម្នាក់ត្រូវបានរាយការណ៍ថាបានរងរបួសដោយសារហេតុការណ៍ភ្លើងឆេះព្រៃនេះឡើយ៕
