ស្រ្តីម្នាក់ដែលជាភរិយារបស់សកម្មជនបក្សប្រឆាំង ដែលកំពុងជាប់ពន្ធនាគារ ត្រូវបានសន្តិសុខម្នាក់ចាប់បោកផ្ទប់មួយទំហឹងទៅនឹងថ្នល់ បណ្តាលឲ្យរងរបួស ហើយត្រូវបញ្ជូនទៅសង្រ្គោះបន្ទាន់ កាលពីព្រឹកថ្ងៃសុក្រ។
ស្រ្តីម្នាក់នោះឈ្មោះ សេង ចាន់ថន អាយុ ៤៨ ឆ្នាំ មកពីខេត្តកំពង់ធំ ជាភរិយារបស់លោក ស៊ុន ធន់អតីតក្រុមប្រឹក្សាគណបក្សសង្គ្រោះជាតិ ដែលកំពុងជាប់ពន្ធនាគារព្រៃស។
នេះជាការតវ៉ាលើកទី ១១ ហើយដែលក្រុមស្រ្តីជាភរិយានិងគ្រួសាររបស់សកម្មជនទាំងនោះ ទាមទារឲ្យដោះលែងក្រុមគ្រួសាររបស់ពួកគេ ដែលជាមន្ត្រីអតីតគណបក្សសង្គ្រោះជាតិទាំង ១៥ នាក់។ ពួកគេទាំង ១៥ នាក់ត្រូវបានចាប់ឃុំខ្លួន ដោយសារការអត្ថាធិប្បាយនិងចែករំលែកព័ត៌មាននានា ពាក់ព័ន្ធនឹងស្ថានភាពសេដ្ឋកិច្ចប្រទេស និងវិបត្តិជំងឺឆ្លងកូវីដ១៩ និងករណីគម្រោងរបស់លោក សម រង្ស៊ី អតីតប្រធានគណបក្សសង្គ្រោះជាតិ វិលត្រឡប់ចូលប្រទេសវិញ កាលពីខែវិច្ឆិកា ឆ្នាំ ២០១៩។
ក្នុងការតវ៉ា កាលពីព្រឹកថ្ងៃសុក្រ ពួកគេប្រមាណ ២០ នាក់ បានព្យាយាមប្រមូលផ្តុំនៅមុខសាលាដំបូងរាជធានីភ្នំពេញ ប៉ុន្តែត្រូវបានហាមឃាត់ដោយកម្លាំងសន្តិសុខខណ្ឌ ៧ មករា រាប់សិបនាក់។
ការតវ៉ានេះនាំឲ្យមានការរុញទាញ ហើយពេលនោះស្រាប់តែមានសន្តិសុខម្នាក់ស្លៀកពាក់ឯកសណ្ឋានជាសន្តិសុខខណ្ឌពាក់ម៉ាស់ និងមួកកាតិបបានចាប់ទាញស្រ្តីម្នាក់ឈ្មោះ សេង ចាន់ថន ដែលចងក្បាលនឹងក្រមានិងពាក់ម៉ាស់ បោកផ្ទប់នឹងថ្នល់ ខណៈអ្នកស្រីកំពុងជជែកជាមួយសន្តិសុខផ្សេងទៀត។
ការចាប់ទាញបោកនឹងថ្នល់នេះ ក៏ត្រូវបានថតជាវីដេអូនិងបង្ហោះតាមបណ្តាញសង្គមហ្វេសប៊ុកផងដែរ។
អ្នកស្រី សេង ចាន់ថន ដែលទទួលការព្យាបាលនៅមន្ទីរពេទ្យខ្មែរសូវៀត ក្រោយរងរបួសប្រាប់ VOA នៅម៉ោងប្រមាណ ២ រសៀលថា ស្ថានភាពរបស់អ្នកស្រីមានភាពធូរស្រាល ក្រោយពេទ្យដាក់សេរ៉ូម និងអុកស៊ីសែន។ អ្នកស្រីថា ដែលពីដំបូងឡើយអ្នកស្រីពិបាកដកដង្ហើម។ ប៉ុន្តែអ្នកស្រីថា អ្នកស្រីឈឺផ្នែកទ្រូងនិងក្រោមក្លៀក។ អ្នកស្រីបន្តថា ពេទ្យបានឆ្លុះមើល ហើយបានប្រាប់អ្នកស្រីថា វាមិនប៉ះពាល់ដល់សួតនោះទេ។
អ្នកស្រីចាត់ទុកថា ការទាញបោកមួយទំហឹងនេះជាការធ្វើហួសហេតុ ខណៈអ្នកស្រីថា ក្រុមរបស់អ្នកស្រីតវ៉ាដោយអហិង្សាតែប៉ុណ្ណោះ ហើយក្នុងគោលបំណងទាមទារយុត្តិធម៌ដល់ក្រុមគ្រួសារ ដែលជាប់ពន្ធនាគារ។
អ្នកស្រីមានប្រសាសន៍ថា៖ «ចាប់ខ្ញុំបោកទៅថ្នល់ដល់ប៉ុណ្ណឹង! ខ្ញុំឈរស្ងៀមៗ។ ខ្ញុំអត់មានសកម្មភាពទៅប្រទូសរ៉ាយជាមួយគេសោះ»។ អ្នកស្រីបញ្ជាក់ថា៖ «អាជ្ញាធរគេធ្វើបាបខ្ញុំយ៉ាងនេះ វាជារឿងដែលឃោរឃៅបំផុត»។
អ្នកស្រី ចាន់ថន បន្តថា ការចាប់ខ្លួនស្វាមីរបស់អ្នកស្រីមានភាពអយុត្តិធម៌ ទើបកន្លងទៅអ្នកស្រីនិងក្រុមគ្រួសារផ្សេងទៀត បានចេញមុខតវ៉ា តាំងពីខែឧសភា ដោយសុំអន្តរាគមន៍ពីស្ថានទូតធំៗ ដូចជាស្ថានទូតសហភាពអឺរ៉ុប សហរដ្ឋអាមេរិក និងអង់គ្លេសជាដើម។ នៅព្រឹកថ្ងៃសុក្រ ពួកគេក៏មានបំណងសុំអន្តរាគមន៍ពីស្ថានទូតអាល្លឺម៉ង់ផងដែរ បន្ទាប់ពីគម្រោងតវ៉ានៅខាងមុខតុលាការ។
អាជ្ញាធរបានអះអាងថា ការតវ៉ារបស់ពួកគេមិនមានច្បាប់អនុញ្ញាត។
អភិបាលខណ្ឌ ៧ មករា លោក លីម សុភា មានប្រសាសន៍ថា លោកកំពុងប្រជុំមិនអាចអត្ថាធិប្បាយបាននៅពេលដឹងថា អ្នកយកព័ត៌មាន VOA ទាក់ទងទៅ។
VOA មិនអាចសុំការឆ្លើយតបពីអ្នកនាំពាក្យសាលារាជធានីភ្នំពេញ លោក ម៉េត មាសភក្តី បានទេនៅថ្ងៃសុក្រនេះ។
លោក ជិន ម៉ាលីន អ្នកនាំពាក្យក្រសួងយុត្តិធម៌និងជាអនុប្រធានគណៈកម្មាធិការសិទ្ធិមនុស្សកម្ពុជា មានប្រសាសន៍ថា ការតវ៉ាជាសិទ្ធិរបស់ពួកគេ ប៉ុន្តែលោកថា កាលណាប្រឆាំងនឹងវិធានការរបស់សមត្ថកិច្ចនោះនឹងមានការប្រើប្រាស់កម្លាំងដើម្បីទប់ទល់។
លោកថ្លែងថា៖ «កាលណាប្រើកម្លាំង វាអាចមានការប៉ះទង្គិចគ្នាហើយ។ អ៊ីចឹងទេ មានតែការគោរពច្បាប់ទេទើបអាចចៀសផុត ពីការប៉ះទង្គិចគ្នាបាន»។
នៅពេលសួរថា តើស្ថានការណ៍ដែលកើតឡើង នៅព្រឹកថ្ងៃសុក្រ សមាមាត្រនឹងការចាប់បោកផ្ទប់នឹងថ្នល់ឬទេ លោក ជិន ម៉ាលីន មានប្រសាសន៍ថា៖ «យើងមិនមែនអ្នកនៅក្នុងហេតុការណ៍អ៊ីចឹងទេ យើងអត់អាចសន្និដ្ឋានតាមរយៈរូបភាពបានទេ។ ក៏ប៉ុន្តែជាគោលការណ៍ច្បាប់ សមត្ថកិច្ចអាចប្រើកម្លាំងបានដើម្បីទប់ស្កាត់ការតវ៉ាបាតុភាពហិង្សាផ្សេងៗ ដែលបំពានច្បាប់»។
លោក អំ សំអាត នាយករងទទួលបន្ទុកឃ្លាំមើលនិងការពារសិទ្ធិមនុស្សនៃអង្គការលីកាដូ មានប្រសាសន៍ថា ការទាញច្រានមួយទំហឹងព្រឹកមិញនេះ ជា «អំពើហិង្សាកាន់តែធ្ងន់ទៅធ្ងន់ទៅ»។លោកបន្តថា មិនគួរមានការប្រើប្រាស់កម្លាំងសន្តិសុខ ដែលលោកថា មិនមានជំនាញច្បាស់លាស់នោះទេ។
លោកប្រាប់ VOA ថា៖«មិនគួរប្រើប្រាស់នូវកម្លាំងក្រុមសន្តិសុខដែលមិនបានហ្វឹកហ្វឺន ឬ(មិនមាន)ជំនាញអីច្បាស់លាស់ ហើយប្រើប្រាស់តែកម្លាំងបាយ បង្កឲ្យមានអំពើហិង្សាអ៊ីចឹងកើតឡើង។ ហើយអំពើហិង្សាកាន់តែធ្ងន់ទៅហើយ»។
លោក អំ សំអាត ជំរុញឲ្យមានការស៊ើបអង្កេតលើករណីនេះ។
បើតាមអង្គការលីកាដូ ចាប់តាំងពីដើមខែមិថុនា ឆ្នាំ ២០២០ គ្រួសាររបស់អតីតសមាជិកគណបក្សជំទាស់ ត្រូវបានអូសទាញ ទាត់ធាក់ និងវាយដំ អំឡុងពេលដែលពួកគាត់តវ៉ា ដើម្បីអំពាវនាវឲ្យដោះលែងសមាជិកគ្រួសាររបស់ពួកគាត់។ អង្គការនេះឲ្យដឹងទៀតថា គិតមកទល់ពេលនេះ អតីតសមាជិកគណបក្សសង្គ្រោះជាតិចំនួន ២៣ នាក់ ហើយត្រូវបានចាប់ និងឃុំខ្លួនក្នុងពន្ធនាគារ៕
