អង្គការសុខភាពពិភពលោក WHO បានរាយការណ៍ថា ការរាតត្បាតនៃជំងឺកូវីដ១៩ កំពុងតែកើនឡើងនៅក្នុងទ្វីបអាហ្វ្រិក និងបានរាលដាលពីទីក្រុងធំៗនៃទ្វីបមួយនេះ ទៅកាន់ទីជនបទ ដែលជាកន្លែងដែលមានការពិបាកជាងមុននៅក្នុងការគ្រប់គ្រងការឆ្លងនៃជំងឺនេះ។ គិតត្រឹមថ្ងៃទី ១៤ ខែមិថុនា នៅទូទាំងសកលលោកមានការឆ្លងវីរុសកូរ៉ូណា ជាង ៧ លាន ៧ សែនករណី ដែលក្នុងនោះមានអ្នកស្លាប់ចំនួនជាង ៤ សែន ៣ ម៉ឺននាក់។
របាយការណ៍ថ្មីចុងក្រោយបំផុតដែលបានចេញផ្សាយកាលពីថ្ងៃពុធទី ១០ ខែមិថុនា បានឲ្យដឹងថា ករណីឆ្លងវីរុសកូរ៉ូណានៅក្នុងទ្វីបអាហ្វ្រិកមានចំនួនជាង ២ សែននាក់ ដែលក្នុងនោះមានករណីស្លាប់ចំនួន ៥ ពាន់នាក់។
អ្នកស្រី Matshidiso Moeti នាយកអង្គការសុខភាពពិភពលោកប្រចាំទ្វីបអាហ្វ្រិក បានកត់សម្គាល់ថា មួយសែនករណីដំបូងចំណាយពេល ៩៨ ថ្ងៃ ប៉ុន្តែចំនួននេះបានកើនឡើងដល់ ២ សែនករណី ត្រឹមតែ ១៩ ថ្ងៃប៉ុណ្ណោះ។
អ្នកស្រី Moeti និយាយថា៖ «ទោះបីជាករណីឆ្លងទាំងអស់នៅក្នុងទ្វីបអាហ្វ្រិកមានចំនួនតិចជាង ៣% នៃករណីឆ្លងសរុបនៅទូទាំងពិភពលោកក៏ដោយ គឺវាច្បាស់ណាស់ថា ការឆ្លងរោគរាតត្បាតនេះកំពុងកើនឡើង»។
ប្រទេស ១០ ក្នុងចំណោមប្រទេសទាំង ៥៤ នៃទ្វីបអាហ្វ្រិក មានការឆ្លងមេរោគនេះកើនឡើងខ្លាំង ដែលមានចំនួនប្រមាណ ៧៥% នៃករណីសរុប។ ប្រទេសចំនួន ៥ មានករណីស្លាប់ចំនួន ៧១% នៃករណីស្លាប់សរុប»។
ប្រទេសអាហ្វ្រិកខាងត្បូងមានករណីឆ្លង និងស្លាប់ច្រើនជាងគេបំផុត។ ទិន្នន័យបង្ហាញថា ភាគច្រើននៃការស្លាប់ដោយសារជំងឺកូវីដ១៩ នៅក្នុងទ្វីបអាហ្វ្រិក គឺមាននិន្នាការស្រដៀងទៅនឹងទំនោរដែលបានកើតឡើងនៅក្នុងទ្វីបអឺរ៉ុប និងសហរដ្ឋអាមេរិកដែរ។ អ្នកដែលស្លាប់ភាគច្រើនគឺមានអាយុលើសពី ៦០ ឆ្នាំ ហើយមានជំងឺប្រចាំកាយស្រាប់ដូចជា ជំងឺទឹកនោមផ្អែម លើសឈាម និងធាត់ជ្រុលជាដើម។
រោគរាតត្បាតនេះបានឆ្លងរាលដាលដល់ទ្វីបអាហ្វ្រិកកាលពីខែកុម្ភៈ គឺក្រោយតំបន់ផ្សេងទៀតនៅលើពិភពលោក។
អ្នកស្រី Moeti បាននិយាយថា ករណីនេះបានផ្ដល់ពេលវេលាគ្រប់គ្រាន់ដល់ប្រទេសនានា [នៅក្នុងទ្វីបអាហ្វ្រិក] នៅក្នុងការត្រៀមខ្លួនទប់ទល់នឹងវិបត្តិនេះ។ អ្នកស្រីបានលើកឡើងថា បទពិសោធន៍ដែលទទួលបានពីការប្រយុទ្ធប្រឆាំងនឹងជំងឺឆ្លងកាចសាហាវនានាដូចជាជំងឺអេបូឡា និងជំងឺអេដស៍ជាដើម បានធ្វើឲ្យប្រទេសទាំងនោះបង្កើនប្រតិបត្តិការផ្នែកសុខាភិបាលបានយ៉ាងឆាប់រហ័ស។
អ្នកស្រីនិយាយថា បម្រាមមិនឲ្យចេញក្រៅផ្ទះប្រសិនបើមិនចាំបាច់ និងវិធានការសង្គមផ្សេងទៀត ដូចជាការរក្សាគម្លាតពីគ្នាជាដើម ត្រូវបានអនុវត្តយ៉ាងឆាប់រហ័ស។ អ្នកស្រីបន្ថែមថា វិធានការផ្នែកសុខភាពសាធារណៈទាំងនេះ មានប្រសិទ្ធភាពនៅក្នុងការបន្ថយល្បឿននៃការឆ្លងរាលដាលនៃជំងឺកូវីដ១៩ ក្នុងទ្វីបអាហ្វ្រិក។
អ្នកស្រី Moeti បញ្ជាក់ដូច្នេះថា៖ «ទោះជាយ៉ាងណាក៏ដោយ បទបញ្ជាឲ្យស្នាក់នៅក្នុងផ្ទះ និងការបិទផ្សារ និងអាជីវកម្មនានា បានធ្វើឲ្យប៉ះពាល់ខ្លាំងដល់សេដ្ឋកិច្ច ជាពិសេសប៉ះពាល់ដល់សហគមន៍ដែលងាយរងគ្រោះបំផុត និងដែលគេមិនសូវឲ្យតម្លៃ ហើយយើងដឹងថា ពលរដ្ឋអាហ្វ្រិកជាច្រើនធ្វើការក្នុងផ្នែកសេដ្ឋកិច្ចក្រៅប្រព័ន្ធ។ ដូច្នេះតម្រូវការនៃការធ្វើឲ្យមានតុល្យភាពរវាងការសង្គ្រោះជីវិត និងការការពារជីវភាពរស់នៅប្រចាំថ្ងៃ គឺជាការពិចារណាដ៏សំខាន់នៅក្នុងការឆ្លើយតបនេះ ជាពិសេសនៅក្នុងទ្វីបអាហ្វ្រិក»។
ទ្វីបអាហ្វ្រិកប្រឈមនឹងបញ្ហាជាច្រើន។ អ្នកស្រី Moeti និយាយថា បញ្ហាប្រឈមធំបំផុតនោះគឺកង្វះឧបករណ៍ធ្វើតេស្ត និងសម្ភារៈផ្គត់ផ្គង់ផ្សេងទៀត។
អ្នកស្រីបានកត់សម្គាល់ថា សេវាផ្នែកសុខាភិបាលសំខាន់ជាច្រើនត្រូវបានគេមើលរំលង ដោយសារតែការផ្ដោតការយកចិត្តទុកដាក់លើវិបត្តិរោគរាតត្បាតនេះ។ អ្នកស្រីលើកឧទាហរណ៍ថា យុទ្ធនាការផ្ដល់ថ្នាំវ៉ាក់សាំងការពារជំងឺដែលអាចការពារបាន និងការផ្ដល់ថ្នាំបង្ការការពារជំងឺកាចសាហាវជាទូទៅត្រូវបានកាត់បន្ថយ។
អ្នកស្រីរំពឹងថា ពលរដ្ឋអាហ្វ្រិកនឹងត្រូវសម្របទៅតាមការកើនឡើងជាលំដាប់នៃជំងឺកូវីដ១៩ រហូតទាល់តែមានវ៉ាក់សាំងការពារដែលមានប្រសិទ្ធភាព។ ប៉ុន្តែអ្នកស្រីបានបញ្ជាក់ថា ជំងឺនេះប្រហែលជាអាចគ្រប់គ្រងបាន ប្រសិនបើទ្វីបអាហ្វ្រិកទទួលបានឧបករណ៍ និងជំនួយអន្តរជាតិផ្សេងទៀតដែលត្រូវការចាំបាច់ ដូច្នេះប្រព័ន្ធសុខាភិបាលនឹងមិនអាចហួសសមត្ថភាពរបស់ខ្លួននៅក្នុងការទទួលព្យាបាលអ្នកជំងឺនោះទេ៕
ប្រែសម្រួលដោយ សឿន វឌ្ឍនា
