ភ្ជាប់​ទៅ​គេហទំព័រ​ទាក់ទង

តើ​លោក​ John Kelly ជា​អ្នកណា?


លោក​ឧត្តមសេនីយ៍​ចូលនិវត្តន៍​ John Kelly និង​ប្រធានាធិបតី​ស.រ.អា. Donald Trump កំពុង​គោរព​ភ្លេង​ជាតិនៅក្នុង​ពិធី​ចែក​សញ្ញាប័ត្រ​នៅ​វិទ្យាស្ថាន​ឆ្មាំសមុទ្រ​សហរដ្ឋអាមេរិក​នៅ​ទីក្រុង New London រដ្ឋ Connecticut កាល​ពី​ថ្ងៃទី​១៧ មេសា ២០១៧។

លោក​ឧត្តមសេនីយ៍​ចូលនិវត្តន៍​ John Kelly នៃកង​ទាហាន Marine ស.រ.អា.​ដែល​ជា​ជម្រើស​របស់​ប្រធានាធិបតី​ស.រ.អា. Donald Trump ឱ្យ​កាន់តំណែង​ជា​នាយ​ខុទ្ទកាល័យ​សេតវិមាន​ ជា​មេបញ្ជាការ​ម្នាក់​ក្នុង​ចំណោម​មេបញ្ជាការ​យោធា​ដែល​បាន​បម្រើការ​យូរ​បំផុត​នៅ​មុន​ពេល Trump តែងតាំង​លោកឱ្យ​កាន់​តំណែង​ជា​រដ្ឋមន្ត្រី​ក្រសួង​សន្តិសុខ​មាតុភូមិ។

លោក​ Kelly អាយុ​៦៧ឆ្នាំត្រូវ​គេ​ស្គាល់​ថា​ចូលចិត្ត​និយាយ​ចំៗ​និងប្រជាប្រិយភាព​ជាមួយ​ក្រុមបុគ្គលិក​យោធា​ផង​ដែរ។​

លោក​ Trump បានពណ៌នា​លោក Kelly នៅក្នុង​ទំព័រ Twitter កាល​ពី​ថ្ងៃ​សុក្រថា​លោកជា «ជនជាតិ​អាមេរិក​ដ៏​ឆ្នើម និង​ជាមេដឹកនាំ​ឆ្នើម​ម្នាក់ផងដែរ»។

ប្រធានាធិបតី​អាមេរិកាំង​រូបនេះ​បាន​ពណ៌នា​ការងារ​ដែល​លោក​ Kelly បាន​ធ្វើក្នុង​ឋានៈលោក​ជា​រដ្ឋមន្ត្រី​ក្រសួង​សន្តិសុខមាតុភូមិ​ថា​ «អស្ចារ្យ» ​ហើយ​គាត់​បាននិយាយ​ថា​ «លោក Kelly ជា​តារា​ពិតប្រាកដ​មួយ​ក្នុងរដ្ឋបាលខ្ញុំ»។

លោក Kelly បានធ្វើការ​ដើម្បី​បំពេញ​តាម​ការសន្យារបស់​ Trump នៅ​ពេល​ឃោសនា​បោះឆ្នោត ដោយ​មានរួម​បញ្ចូលផែនការ​កសាង​កំផែង​មួយ​នៅ​តាម​ព្រំដែន​រវាង​ស.រ.អា.និង​ប្រទេសម៉ិកស៊ិក​ ការ​បញ្ជូន​ជនអន្តោប្រវេសន៍​ដែលគ្មាន​ឯកសារត្រឡប់ទៅប្រទេស​ពួកគេវិញ​និង​បន្តឹង​កិច្ចខិតខំប្រឹងប្រែង​ត្រួតពិនិត្យ​ទិដ្ឋាការ​ដើម្បី​បង្អាក់ជន​ដែល​មានសក្តានុពល​ជា​ភេរវជនកុំឱ្យ​ធ្វើការ​វាយប្រហារ​បាន។ លោក​ Kelly បានពណ៌​នាអាទិភាព​កំពូល​របស់លោក​ក្នុង​ឋានៈជា​រដ្ឋមន្ត្រី​សន្តិសុខ​មាតុភូមិ​គឺ​ការ​បិទ​ព្រំដែន «មិនឱ្យមាន​ចលនាខុស​ច្បាប់របស់មនុស្ស​និង​វត្ថុ»៕

XS
SM
MD
LG