នៅថ្ងៃដំបូងដែលប្រធានាធិបតីសហរដ្ឋអាមេរិកលោក Joe Biden កាន់តំណែងពេញមួយថ្ងៃគឺថ្ងៃព្រហស្បតិ៍ អ្នកជំនាញកំពូលខាងជំងឺឆ្លងរបស់អាមេរិក បាននិយាយថា សហរដ្ឋអាមេរិកនឹងចូលរួមក្នុងកិច្ចផ្ដួចផ្ដើមជាសាកល ដើម្បីផ្ដល់វ៉ាក់សំាងកូវីដ១៩ ដល់ប្រទេសក្រីក្រ។
លោកវេជ្ជបណ្ឌិត Anthony Fauci នាយករធានវិទ្យាស្ថានជាតិអាឡែស៊ីនិងជំងឺឆ្លងរបស់សហរដ្ឋអាមេរិក និងជាប្រធានទីប្រឹក្សាវេជ្ជសាស្ត្ររបស់លោកប្រធានាធីបតី Biden បានប្រាប់ក្រុមប្រឹក្សាប្រតិបត្តិរបស់អង្គការសុខភាពពិភពលោក (WHO) កាលពីថ្ងៃព្រហស្បតិ៍ ក្នុងការប្រជុំតាមវីដេអូមួយ ថា សហរដ្ឋអាមេរិកនឹងចូលរួមគម្រោងផ្ដល់វ៉ាក់សាំងកូវីដ១៩ ជាសកល ឬហៅកាត់ថា COVAX ដែលជាសម្ព័ន្ធភាពអន្តរជាតិមួយដឹកនាំដោយអង្គការសុខភាពពិភពលោក ដែលមានគោលបំណងផ្ដល់វ៉ាក់សំាងកូវីដ១៩ ដល់ប្រទេសក្រីក្របំផុតរបស់ពិភពលោក។
លោកវេជ្ជបណ្ឌិត Fauci ក៏បាននិយាយថា សហរដ្ឋអាមេរិកនឹងបំពេញកាតព្វកិច្ចផ្នែកហិរញ្ញវត្ថុរបស់ខ្លួនចំពោះទីភ្នាក់ងារសុខភាពរបស់អង្គការសហប្រជាជាតិនេះ និងរក្សាបុគ្គលិកដូចកាលពីមុន។ ការថ្លែងរបស់លោក កើតឡើងមួយថ្ងៃបន្ទាប់ពីលោក Joe Biden ចេញបទបញ្ជាក្នុងថ្ងៃដំបូង [ក្នុងនាមជាប្រធានាធិបតី] ដោយសន្យាថា នឹងស្ដារទំនាក់ទំនងរវាងអាមេរិកជាមួយអង្គការសុខភាពពិភពលោកវិញ។
អតីតប្រធានាធិបតីលោក Donald Trump បានប្រកាសកាលពីខែឧសភាថា លោកបានដកអាមេរិកចេញពីអង្គការ WHO ដោយចោទប្រកាន់អង្គការនេះ ថាបានជួយប្រទេសចិនលាក់បាំងកម្រិតធ្ងន់ធ្ងរនៃជំងឺកូវីដ១៩ ដែលត្រូវរកឃើញដំបូងបំផុតនៅទីក្រុង Wuhan ភាគកណ្តាលប្រទេសចិន កាលពីចុងឆ្នាំ ២០១៩។
នាយកអង្គការសុខភាពពិភពលោកលោក Tedros Adhanom Ghebreyesus បានឆ្លើយតបទៅនឹងសេចក្ដីប្រកាសរបស់លោកវេជ្ជបណ្ឌិត Fauci ថា៖ «នេះជាថ្ងៃល្អសម្រាប់អង្គការសុខភាពពិភពលោក ហើយជាថ្ងៃល្អសម្រាប់សុខភាពសាកលលោក»។
នៅក្នុងរឿងពាក់ព័ន្ធគ្នានេះដែរ ទីភ្នាក់ងារព័ត៌មាន Reuters បានឲ្យដឹងថា កិច្ចផ្ដួចផ្ដើម COVAX បានប្រកាសនៅថ្ងៃព្រសហ្បតិ៍ថា ខ្លួនមានគម្រោងចែកចាយវ៉ាក់សាំងកូវីដ១៩ ចំនួន ១.៨០០លានដូសដល់ប្រទេសក្រីក្រទំាងឡាយក្នុងឆ្នាំ ២០២១ ហើយសង្ឃឹមថា នឹងផ្ដល់ឲ្យប្រទេសអ្នកមាននូវវ៉ាក់សំាងគ្រប់ចំនួន នៅឆមាសទី២ ឆ្នំានេះផងដែរ។
ពិភពលោកកំពុងប្រញាប់ប្រញាល់ដើម្បីផលិត និងចែកចាយវ៉ាក់សំាងកូវីដ១៩ រាប់ពាន់លានដូស ដើម្បីទប់ទល់ការរាតត្បាតនៃជំងឺកូវីដ១៩ ដែលបានសម្លាប់មនុស្សជាង ២លាននាក់ ក្នុងចំណោមមនុស្ស ៩៧ លាននាក់ ដែលបានឆ្លងជំងឺកូវីដ១៩។ នេះយើងតាមទិន្នន័យពីសាកលវិទ្យាល័យ Johns Hopkins៕
