ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ប្រធាន​អង្គការ​សុខភាព​ពិភពលោក​ថា ៨០%​នៃ​អ្នក​ឆ្លង​មេរោគ​ Covid-19 មាន​អាការៈ​កម្រិត​ស្រាល


ប្រធាន​អង្គការ​សុខភាព​ពិភពលោក WHO ​លោក Tedros Adhanom Ghebreyesus ថ្លែង​នៅ​ក្នុង​សន្និសីទ​មួយ​ស្តី​ពី​ស្ថានភាព​នៃ​មេរោគ​កូរ៉ូណា នៅ​ក្នុង​ក្រុង​ហ្សឺណែវ ប្រទេស​ស្វ៊ីស កាលពី​ថ្ងៃទី២៩​ ខែមករា ឆ្នាំ២០២០។

មន្ត្រី​សុខាភិបាល​ចិន​កាល​ពី​ថ្ងៃ​អង្គារ បាន​និយាយ​ថា ចំនួន​នៃ​ករណី​ឆ្លងមេរោគ​កូរ៉ូណា​ប្រភេទ​ថ្មី ឬ Covid-19 បាន​កើន​ឡើង​លើស​ពី​ ៧២.០០០ (៧ម៉ឺន ពីរ​ពាន់) ករណី ដោយ​ចំនួន​អ្នក​ស្លាប់​បាន​កើន​ដល់​ជិត​១.៩០០​នាក់។

តួលេខ​ចុងក្រោយ​នេះ​គឺ​រួម​មាន​តួលេខ​សម្រាប់ថ្ងៃ​អង្គារ ដោយ​ក្នុងមួយ​ថ្ងៃ​នេះ មាន​ករណី​ស្លាប់ថ្មី​ ៩៨ និង​ករណី​ឆ្លង​ថ្មី​ចំនួន​១.៨៨៦ ពី​មេរោគ Covid-19 ដែល​ដាក់​សម្ពាធ​ខ្លាំង​ទៅ​លើ​ប្រព័ន្ធ​សុខាភិបាល​ចិន ​និង​បង្ខំ​ឲ្យ​អាជ្ញាធរ​បិទ​សកម្មភាព​នៅ​តាម​ទី​ក្រុង​និង​ទី​ប្រជុំជន​ជាច្រើន។

​ទូរទស្សន៍​រដ្ឋ​ចិន​បាន​រាយការណ៍​ថា​ ក្នុង​ចំណោម​អ្នក​ស្លាប់​កាល​ពី​ថ្ងៃ​អង្គារ​មាន​លោក​វេជ្ជបណ្ឌិត Liu Zhiming ប្រធាន​មន្ទីរពេទ្យ Wuchang ក្នុង​ក្រុង​វូហាន ខេត្ត Hubei ដែល​ជា​ចំណុច​កណ្តាល​នៃ​ការ​ផ្ទុះ​រាលដាល​មេរោគដ៏​កាចសាហាវ​នេះ។

ប្រធាន​អង្គការ​សុខភាព​ពិភពលោក WHO ​លោក Tedros Adhanom Ghebreyesus ថ្លែង​កាល​ពី​ថ្ងៃ​ចន្ទ​ថា ទិន្នន័យ​ពី​ប្រទេស​ចិន​ក្នុង​ប៉ុន្មាន​ថ្ងៃ​ចុងក្រោយ​នេះ​ហាក់បង្ហាញ​ថា មាន​ការ​ថយ​ចុះ​នៃ​ចំនួន​ករណី​ឆ្លង​ថ្មី‍ៗ។ ប៉ុន្តែ​លោក​គូស​បញ្ជាក់ថា គេគួរ​មាន​ការ​ប្រុងប្រ័យត្ន​ចំពោះ​ការ​សន្និដ្ឋាន​ពី​តួលេខ​នេះ​ដោយ​សារ​អាច​មាន​ការ​ប្រែប្រួល​ទៀត។

លោក Ghebreyesus បញ្ជាក់​ថា ជាង​៨០% នៃ​អ្នក​ជំងឺ​ Covid-19 «មាន​អាការៈ​កម្រិត​ស្រាល​ហើយ​នឹង​បាន​ជា​សះស្បើយ‍»។

អង្គការ​ WHO បញ្ជាក់​ក្នុង​របាយការណ៍​ចុងក្រោយ​របស់​ខ្លួន​ថា តួលេខ​ចុង​ក្រោយ​នៃ​ចំនួន​អ្នក​ឆ្លង​មេរោគ​នេះ​នៅ​ក្រៅប្រទេស​ចិន​មាន​ចំនួន ៧៩៤ ករណី ដោយ​ក្នុងនោះ ៥៤២ ករណី​ជា​អ្នក​ធ្វើ​ដំណើរ​ក្នុង​នាវា​កម្សាន្ត​មួយ​ដែល​កំពុង​ជាប់​នៅ​ក្នុង Yokohama ប្រទេស​ជប៉ុន ហើយ​ដែល​នៅ​ថ្ងៃ​អង្គារ​នេះ​បាន​រាយការណ៍​ថា​មាន​អ្នក​ឆ្លង​ថ្មី​៨៨​ករណី​ទៀត​នៅ​ក្នុង​នាវា​នោះ៕

XS
SM
MD
LG