លោក Tedros Adhanom Ghebreyesus នាយកអង្គការសុខភាពពិភពលោក (WHO) បានប្រកាសកាលពីថ្ងៃអាទិត្យថា លោកកំពុងធ្វើចត្តាឡីស័ក ក្រោយពីលោកបានស្ថិតនៅក្បែរមនុស្សម្នាក់ដែលបានរកឃើញឆ្លងជំងឺកូវីដ១៩នោះ។
លោកបានបង្ហោះសារក្នុងបណ្តាញសង្គម Twitter ថា លោកមានសុខភាពល្អជាធម្មតា និងគ្មានរោគសញ្ញាអ្វីមួយនោះទេ ប៉ុន្តែលោកត្រូវអនុវត្តតាមគោលការណ៍របស់អង្គការសុខភាពពិភពលោក ដោយដាក់ខ្លួនលោកឲ្យនៅឆ្ងាយដាច់ពីអ្នកដទៃ និងធ្វើការពីផ្ទះ។
លោកបាននិយាយក្នុងសារបង្ហោះនោះថា៖ «វាជារឿងមួយដ៏សំខាន់ដែលយើងត្រូវអនុវត្តតាមសេចក្តីណែនាំសុខភាព។ នេះជាវិធីដែលយើងអាចទប់ស្កាត់នឹងការចម្លងជំងឺកូវីដ១៩ទៅអ្នកដទៃ កម្ចាត់វីរុសនេះ និងការពារប្រព័ន្ធសុខភាព។
ចំណែកនៅចក្រភពអង់គ្លេសវិញ ព្រះអង្គម្ចាស់ William ជាបុគ្គលមួយរូបដែលបានឆ្លងវីរុសកូរ៉ូណា ក្នុងចំណោមអ្នកឆ្លងប្រមាណ១០លាននាក់ក្នុងទ្វីបអឺរ៉ុប នេះបើតាមការផ្សព្វផ្សាយរបស់សារព័ត៌មានអង់គ្លេសកាលពីថ្ងៃអាទិត្យ។ ព្រះអង្គម្ចាស់ដែលមានអាយុ៣៨ឆ្នាំរូបនេះ ត្រូវបានគេផ្សព្វផ្សាយថា ឆ្លងជំងឺកូវីដ១៩ក្នុងខែមេសា គឺប៉ុន្មានសប្តាហ៍ក្រោយពីបិតារបស់ទ្រង់គឺព្រះអង្គម្ចាស់ Charles ដែលជារាជទាយាទរបស់ចក្រភពអង់គ្លេស បានប្រកាសថា ព្រះអង្គធ្វើចត្តាឡីស័ក បន្ទាប់ពីមានរោគសញ្ញាបន្តិចបន្តួចដោយសារការឆ្លងកូវីដ១៩នោះ។
ការឆ្លងជំងឺកូវីដ១៩របស់ព្រះអង្គម្ចាស់ Charles និងព្រះអង្គម្ចាស់បុត្រា William កើតមានឡើង នៅចំពេលខែតែមួយ ដែលនាយករដ្ឋមន្ត្រីអង់គ្លេសលោក Boris Johnson ក៏ត្រូវបានរកឃើញថា បានឆ្លងជំងឺកូវីដ១៩ផងដែរ ដោយលោកត្រូវបានគេបញ្ជូនទៅសង្គ្រោះបន្ទាន់នៅមន្ទីរពេទ្យអស់រយៈពេលជាច្រើនថ្ងៃ។
គិតត្រឹមថ្ងៃច័ន្ទ ចំនួនអ្នកស្លាប់សរុបនៅលើពិភពលោកដោយសារជំងឺកូវីដ១៩ បានកើនលើស១,២លាននាក់ ហើយចំនួនអ្នកឆ្លងដោយសារជំងឺនេះបានកើនលើស៤៦,៥លាននាក់ នេះបើតាមទិន្នន័យរបស់សាកលវិទ្យាល័យJohns Hopkins របស់សហរដ្ឋអាមេរិក៕
