ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ចក្រភព​អង់គ្លេស​មាន​អ្នក​ឆ្លង​ជំងឺ​កូវីដ១៩ កើន​ដល់​ជាង​មួយ​លាន​នាក់


រូបឯកសារ៖ អ្នកធ្វើដំណើរឈរពីក្រោយបដារំឭកពលរដ្ឋឲ្យរក្សាគម្លាតពីគ្នា ក្នុងអំឡុងការរាតត្បាតនៃជំងឺកូវីដ១៩ នៅទីក្រុងឡុងដ៍ ចក្រភពអង់គ្លេស កាលពីថ្ងៃទី១១ ខែកញ្ញា ឆ្នាំ២០២០។

កាល​ពី​ថ្ងៃ​អាទិត្យ ចក្រភព​អង់គ្លេស​បាន​ក្លាយជា​ប្រទេស​ទី ៩ នៅ​លើ​ពិភពលោក​ដែល​មាន​អ្នក​ឆ្លង​ជំងឺ​កូវីដ១៩ ជាង ១ លាន​នាក់។

បើ​យោង​តាម​ទិន្នន័យ​ដែល​ចងក្រង​ដោយ​សាកល​វិទ្យាល័យ Johns Hopkins គិត​ត្រឹមព្រឹក​ថ្ងៃ​អាទិត្យ ចក្រភព​អង់គ្លេស​មាន​អ្នក​ឆ្លង​ជំងឺ​កូវីដ១៩ ចំនួន ១.០១៤.៧៩៤ នាក់ និង​មាន​អ្នក​ស្លាប់​ដោយសារ​ជំងឺ​នេះ​ចំនួន ៤៦.៦៤៥ នាក់។

ក្រោយ​ពី​ប្រឆាំង​នឹង​ការ​អំពាវនាវ​អស់​ជា​ច្រើន​សប្ដាហ៍​កន្លង​មក​ឲ្យ​មាន​កា​បិទ​ប្រទេស ​ដោយសារ​តែ​ការ​កើន​ឡើង​ខ្លាំង​នូវ​ការ​ឆ្លង​ជំងឺ​កូវីដ១៩ នាយក​រដ្ឋមន្រ្តី​ចក្រភព​អង់គ្លេស​លោក Boris Johnson កាល​ពី​ថ្ងៃ​សៅរ៍ បាន​សម្រេចចិត្ត​ធ្វើ​ដូច​សមភាគី​របស់​លោក​ក្នុង​ប្រទេស​បារាំង អាល្លឺម៉ង់ និង​ប៊ែលហ្សិក ដោយ​បាន​បញ្ជា​ឲ្យ​បិទ​ប្រទេស​ទាំង​មូល។

ការ​រឹត​បន្តឹង​នេះ​នឹង​ចូល​ជា​ធរមាននៅ​ទូទាំង​ប្រទេស​អង់គ្លេស​នៃ​ចក្រភព​អង់គ្លេស​នៅ​ថ្ងៃ​ព្រហស្បតិ៍​ខាង​មុខ ហើយ​មាន​រយៈពេល​មួយ​ខែ។ ចំណែក​ឯ​ប្រទេស​វែលស៍​នៃ​ចក្រភព​អង់គ្លេស បាន​ប្រកាស​ពី​ការ​បិទ​ប្រទេស​កាល​ពី​សប្តាហ៍​មុន ហើយ​មេដឹកនាំ​របស់​ប្រទេស​ស្កុតឡែន​នៃ​ចក្រភព​អង់គ្លេស បាន​និយាយ​ថា រយៈពេល ២ ឬ ៣ ថ្ងៃ​ខាង​មុខ​នេះ​ មាន​សារៈ​សំខាន់​ណាស់​ស​ម្រាប់​ស្កុតឡែន ​នៅ​ក្នុង​ការ​ជៀសវាង​ការ​បិទ​ប្រទេស។

ប៉ុន្តែ ទោះបីជា​មាន​ការ​បិទ​ដូច្នេះ​ក្ដី សម្រាប់​សាលារៀន សាកល​វិទ្យាល័យ តុលាការ និង​វិស័យ​សំណង់​នៅតែ​អនុញ្ញាត​ឲ្យ​បើក​ដំណើរការ​ដដែល។

សហរដ្ឋ​អាមេរិក​នៅតែ​ជា​ប្រទេស​ដែល​មាន​អ្នក​ឆ្លង​និង​ស្លាប់​ដោយសារ​ជំងឺ​កូវីដ១៩ ច្រើន​ជាង​គេ​បំផុត​នៅ​លើ​ពិភពលោក។ បើ​តាម​ទិន្នន័យ​ពី​សាកល​វិទ្យាល័យ Johns Hopkins គិត​ត្រឹម​ព្រឹក​ថ្ងៃ​អាទិត្យ សហរដ្ឋ​អាមេរិក​មាន​អ្នក​ឆ្លង​ជំងឺ​កូវីដ១៩ ចំនួន ៩.១២៧.១០០ នាក់ និង​អ្នក​ស្លាប់​យ៉ាង​តិច ២៣០.៥៦៦ នាក់។

ជាង​នេះ​ទៀត នៅ​លើ​ពិភពលោក គិត​ត្រឹម​ព្រឹក​ថ្ងៃ​អាទិត្យ ទិន្នន័យ​របស់​សាកល​វិទ្យាល័យ Johns Hopkins បង្ហាញ​ថា មាន​អ្នក​ឆ្លង​ជំងឺ​កូវីដ១៩ ជាង ៤៦ លាន ១ សែន​នាក់ ដែល​ក្នុង​នោះ​មាន​អ្នក​ស្លាប់​ជិត ១ លាន ២ សែន​នាក់៕

ផែនទីលទ្ធផលការបោះឆ្នោតប្រធានាធិបតីអាមេរិកពីឆ្នាំ ១៩៩២-បច្ចុប្បន្ន

XS
SM
MD
LG