សេតវិមានមានផែនការនឹងផ្តល់ប្រាក់ចំនួន២២០លានដុល្លារទៅប្រទេសអ៊ុយក្រែនដើម្បីគាំទ្រកំណែទម្រង់សេដ្ឋកិច្ច នយោបាយ និងថាមពល។ នេះបើតាមការលើកឡើងរបស់លោកអនុប្រធានាធិបតី Biden នៅក្នុងអង្គប្រជុំជាមួយនឹងលោក Volodymyr Groysman នាយករដ្ឋមន្ត្រីនៃប្រទេសអ៊ុយក្រែនកាលពីថ្ងៃពុធ។
សេចក្តីប្រកាសព័ត៌មានរបស់សេតវិមានបញ្ជាក់ថា៖
«លោកអនុប្រធានាធិបតីបានសម្តែងការគាំទ្រយ៉ាងខ្លាំងចំពោះកិច្ចខិតខំប្រឹងប្រែងកែទម្រង់ដ៏ធំរបស់លោកនាយករដ្ឋមន្ត្រីនិងបានសរសើលោកចំពោះដំណើរការកែទម្រង់ដ៏ខ្លាំងក្លានៅក្នុងគណៈរដ្ឋមន្ត្រីរបស់លោកដែលបានកើតមានឡើងតែក្នុងរយៈពេលពីរខែដំបូងក្រោយពីលោកបានចូលកាន់តំណែង»។
លោកអនុប្រធានាធិបតីក៏បានសម្តែងការព្រួយបារម្ភខ្លាំងក្លាពីការកើនឡើងនៃក្រុមផ្តាច់ខ្លួននៅភាគខាងកើតប្រទេស ដែលគាំទ្រដោយប្រទេសរុស្ស៊ី និងបានទទូចសុំឱ្យប្រទេសអ៊ុយក្រែន អនុវត្តឱ្យបានពេញលេញនូវកិច្ចព្រមព្រៀងទីក្រុង Minsk ដែលជាកិច្ចព្រមព្រៀងឈប់បាញ់គ្នាមួយរៀបចំឡើងដើម្បីបញ្ចប់ការវាយប្រយុទ្ធគ្នារវាងរដ្ឋាភិបាលអ៊ុយក្រែននិងក្រុមឧទ្ទាមដែលនិយមរុស្ស៊ី នៅតំបន់ភាគខាងកើត។
លោក Biden ក៏បានធានាដល់លោក Groysman ថាការដាក់ទណ្ឌកម្មប្រឆាំងនឹងរុស្ស៊ីនឹងមិនអាចលើកចេញបានទេរហូតទាល់តែរុស្ស៊ីអនុវត្តតាមកិច្ចព្រមព្រៀង។
ចាប់តាំងពីប្រទេសរុស្ស៊ីបានយកតំបន់គ្រីម៉េ ពីប្រទេសអ៊ុយក្រែន សហរដ្ឋអាមេរិកនិងសហគមន៍ អឺរ៉ុបបានធ្វើការបង្កកទុកធនធាន ការហាមឃាត់ការធ្វើដំណើរ និងការដាក់ទណ្ឌកម្មដទៃទៀតលើប្រទេសរុស្ស៊ី៕
