កាលពីថ្ងៃអាទិត្យ លោកនាយករដ្ឋមន្ត្រីអ៊ុយក្រែន Arseniy Yatsenyuk បាននិយាយថា លោកលាលែងចេញពីតំណែង ដោយបើកផ្លូវឲ្យមានការបង្កើតរដ្ឋាភិបាលថ្មីមួយនៅក្នុងកិច្ចខិតខំប្រឹងប្រែងមួយ ដើម្បីបញ្ចប់វិបត្តិនយោបាយរបស់រដ្ឋាភិបាលក្រុង Kyiv។
លោក Yatsenyuk បាននិយាយនៅក្នុងសុន្ទរកថាមួយផ្សាយតាមទូរទស្សន៍និងនៅក្នុងអត្ថាធិប្បាយតាម Twitter ថា លោកសង្ឃឹមថាការលាលែងចេញពីតំណែងរបស់លោកដែលនឹងត្រូវដាក់ជាផ្លូវការជូនសភានៅថ្ងៃអង្គារ នឹងផ្តល់ឲ្យប្រទេសអ៊ុយក្រែននូវឱកាសមួយ ដើម្បីធ្វើកំណែទម្រង់ថ្មីៗខាងការបោះឆ្នោត ខាងរដ្ឋធម្មនុញ្ញ និងខាងតុលាការ ព្រមទាំងដើម្បីចូលរួមក្នុងសហភាពអឺរ៉ុបនិងអង្គការអូតង់ដែលជាសម្ព័ន្ធភាពយោធារបស់ក្រុមបស្ចិមប្រទេស។
លោកនាយករដ្ឋមន្ត្រីរូបនេះបាននិយាយថា លោកលាលែងចេញពីតំណែងពីព្រោះ «វិបត្តិនយោបាយនៅក្នុងរដ្ឋាភិបាលត្រូវបានបណ្តោយឲ្យមាន» ហើយថាកិច្ចខិតខំប្រឹងប្រែងដើម្បីបង្ខំឲ្យលោកចុះចេញពីតំណែងបាន «ធ្វើឲ្យក្រុមអ្នកនយោបាយក្លាយទៅជាមនុស្សខ្វាក់និងបានធ្វើឲ្យគាំងដល់ឆន្ទៈរបស់ពួកគេក្នុងការធ្វើឲ្យមានការផ្លាស់ប្តូរពិតប្រាកដនៅក្នុងប្រទេស»។
គណៈរដ្ឋមន្ត្រីរបស់លោក Yatsenyuk បាននៅរស់រានពីការបោះឆ្នោតមិនទុកចិត្តមួយកាលពីខែកុម្ភៈ ក៏ប៉ុន្តែគណបក្សពីរបានចាកចេញពីក្រុមចម្រុះគ្រប់គ្រងប្រទេស ដោយសារគ្មានជោគជ័យក្នុងការបណ្តេញលោកចេញពីតំណែង។លោកបានត្រូវរិះគន់ដោយសារធ្វើឲ្យស្ថានភាពសេដ្ឋកិច្ចអាក្រក់ជាងមុននិងមានល្បឿនយឺតក្នុងការកែទម្រង់៕
