សេតវិមានកាលពីថ្ងៃចន្ទ បានអះអាងអំពីភាពស្អាតស្អំរបស់លោកប្រធានាធិបតី Donald Trump នៅក្នុងការស៊ើបអង្កេតដែលមានរយៈពេលពីរឆ្នាំ ទៅលើការចោទប្រកាន់នៃការជាប់ពាក់ព័ន្ធរវាងយុទ្ធនាការឃោសនាបោះឆ្នោតរបស់លោក កាលពីឆ្នាំ ២០១៦ ជាមួយនឹងប្រទេសរុស្ស៊ី ហើយនិងការចោទប្រកាន់អំពីសកម្មភាពរបស់លោក ក្នុងនាមជាប្រធានាធិបតី ដែលសេតវិមានបានហៅរបាយការណ៍ស៊ើបអង្កេតនេះថា បានចប់សព្វគ្រប់ និងគ្មានការចោទប្រកាន់ណាមួយទៅលើលោកប្រធានាធិបតីទេ។
អ្នកនាំពាក្យសេតវិមាន លោកស្រី Sarah Sanders បានបង្ហាញវត្តមាននៅក្នុងកម្មវិធី Today Show របស់ទូរទស្សន៍ NBC និងទូរទស្សន៍ CNN ដោយលោកស្រីបាននិយាយថា ឥឡូវនេះពលរដ្ឋអាមេរិកាំងបានដឹងជាសាធារណៈថា គ្មានការឃុបឃិតណាមួយរវាងរុស្ស៊ី និងយុទ្ធនាការឃោសនាបោះឆ្នោតដែលជួយឲ្យលោកឈ្នះឆ្នោតកាលពីបីឆ្នាំមុននោះទេ ហើយលោកក៏មិនបានរារាំងដល់ក្រសួងយុត្តិធម៌នៅក្នុងការស៊ើបអង្កេតអំពីការជ្រៀតជ្រែករបស់រុស្ស៊ីដោយរដ្ឋអាជ្ញាពិសេស លោក Robert Mueller នោះដែរ។
លោកស្រីបានប្រកាសអំពីជោគជ័យរបស់លោក Trump នៅមួយថ្ងៃ បន្ទាប់ពីរដ្ឋមន្ត្រីក្រសួងយុត្តិធម៌លោក William Barr បានផ្សព្វផ្សាយរបាយការណ៍សង្ខេបនៃការស៊ើបអង្កេតដែលមាន ៤ ទំព័រ។
លោក Barr បានថ្លែងតាមរយៈលិខិតមួយច្បាប់ផ្ញើទៅសមាជិកសភាជាន់ខ្ពស់សហរដ្ឋអាមេរិកថា លោក Mueller បានសន្និដ្ឋានថា លោក Trump និងយុទ្ធនាការរបស់លោក គ្មានការឃុបឃិតជាមួយនឹងរដ្ឋាភិបាលក្រុងមូស្គូទេ ហើយលោកក៏បាននិយាយផងដែរថា របាយការណ៍មិនបានសន្និដ្ឋានថា លោកប្រធានាធិបតីបានប្រព្រឹត្តបទឧក្រិដ្ឋទេ ហើយក៏គ្មានការចោទប្រកាន់អ្វីលើរូបលោកដែរ»៕
