ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

រុស្ស៊ី​បដិសេធ​របាយការណ៍​ដែល​ថា ខ្លួន​ជ្រៀតជ្រែក​ចូល​ការ​បោះ​ឆ្នោត​សហរដ្ឋ​អាមេរិក


លោក Dmitry Peskov​ ចូលរួម​កិច្ចប្រជុំ​មួយ​របស់​លោក​ប្រធានាធិបតី Vladimir Putin នៅ​វិមាន​ក្រឹមឡាំង ក្រុង​មូស្គូ ប្រទេស​រុស្ស៊ី កាលពី​ថ្ងៃទី២៦ ខែមីនា ឆ្នាំ២០១៨។

ទំហំ និង​វិសាលភាព​នៃ​កិច្ច​ប្រឹងប្រែង​របស់​ប្រទេស​រុស្ស៊ី​នៅ​ក្នុង​ការ​ជ្រៀតជ្រែក​ចូល​ការ​បោះ​ឆ្នោត​ប្រធានាធិបតី​អាមេរិក​ឆ្នាំ ២០១៦ គឺ​មាន​លក្ខណៈ​ទូលំទូលាយ និង​ហ្មត់ចត់​ជាង​ការ​យល់​ឃើញ​ពី​មុន​មក​ទៀត។ នេះ​បើ​យោង​តាម​របាយការណ៍​ពីរ​ដែល​ទើប​ផ្សព្វផ្សាយ​ថ្មីៗ​នេះ។

របាយការណ៍​ទាំង​ពីរ ដែល​បាន​ផ្សព្វផ្សាយ​ក្នុង​សប្ដាហ៍​នេះ គាំទ្រ​ការ​សន្និដ្ឋាន​របស់​សហគមន៍​ស៊ើបការណ៍​សម្ងាត់​សហរដ្ឋ​អាមេរិក ដែល​ថា គោល​បំណង​នៃ​ការ​ជ្រៀតជ្រែក​របស់​រុស្ស៊ី​ទាំង​អស់​នៅ​ក្នុង​រយៈពេល​ជា​ច្រើន​ខែ​មុន​ការ​បោះ​ឆ្នោត​ប្រធានាធិបតី​អាមេរិក​ឆ្នាំ ២០១៦ គឺ​ធ្វើ​យ៉ាង​ណា​ឲ្យ​បេក្ខជន​ប្រធានាធិបតី​អាមេរិក ដែល​រុស្ស៊ី​ចង់​បាន ជាប់​ឆ្នោត​ក្លាយជា​ប្រធានាធិបតី​របស់​សហរដ្ឋ​អាមេរិក។

របាយការណ៍​របស់​គម្រោង​ឃោសនា​តាម​កុំព្យូទ័រ​នៃ​សាកលវិទ្យាល័យ Oxford និង​ក្រុមហ៊ុន Graphika បាន​បញ្ជាក់​ថា៖ «អ្វី​ដែល​ច្បាស់​គឺ​ថា សារ​ទាំង​អស់​មាន​បំណង​យ៉ាង​ច្បាស់​នៅ​ក្នុង​ការ​ផ្ដល់​ប្រយោជន៍​ដល់​គណបក្ស​សាធារណរដ្ឋ និង​ជា​ពិសេស​គឺ​លោក Donald Trump»។

នៅ​ថ្ងៃ​អង្គារ​នេះ រដ្ឋាភិបាល​រុស្ស៊ី​បាន​បដិសេធ​ចំពោះ​ការ​ចោទ​ប្រកាន់​នៅ​ក្នុង​របាយការណ៍​ទាំង​ពីរ​នេះ។ លោក Dmitry Peskov អ្នក​នាំ​ពាក្យ​រដ្ឋាភិបាល​ក្រុង​មូស្គូ បាន​ហៅ​ការ​ចោទ​ប្រកាន់​ទាំង​នោះ​ថា គ្មាន​មូលដ្ឋាន​ត្រឹមត្រូវ។

ការ​រក​ឃើញ​ទាំង​នេះ ដែល​ដំបូង​រាយការណ៍​ដោយ​កាសែត Washington Post បាន​បញ្ជាក់​ថា ជនជាតិ​រុស្ស៊ី​មួយ​ចំនួន​ដែល​ធ្វើ​ការ​ឲ្យ​ក្រុម​មួយ​ដែល​មាន​ឈ្មោះ​ថា ទីភ្នាក់ងារ​ស្រាវជ្រាវ​អ៊ីនធឺណិត IRA បាន​ចាប់ផ្ដើម​ធ្វើ​ការ​ពិសោធន៍​ដោយ​ប្រើ​ប្រព័ន្ធ​ផ្សព្វផ្សាយ​សង្គម​ដើម្បី​ជះ​ឥទ្ធិពល​ដល់​ការ​បោះ​ឆ្នោត​ក្នុង​ស្រុក​ឆ្នាំ ២០០៩ និង​បាន​ពង្រីក​ប្រតិបត្តិការ​របស់​ខ្លួន​ទៅ​ដល់​ការ​បោះ​ឆ្នោត​ឆ្នាំ ២០១៣ នៅ​ក្នុង​សហរដ្ឋ​អាមេរិក ដោយ​ប្រើ Twitter។

បន្ទាប់មក ទីភ្នាក់ងារ​នេះ​បាន​បន្ថែម​ប្រព័ន្ធ​ផ្សព្វផ្សាយ​សង្គម​ដែល​មាន​ប្រជាប្រិយ​មួយ​ចំនួន​ទៀត​ដើម្បី​ធ្វើ​យុទ្ធនាការ​របស់​ខ្លួន ដូចជា Youtube Facebook និង Instagram ជា​ដើម ដោយ​លើក​យក​បញ្ហា​សង្គម និង​ជាតិ​សាសន៍​នានា​ដូចជា សិទ្ធិ​កាន់​កាំភ្លើង អន្តោប្រវេសន៍ និង​អំពើ​ឃោរឃៅ​របស់​ប៉ូលិស​ជា​ដើម ដើម្បី​ធ្វើ​ឲ្យ​មាន​ការ​បែកបាក់​ក្នុង​សង្គម​អាមេរិក៕

XS
SM
MD
LG