ភ្ជាប់​ទៅ​គេហទំព័រ​ទាក់ទង

តើ​លោកស្រី Clinton នឹង​ប្រកាន់​យក​របៀប​ដឹកនាំ​បែប​ណា​ប្រសិន​បើ​លោកស្រី​ត្រូវ​គេ​ជ្រើស​ជា​ប្រធានាធិបតី​អាមេរិក?


​លោកស្រី Hillary Clinton បេក្ខជន​ប្រធានាធិបតី​មកពី​គណបក្ស​ប្រជាធិបតេយ្យ។

ប្រសិន​បើ​លោកស្រី Hillary Clinton បេក្ខជន​ប្រធានាធិបតី​មកពី​គណបក្ស​ប្រជាធិបតេយ្យ ត្រូវ​បាន​គេ​ជ្រើសរើស​ឲ្យ​ធ្វើ​ជា​ប្រធានាធិបតី តើ​លោកស្រី​នឹង​ធ្វើ​ដូច​ពេល​លោកស្រី​មាន​តួនាទី​ជា​ភរិយា​របស់​លោក Bill Clinton ពេល​ដែលុំ​លោក Bill Clinton ធ្វើ​ជា​ប្រធានាធិបតី​សហរដ្ឋ​អាមេរិក ឬ​ក៏​លោកស្រី​នឹង​ធ្វើ​ដូច​ពេល​លោកស្រី​មាន​តួនាទី​ជា​សមាជិក​ព្រឹទ្ធសភា​អាមេរិក​មក​ពី​រដ្ឋ New Yorkពី​ឆ្នាំ ២០០១ ដល់​ឆ្នាំ ២០០៩?

លោកស្រី Clinton មាន​បទពិសោធន៍​ផ្នែក​នយោបាយ​ច្រើន ដែល​ក្នុង​នោះ​ដូចជា​បទពិសោធន៍​ធ្វើ​ជា​រដ្ឋមន្ត្រី​ការបរទេស​នៅ​អាណត្តិ​ទី​មួយ​របស់​លោក​ប្រធានាធិបតី Barack Obama។ ការ​សម្ដែង​ឡើង​របស់​លោកស្រី​នា​ពេល​នោះ នឹង​ជះ​ឥទ្ធិពល​ដល់​របៀប​នៃ​ការ​គ្រប់គ្រង​របស់​លោកស្រី ក៏​ដូច​ជា​ជះ​ឥទ្ធិពល​ដល់​ការ​គិត​របស់​ពលរដ្ឋ​អាមេរិកាំង​ទូទៅ​ចំពោះ​លោកស្រី​ផង​ដែរ។

លោក John Hudak អ្នក​សិក្សា​ស្រាវជ្រាវ​ជាន់​ខ្ពស់​ផ្នែក​សិក្សា​អភិបាល​កិច្ច​នៅ​ឯ​វិទ្យាស្ថាន Brookings បាន​និយាយ​ថា៖ «ប្រសិនបើ​ពេល​ធ្វើ​ជា​ប្រធានាធិបតី លោកស្រី Clinton ធ្វើ​ការ​គ្រប់គ្រង​ដូច​ពេល​លោកស្រី​ធ្វើ​ជា​ភរិយា​របស់​ប្រធានាធិបតី​សហរដ្ឋ​អាមេរិក​នោះ នោះ​ប្រាកដ​ជា​មាន​បញ្ហា​សម្រាប់​លោកស្រី​ជាក់​ជា​មិន​ខាន។ ប្រសិនបើ​លោកស្រី ធ្វើ​ការ​គ្រប់គ្រង​ដូច​ពេល​លោកស្រី​ធ្វើ​ជា​សមាជិក​ព្រឹទ្ធសភា លោកស្រី​នឹង​ទទួល​បាន​ជោគជ័យ​ច្រើន‍»។

ប្រសិនបើ​លោកស្រី​ត្រូវ​បាន​ជ្រើសរើស​ជា​ប្រធានាធិបតី​ស្ត្រី​ដំបូង​គេ​នៅ​ក្នុង​ប្រវត្តិសាស្ត្រ​សហរដ្ឋ​អាមេរិក លោកស្រី​ត្រូវ​បាន​គេ​រំពឹង​ថា លោកស្រី​នឹង​បន្ត​នូវ​ការងារ​របស់​លោក​ប្រធានាធិបតី Barack Obama។

ចំណុច​ខុស​គ្នា​រវាង​លោកស្រី Clinton នឹង​លោក Obama គឺ​នៅ​ត្រង់​វិធីសាស្ត្រ​របស់​ពួកគេ​ក្នុង​ការ​ធ្វើ​ការ​ជាមួយ​សភា។ គេ​មិន​សូវ​ស្គាល់​លោក Obama ចំពោះ​បទពិសោធន៍​របស់​លោក​ក្នុង​ការ​កសាង​ទំនាក់​ទំនង​ជាមួយ​តំណាងរាស្ត្រ​នៅ​ក្នុង​សភា​ប៉ុន្មាន​ទេ។ ប៉ុន្តែ បទពិសោធន៍​របស់​លោកស្រី Clinton នៅ​ក្នុង​ព្រឹទ្ធសភា អាច​មាន​ប្រយោជន៍ ពេល​ដែល​លោកស្រី​រៀបចំ​គោលនយោបាយ​ដឹកនាំ​ប្រទេស​នៅ​ក្នុង​រយៈពេល ១ រយ​ថ្ងៃ​ដំបូង​នៃ​ការ​ឡើង​ធ្វើ​ជា​ប្រធានាធិបតី​សហរដ្ឋ​អាមេរិក៕

XS
SM
MD
LG