ក្រុមមន្រ្តីប្រទេសលោកខាងលិច មានការព្រួយបារម្ភកាន់តែខ្លាំងឡើងថា សកម្មភាពដ៏គឃ្លើនរបស់ប្រធានាធិបតីរុស្ស៊ី Vladimir Putin នៅជុំវិញពិភពលោកនឹងធ្វើឲ្យមានអស្ថេរភាពនៅទូទាំងពិភពលោក ហើយអាចបណ្តាលឲ្យមានលទ្ធផលមិនល្អក្នុងប្រទេសរបស់លោក។
ក្រុមមន្រ្តីទាំងនោះជឿជាក់ថា គោលដៅពិតប្រាកដរបស់លោក Putin នៅក្នុងការចូលរួមប្រយុទ្ធប្រឆាំងពួកជ្រុលនិយមរដ្ឋអ៊ីស្លាម គឺដើម្បីធ្វើឲ្យរុស្ស៊ីត្រឡប់ទៅកាន់ឆាកពិភពលោកវិញ។ ក៏ប៉ុន្តែពួកគេភ័យខ្លាចថាលោក Putin ធ្វើដោយគ្មានដោយគ្មានផែនការជាក់លាក់ និងមានឆន្ទៈក្នុងការភ្នាល់ដើម្បីប្រយោជន៍ណាមួយដែលលោកមើលឃើញថានៅក្នុងកណ្តាប់ដៃរបស់លោក។
មន្រ្តីម្នាក់របស់អង្គការអូតង់ដែលបានប្រាប់ VOA ក្នុងលក្ខខណ្ឌមិនបញ្ចេញឈ្មោះថា ៖ «រុស្ស៊ីកំពុងបង្កើនការការពារ ហើយមិនអាចទស្សន៍ទាយបាន»។
ការព្រួយកង្វល់បែបនេះបានរីកកាន់តែធំឡើង ចាប់តាំងពីលោក Putin បានស្នើថា រុស្ស៊ីអាចពង្រីកការប្រយុទ្ធប្រឆាំងក្រុមនានាដូចជា រដ្ឋអ៊ីស្លាមហួសពីប្រទេសស៊ីរីទៀត។ លោកបានកត់សម្គាល់ថា ស្ថានភាពក្នុងប្រទេសអាហ្វហ្គានីស្ថានមានសារៈសំខាន់បំផុត។
មន្រ្តីសហរដ្ឋអាមេរិកម្នាក់ថ្លែងក្នុងលក្ខខណ្ឌមិនបញ្ចេញឈ្មោះ ពីព្រោះគេមិនអនុញ្ញាតិឲ្យនិយាយបញ្ហានេះជាសាធារណៈ។ លោកនិយាយថា ៖ «ប្រសិនបើរុស្ស៊ី យល់ឃើញថា ការផ្លាស់ប្តូរសន្តិសុខក្នុងប្រទេសអាហ្វហ្គានីស្ថានកាន់តែយ៉ាប់យ៉ឺនឡើង ការណ៍នេះអាចបង្កើនផលប្រយោជន៍របស់គេក្នុងតំបន់នោះ»។
អតីតមន្រ្តីបានជំរុញឲ្យមានការប្រុងប្រយ័ត្ន។ លោក John Herbstអតីតឯកអគ្គរដ្ឋទូតសហរដ្ឋអាមេរិកប្រចាំនៅប្រទេសអ៊ុយក្រែនគិតថា ការណ៍នេះមិនទំនងថា លោក Putin នឹងបញ្ជូនកងទ័ពរុស្ស៊ីត្រឡប់ទៅកាន់ប្រទេសអាហ្វហ្គានីស្ថានវិញ ក៏ប៉ុន្តែ លោកអ្នកមិនអាចបដិសេធបញ្ហានេះបានទេ៕
