ក្រុមអាជីវករបានត្អូញត្អែរនិងសម្តែងការខកចិត្ត ដោយសារតែការរកប្រាក់ចំណូលមានការធ្លាក់ចុះ នៅពេលដែលទេសចរក្នុងស្រុកដែលបានមកទស្សនាព្រះរាជពិធីបុណ្យអុំទូក អកអំបុក និងសំពះព្រះខែ មិនមានចំនួនច្រើនដូចពួកគេរំពឹងទុកទេ។
ចំនួនអ្នកទស្សនាព្រះរាជពិធីដ៏មានប្រជាប្រិយមួយនេះធ្លាប់កើនដល់ប្រមាណពីរលាននាក់ ឬច្រើនជាងនេះ នៅឆ្នាំ២០១០ ដែលជាឆ្នាំចុងក្រោយមុននឹងពិធីប្រពៃណីនេះត្រូវព្យួរអស់រយៈពេលបីឆ្នាំ។
នៅឆ្នាំនេះរដ្ឋមន្ត្រីក្រសួងទេសចរណ៍លោកថោង ខុនវាយតម្លៃថា ប្រជាពលរដ្ឋមកទស្សនាព្រះរាជពិធីបុណ្យអុំទូកមានត្រឹមតែប្រមាណតែ៥០ម៉ឺននាក់តែប៉ុណ្ណោះ។
នៅលើសួនច្បារមុខវត្តបទុមវត្តី ស្តង់ទំនិញជាច្រើនបានតម្រៀបលើកម្រាលឥដ្ឋ។ ប៉ុន្តែអតិថិជនហាក់ដូចជាមានមិនបាន១០០នាក់ទេរហូតមកទល់នឹងម៉ោង១១ផ្លាយនៃព្រឹកថ្ងៃសុក្រនេះដែលជាថ្ងៃនៃព្រះរាជពិធីបុណ្យអុំទូកចុងក្រោយ។
លោកខៀវ សុវីរៈ អ្នកលក់ទំនិញរបស់ក្រុមហ៊ុនតាំងងួនងួន ដែលលក់ផលិតផល Perfect Care ដូចជាសាប៊ូម្សៅ សាប៊ូដុសខ្លួន ប្រេងកូឡា និងគ្រឿងសម្អាងស្ត្រីមួយចំនួន។ លោកនិងក្រុមបុគ្គលិកកំពុងអង្គុយរង់ចាំអតិថិជន។
លោកខៀវ វីរៈខកចិត្តនៅពេលដែលការលក់បានធ្លាក់ចុះប្រមាណ៩០ភាគរយ បើធៀបទៅនឹងព្រះរាជពិធីបុណ្យអុំទូកកាលពីលោកមុនៗ ដែលក្រុមហ៊ុនរបស់លោកអាចលក់បានជាងមួយម៉ឺនទៅពីរម៉ឺនដុល្លារក្នុងមួយថ្ងៃ។
«កាលពីលើកមុនលក់បានពី១៥០០០ទៅ២០០០០(ដុល្លារ)ក្នុងមួយថ្ងៃ។ឥឡូវលក់សរុបបានប្រមាណពី២ទៅ៣ពាន់ដុល្លារក្នុងមួយថ្ងៃ។ ខកចិត្តច្រើន។ យើងមិននឹកស្មានថា មនុស្សតិចមែនទែន»។
ក្រុមហ៊ុនតាំងងួនងួនរបស់លោកវីរៈបានជួលតូបចំនួនបីជាប់គ្នា។ តូបនិមួយៗមានតម្លៃ១០០០ដុល្លារក្នុងរយៈពេលបីថ្ងៃ។
«ជួលរាងថ្លៃដែរ។ បីតូបនេះអស់៣០០០ដុល្លារក្នុងរយៈពេលបីថ្ងៃ។ សង្ឃឹមថា ថ្ងៃទី៣នេះអាចបានរួចខ្លួន ឬចំណេញតិចតួច។ តែមិនបានដូចមុនទេ»។
ព្រះរាជពិធីបុណ្យអុំទូក អកអំបុក និងសំពះព្រះខែតែងតែប្រព្រឹត្តទៅនៅក្នុងអំឡុងខែវិច្ឆិកា ក្នុងទន្លេសាប នៅពីមុខព្រះបរមរាជវាំង ក្នុងរាជធានីភ្នំពេញ។ ព្រះរាជពិធី ដែលមានរយៈពេលបីថ្ងៃនេះគឺដើម្បីឧទ្ទិសដល់វីរភាពកងទ័ពជើងទឹកកម្ពុជានាសម័យបុរាណ។
ជាទម្លាប់ ប្រជាពលរដ្ឋមកពីខេត្តនៅជុំវិញរាជធានីភ្នំពេញតែងតែសម្រុកចូលមកទស្សនាដោយផ្ទាល់ដែលធ្វើឲ្យតាមដងផ្លូវមាត់ទន្លេ និងមុខព្រះបរមរាជវាំងណែនស្ទះដោយមនុស្សច្រើនដូចស្រមោច។
ប៉ុន្តែព្រះរាជពិធីនេះបានផ្អាកចាប់តាំងពីឆ្នាំ២០១១មក ដោយសារមានឧបទ្ទវហេតុដើរជាន់គ្នាស្លាប់នៅលើស្ពានពេជ្រនៃមណ្ឌលកម្សាន្តកោះពេជ្រនិងដោយសារព្រះមហាវីរក្សត្រសម្តេចព្រះនរោត្តម សីហនុបានយាងចូលទិវង្គត។ ការភ័យខ្លាចចំពោះសោកនាដកម្មកាលពីបីឆ្នាំមុនទំនងជានៅស្ថិតក្នុងអារម្មណ៍របស់ប្រជាពលរដ្ឋដែលត្រូវមកកម្សាន្តនៅរាជធានីភ្នំពេញនៅឡើយ។ ជាពិសេសនៅក្នុងពិធីរំឭកខួបគម្រប់ដប់ឆ្នាំនៃការឡើងគ្រងរាជ្យសម្បត្តិរបស់ព្រះមហាក្សត្រសម្តេចព្រះបរមនាថ នរោត្តម សីហមុនីមានបុរសម្នាក់បានស្លាប់ដោយសារគ្រាប់កាំជ្រួច និងមនុស្សមួយចំនួនទៀតបានរងរបួស។
នៅពីមុខវត្តលង្កា ក្បែរវិមានឯករាជ្យ រថយន្តលក់កាហ្វេចល័តហ្វ័រយូ (Coffee4u) ចំនួនបីគ្រឿងបញ្ឈរបន្តកន្ទុយគ្នា។ ប៉ុន្តែអតិថិជនចូលទិញដោយកម្របំផុតគឺក្នុងមួយថ្ងៃអតិថិជនចូលទិញកាហ្វេនេះមានចន្លោះពី៥០ទៅ៦០នាក់ប៉ុណ្ណោះសម្រាប់រថយន្តចល័តទាំងបី ដ្បិតមានមនុស្សតិចតួចប៉ុណ្ណោះដើរឆ្លងកាត់នៅទីនេះ មុនពេលរាត្រីមកដល់។ ពេលរាត្រី អ្នកក្រុងភ្នំពេញចេញមកកម្សាន្តការបាញ់កាំជ្រួច និងដើរកម្សាន្តនៅមុខព្រះបរមរាជវាំងនិងនៅតាមសួនច្បារនានាដែលមានការតាំងលក់ផលិតផលផ្សេងៗ។
លោកហេង យ៉ាលីជាអ្នកគ្រប់គ្រងការលក់កាហ្វេហ្វ័រយូនៃរថយន្តចល័តទាំងបីនេះ។
«ធម្មតាឱកាសបុណ្យអុំទូកយើងគិតថា មានមនុស្សច្រើន យើងលក់បានច្រើន។ ប៉ុន្តែយើងលក់អត់ដាច់ ដោយសារមនុស្សតិច។ យើងសាកល្បងឆ្នាំទី១ ហើយបានជួបបរាជ័យ»។
លោកយ៉ាលីសង្ឃឹមថា នៅឆ្នាំក្រោយ អ្នកទស្សនាព្រះរាជពិធីបុណ្យអុំទូកនឹងមានចំនួនកើនច្រើនជាងនេះ។
នៅឯច្រាំងទន្លេសាប មុខព្រះបរមរាជវាំងឯណោះវិញ មនុស្សម្នាប្រមូលផ្តុំគ្នាតែនៅលើឃឿនច្រាំងធ្វើអំពីថ្មតែប៉ុណ្ណោះ ដើម្បីគយគន់ដោយផ្ទាល់ភ្នែកនូវទិដ្ឋភាពទូកប្រណាំងនិងអ្នកអុំទូកដែលចល័តបញ្ច្រាសខ្សែទឹកដើម្បីទៅកាន់ទីកន្លែងចេញដំណើរដើម្បីប្រណាំង។ នៅទីនេះធ្លាប់តែមានមនុស្សដើរប្រជ្រៀតគ្នាស្ទើរដកដង្ហើមមិនបាននៅរាល់ពេលមានពិធីបុណ្យអុំទូកម្តងៗ។
ធឿន ស្រីនាងគឺជាអ្នកលក់ភេសជ្ជៈ មានដូចជាទឹកក្រូច ទឹកបរិសុទ្ធ និងទឹកផ្លែឈើនៅមុខវាំង។ អង្គុយនៅក្រោមម្លប់ឆ័ត្រ កញ្ញាសម្បូរស្រអែមរូបនេះតែងតែប្រកបមុខរបរនេះរៀងរាល់ឆ្នាំដែលមានព្រះរាជពិធីបុណ្យអុំទូក។
ការលក់ដូរភេសជ្ជៈរបស់នាងបានធ្លាក់ចុះពីជាងបីកេសមកត្រឹមជាងមួយកេសនៅឆ្នាំនេះ។
«ខុសគ្នាជាងឆ្នាំមុនៗច្រើន។ មនុស្សតិចជាងមុន។ មុនៗមនុស្សដើរ មិនដូចពេលនេះទេ។ យើងលក់មិនសូវដាច់។ យើងជួលកន្លែងគេក្នុងរយៈពេលបីថ្ងៃនេះ៣០ដុល្លារ។ ជួលកន្លែងថ្លៃ តែលក់មិនដាច់ ដោយសារតែអត់មានមនុស្ស»។
ការប៉ះពាល់មិនមែនមានតែសម្រាប់អ្នកលក់ដូរតែប៉ុណ្ណោះទេ។ ប៉ុន្តែផ្នែកសេវកម្មដឹកជញ្ជូនក៏ដូចគ្នានេះដែរ។
លោកសៀង ពិសិដ្ឋចតរ៉ឺម៉កកង់បីរបស់លោកនៅលើផ្លូវសួនច្បារវិមានឯករាជ្យ។ រហូតដល់ថ្ងៃត្រង់នៅថ្ងៃសុក្រនេះ លោកទើបតែដឹកអ្នកដំណើរបានម្នាក់តែប៉ុណ្ណោះ។
«ឆ្នាំនេះមិនសូវមានមនុស្សទេ។ រាល់ឆ្នាំមានមនុស្សច្រើនថ្មើរនេះ។ ថ្ងៃនេះខ្ញុំទើបតែបានមួយម៉ូយ។ ពេលមុនៗ ថ្មើរនេះខ្ញុំបានបីបួនម៉ូយរួចទៅហើយ។ ឆ្នាំនេះ គេមិនសូវហ៊ានដើរលេង ព្រោះចេះតែមានព្រឹត្តិការណ៍បន្តបន្ទាប់ ម្ល៉ោះហើយអ្នកខ្លះមិនដើរលេងទេ។ ហើយណាមួយគេពិបាករកលុយ អត់លុយអត់កាក់»។
ថ្វីបើអ្នកជំនួញមួយចំនួនបានត្អូញត្អែរពីផលចំណូលរបស់ខ្លួនដោយសារចំនួនអ្នកទស្សនាព្រះរាជពិធីបុណ្យអុំទូក អកអំបុក និងសំពះព្រះខែបានថយចុះ ប៉ុន្តែលោកឡុង ឌីម៉ង់ អ្នកនាំពាក្យសាលារាជធានីភ្នំពេញពន្យល់ថា សាលារាជធានីភ្នំពេញនឹងមិនអាចផ្តល់ឱកាសសម្រាប់ការបញ្ចុះតម្លៃជួលស្តង់នេះទេ ដោយសារក្រុមហ៊ុន ឬស្ថានីយ៍ទូរទស្សន៍ទទួលបានគោលការណ៍ឯកភាពពីសាលារាជធានីភ្នំពេញ ហើយក្រុមហ៊ុននិងស្ថានីយ៍ទូរទស្សន៍ទាំងនេះបានជួលស្តង់ទំនិញបន្ត៕
